close
News

ງານເປີດໂຕ Samsung Galaxy Note 8

IMG_4690 copy

ໃນວັນທີ 1 ກັນຍາ 2017 ທີ່ຜ່ານມານີ້, ບໍລິສັດ Samsung ເຊິ່ງເປັນບໍລິສັດຜະລິດເຄື່ອງໃຊ້ໄຟຟ້າ ແລະ ສະມາດໂຟນ ໄດ້ເປີດໂຕ Samsung Galaxy Note 8 ເຊິ່ງເປັນຜະລິດຕະພັນໃໝ່ລ້າສຸດຂອງຕົນເອງຢ່າງເປັນທາງການ ທີ່ໂຮງແຮມ Lao Plaza.

ຕະກຸນໂທລະສັບ Galaxy Note ແມ່ນໜຶ່ງໃນຜະລິດຕະພັນຂອງ Samsung ທີ່ມີຕັ້ງແຕ່ Galaxy Note 1 ຈົນເຖິງ Samsung Galaxy Note 8 ເຊິ່ງ Galaxy Note 8 ນີ້ເອງທີ່ເປັນຜະລິດຕະພັນໃໝ່ລ້າສຸດຂອງທາງ Samsung. ໂທລະສັບຕະກຸນ Galaxy Note ແມ່ນຖືກອອກແບບມາໃຫ້ເໝາະສົມກັບການໃຊ້ງານແທນປື້ມ ນອກຈາກຈະສາມາດໃຊ້ໄດ້ຄືກັບໂທລະສັບສະມາດໂຟນທົ່ວໄປແລ້ວ Galaxy Note ຍັງມີຟັງຊັ້ນໃນການຈົດ ຫຼື ແຕ້ມທີ່ຄ້າຍຄືກັບປື້ມແທ້ໆໂດຍໃຊ້ບິກທີ່ຕິດມານໍາໂທລະສັບດັ່ງກ່າວ.

ທ່ານ ຊຶງໂຮ ຊອຍ, ຜູ້ຈັດການໃຫ່ຍ ປະຈໍາລາວ-ກໍາປູເຈຍ ບໍລິສັດ ໄທຊໍາຊຸງ ເອເລັກໂທນິກ ຈໍາກັດ (Mr. Seungho Choi, Managing Director of Lao-Cambodia Branch of Thai Samsung Electronics Co., Ltd) ໄດ້ກ່າວວ່າ: “ຊໍາຊຸງ ຮູ້ສຶກຊື່ນຊົມ ແລະ ປະທັບໃຈກັບຄວາມມັກຮັກທີ່ມີຕໍ່ຜະລິດຕະພັນຈາກຜູ້ໃຊ້ Galaxy Note. ພວກທ່ານປຽບສະເໝືອນແຮງບັນດານໃຈທີ່ຜັກດັນໃຫ້ພວກເຮົາສ້າງສັນ Galaxy Note ລຸ້ນໃໝ່ ທີ່ດີຍິ່ງຂື້ນໄປເລື້ອຍໆ. ສໍາລັບ Samsung Galaxy Note 8 ໃໝ່ນີ້ ເປັນການສະແດງໃຫ້ເຫັນເຖິງນະວັດຕະກໍາທີ່ໂດດເດັ່ນ ດ້ວຍການຍົກລະດັບຄວາມສາມາດຂອງ S Pen ໃຫ້ມີຄວາມສະຫຼາດລໍ້າຍິ່ງຂຶ້ນ ລວມເຖິງກ້ອງຄູ່ Dual Camera ທີ່ຊົງປະສິດທິພາບຫຼາຍທີ່ສຸດທີ່ພວກເຮົາເຄີຍມີມາ ແລະ ຈໍສະແດງຜົນແບບໄຮ້ຂອບ ເປີດມູມມອງການໃຊ້ໃຫ້ກວ້າງຂື້ນ. ທັງໝົດນີ້ລ້ວນແຕ່ແມ່ນຄຸນສົມບັດທີ່ຕອກຢໍ້າຄວາມເປັນສະມາດໂຟນທີ່ສີທີ່ສຸດແຫ່ງການປະຕິວັດວົງການ Galaxy Note 8 ທີ່ຈະຊ່ວຍຕອບສະໜອງໃຫ້ທຸກສິ່ງໄດ້ດັ່ງໃຈ ແມ່ນແຕ່ສິ່ງທີ່ຄົນອື່ນຄິດວ່າຈະເປັນໄປບໍ່ໄດ້”.

Galaxy Note 8 ທີ່ຫາກໍ່ເປີດໂຕໃໝ່ໆນີ້ ແມ່ນມາພ້ອມກັບລູກຫຼີ້ນທີ່ຫຼາກຫຼາຍ ໂດຍທາງຜູຜະລິດໄດ້ເພີ່ມຂີດຄວາມສາມາດຂອງ Galaxy Note 8 ຂື້ນມາຫຼາຍກ່ວາເກົ່າເຊັ່ນ: ໄດ້ເພີ່ມຄວາມສາມາດຂອງ S Pen, ໂທລະສັບມາພ້ອມກັບກ້ອງຖ່າຍຮູບອັດສະລິຍະ, ມີລະບົບສະແກນມ່ານຕາ ແລະ ລາຍນິ້ວມື, ໜ້າຈໍແບບໂຄ້ງ ແລະ ອື່ນໆ.

ຄຸນລັກສະນະໃໝ່ທີ່ມາພ້ອງກັບ Galaxy Note 8 ປະກອບມີດັ່ງນີ້:

  • S Pen: ແມ່ນບິກທີ່ຕິດຂັດມານໍາ Galaxy Note 8 ທີ່ຖືກພັດທະນາຄວາມສາມາດໃຫ້ຮັບຮູ້ແຮງກົດ (Pressure Sensitivity) ໃຫ້ມີຄວາມລະອຽດຖືກຕ້ອງຍິ່ງຂື້ນ. ອີກທັງຍັງເພີ່ມລູກຫຼີ້ນມາອີກຫຼາຍຢ່າງທີ່ຈະຊ່ວຍໃຫ້ຜູ້ໃຊ້ສະດວກສະບາຍຍິ່ງຂື້ນ.
  • Live Message ເປັນອີກໜຶ່ງຄຸນສົມບັດຂອງ Galaxy Note 8 ທີ່ຊ່ວຍໃຫ້ການສື່ສານງ່າຍຂື້ນ ເຊິ່ງຄຸນສົມບັດດັ່ງກ່າວແມ່ນເປັນການແບ່ງປັນ ຫຼື ແຊຣ ຕົວອັກສອນໃນຮູບແບບເອນິເມຊັ້ນ (ອັກສອນເຄື່ອນໄຫວ) ແລະ ຍັງຮອງຮັບການສົ່ງຟາຍປະເພດ Animated Gif (AGIF) ທີ່ທ່ານເປັນຄົນແຕ້ມເອງໂດຍຜ່ານ S Pen.
  • Galaxy Note 8 ມາພ້ອມກັບກ້ອງຖ່າຍຮູບທີ່ມີຄວາມລະອຽດເຖິງ 12MP ສອງໂຕ ພ້ອມກັບລະບົບປ້ອງກັນການສັ່ນສະເທືອນ OIS (Optical Image Stabilization) ທັງສອງເລນ ແລະ ປະກອບດ້ວຍກ້ອງເລນມູນກ້ວາງ ແລະ ເລນເທເລໂຟ.
  • Galaxy Note 8 ຍັງມາພ້ອມກັບຄຸນລັກສະນະພິເສດທີ່ເອີ້ນວ່າ Live Focus ທີ່ໃຫ້ທ່ານຄວບຄຸມຄວາມເລິກຂອງຮູບພາບ (Depth of field) ໂດຍສາມາດປັບການໃສ່ເອັບເຟັກໂບເກ (Bokeh Effect) ທັງໃນໂໝດພຣີວິວ ແລະ ຫຼັງການຖ່າຍຮູບແລ້ວ ໃຫ້ສາກຫຼັງມີລະດັບຄວາມຊັດຫຼືເບີໄດ້ຕາມທີ່ຕ້ອງການ.
  • ກ້ອງຖ່າຍຮູບປະກອບດ້ວຍໂໝດ Dual Capture ທີ່ເກັບພາບສອງພາບໃນການຖ່າຍພຽງຄັ້ງດຽວ. ໂດຍພາບໜຶ່ງຈະເປັນໄລຍະໄກ້ ແລະ ອີກພາບໜິ່ງຈະເປັນພາບມູມກ້ວາງເຊິ່ງສາມາດເກັບລາຍລະອຽດຂອງສາກຫຼັງໄດ້.
  • ໜ້າຈໍຂອງ Galaxy Note 8 ເປັນຈໍແບບໄຮ້ຂອບ ທີ່ມີຈໍສະແດງຜົນໃຫ່ຍສຸດທີ່ເຄີຍມີມາໃນ Galaxy Note ຕ່າງໆ. ແຕ່ດ້ວຍການອອກແບບໂຕເຄື່ອງໃຫ້ພຽວຍາວດ້ວຍຂະໜາດ 3 ນິ້ວ ສາມາດຈັບໄດ້ດ້ວຍມືດຽວ. ພ້ອມດ້ວຍຄວາມລະອຽດແບບ Quad HD+ Super AMOLED ແບບໄຮ້ຂອບໃນສະຕາຍ Infinity Display. ນອກນີ້ Galaxy Note 8 ຍັງມີໜ້າທີ່ແບບ Multi-tasking ທີ່ໃຫ້ຜູ້ໃຊ້ສາມາດເປີດໃຊ້ງານຫຼາຍໆແອັບພ້້ອມກັນໄດ້.
  • Galaxy Note 8 ຍັງມາພ້ອມກັບລະບົບສະແກນລາຍນິ້ວມື ແລະ ມ່ານຕາ ເພື່ອຮັບປະກັນຄວາມປອດໄພຂອງຂໍ້ມູນ ແລະ ຄວາມເປັນສ່ວນໂຕຂອງຜູ້ໃຊ້.
  • Galaxy Note 8 ສາມາດສາກແບັດເຕີຣີໄດ້ໄວແບບໄຮ້ສາຍ (Fast Wireless Charging). ຄວາມສາມາດດັ່ງກ່າວນີ້ເຮັດໃຫ້ Galaxy Note 8 ບໍ່ຄືໂທລະສັບສະມາດໂຟນທົ່ວໆໄປທີ່ເຄີຍມີມາ.
  • ນອກນີ້ Galaxy Note 8 ຍັງຖືກອອກແບບມາໃຫ້ປ້ອງກັນນໍ້າ ແລະ ປ້ອງກັນຝຸ່ນອີກດ້ວຍ ບໍ່ວ່າຜູ້ໃຊ້ຈະຢູ່ໃນສະຖານະການໃດກໍຕາມ ຜູ້ໃຊ້ສາມາດໃຊ້ Galaxy Note 8 ໄດ້ທຸກເວລາແລະທຸກສະຖານທີ່.

ຖືໄດ້ວ່າ Samsung ໄດ້ເພີ່ມຄວາມສາມາດຂອງ Galaxy Note 8 ໄປຫຼາຍ ໂດຍສະເພາະແມ່ນຄວາມສາມາດຂອງກ້ອງຄູ່ Dual Camera ແລະ ບິກ S Pen. ມາຮອດນີ້ທຸກຄົນຄືຊິຢາກຮູ້ແລ້ວວ່າໂທລະສັບ Galaxy Note 8 ມີລາຄາທໍ່ໃດ. ໃນມື້ເປີດໂຕ, Galaxy Note 8 ມີລາຄາຢູ່ທີ່ 7.590.000 ກີບ(ເຈັດລ້ານ ຫ້າແສນ ເກົ້າສິບພັນ ກີບ). ໃຜທີ່ເປັນແຟນພັນແທ້ຂອງ Galaxy Note ອາດຈະສັ່ງຊື້ໄປແລ້ວ ແຕ່ ໃຜທີ່ຍັງບໍ່ທັນຈັບຈອງກໍ່ສາມາດຫາຊື້ໄດ້ແລ້ວທີ່ສູນຊໍາຊຸງ ແລະ ຕົວແທນຈໍາໜ່າຍຕ່າງໆ.

Anoulack

The author Anoulack