close
Cover Story

ຊ້າງລາວ ກ້າວສູ່ປີທີ່ 5 ຢ່າງໝັ້ນຄົງກັບການບໍລິການຄຸນນະພາບສູງ

1THW_7564

ບ້ານ ແລະ ເຮືອນ ເປັນຄວາມຕ້ອງການອັນດັບຕົ້ນຂອງທຸກຄົນ, ເຊື່ອວ່າທຸກຄົນມີບ້ານໃນຝັນຂອງຕົນເອງ ແລະ ເມື່ອພ້ອມ ຈະສ້າງບ້ານໃນສະຕາຍຂອງຕົນເອງ ເພື່ອຄອບຄົວ ແລະ ຄົນທີ່ຮັກ. ຫລາຍໆຄົນເລີ່ມຈາກ ການວາງແຜນ, ຊອກແບບບ້ານທີ່ມັກ, ຊື້ວັດສະດຸກໍ່ສ້າງ, ຈ້າງຊ່າງເກດພື້ນ, ຈ້າງຊ່າງຕັ້ງເສົາ, ຊ່າງກໍ່, ຊ່າງເພດານ, ຊ່າງເຮັດຫ້ອງນໍ້າ… ກ່ອນຈະສົມບູນແບບບໍ່ແມ່ນເລື່ອງທໍາມະດາ ແລະລະຫວ່າງຂັ້ນຕອນຫາກບໍ່ມີການຄິດໄລ່ ຫລືປະເມີນກ່ອນ ຮັບຮອງວ່າງົບບານປາຍແນ່ນອນ ຊື້ເຄື່ອງມາເຫລືອ ໃຊ້ບໍ່ໄດ້ ຫລື ແບບອອກມາບໍ່ກົງກັບທີ່ຕ້ອງການ ບັນຫາຕ່າງໆ ຈະຫມົດໄປທັນທີ ເມື່ອທ່ານໃຊ້ບໍລິສັດທີ່ປຶກສາ ພ້ອມສ້າງບ້ານໃຫ້. ມື້ນີ້ທີມງານພວກເຮົາ ນໍາເລື່ອງດີໆມາ ເພື່ອຜູ້ອ່ານໂດຍສະເພາະ ພວກເຮົາຈະມາແນະນໍາ ໜຶ່ງໃນບໍລິສັດກໍ່ສ້າງແຖວຫນ້າຂອງ ບ້ານເຮົາ ທີ່ຈະມາຕອບໂຈດທຸກຢ່າງເລື່ອງງານກໍ່ສ້າງ ນັ້ນຄືບໍລິສັດຊ້າງລາວ ເຊິ່ງກ່ອນຫນ້ານີ້ ທາງບໍລິສັດໄດ້ມາຂຶ້ນປົກວາລະສານຂອງພວກເຮົາ ສະບັບ 136 ໃນປີ 2015 ທີ່ຜ່ານມາ ເຊື່ອວ່າທຸກຄົນຍັງຈື່ໄດ້ ແລະ ຕິດຕາມຜົນງານເພີ່ນມາເລື້ອຍໆ ເຊິ່ງເພີ່ນກັບມາອີກຄັ້ງໃນຮູບແບບໃຫມ່ ເຊິ່ງຈະເປັນແນວໃດນັ້ນມາຕິດຕາມພ້ອມໆກັນເລີຍ.
ມື້ນີ້ ພວກເຮົາໄດ້ຮັບກຽດຈາກທາງຜູ້ບໍລິຫານ ທັງ 5 ທ່ານ ມາແນະນໍາບາດກ້າວໃຫມ່ຂອງຊ້າງລາວ ຈະແຕກຕ່າງຈາກເມື່ອກ່ອນແນວໃດ, ລວມເຖິງບໍລິການ ແລະ ສິດທິພິເສດຕ່າງໆ ທີ່ຜູ້ອ່ານຈະໄດ້ຮັບຈາກຊ້າງລາວ. ພວກເຮົາຮັບປະກັນເລີຍວ່າ ຜູ້ທີ່ມີເປົ້າຫມາຍຈະສ້າງບ້ານ ຫລື ມີພີ່ນ້ອງທີ່ກໍາລັງຕ້ອງການ ທີ່ປຶກສາການກໍ່ສ້າງ ຕ້ອງບໍ່ພາດທີ່ຈະຕິດຕາມສະບັບນີ້ ເພື່ອບໍ່ເປັນການລໍຊ້າ ມາຕິດຕາມນໍາກັນເລີຍ.


ທ່ານ ທັດສະນະຈອນ ບຸນທັນ ຜູ້ບໍລິຫານ ບໍລິສັດຊ້າງລາວໄດ້ໃຫ້ກຽດແນະນໍາ ກ່ຽວກັບບໍລິສັດຊ້າງລາວ ໃຫ້ກັບທີມງາມພວກເຮົາ ອີກຄັ້ງ ເຊິ່ງຄັ້ງນີ້ຜູ້ອ່ານຈະໄດ້ພົບກັບບາດກ້າວໃໝ່ຂອງຊ້າງລາວ ມາຕິດຕາມລາຍລະອຽດນໍາກັນເລີຍ.

ປະຫວັດຄວາມເປັນມາຂອງຊ້າງລາວ

ບໍລິສັດ ຊ້າງລາວ ແມ່ນບໍລິສັດໃຫ້ຄໍາປຶກສາ, ອອກແບບ, ຮັບເໝົາກໍ່ສ້າງ, ຕົບແຕ່ງພາຍໃນ ອອກແບບບ້ານ, ສະລອຍນໍ້າ, ຈັດສວນ, ອາຄານ, ໂຮງໝໍ, ຕຶກສູງ, ໂຮງແຮມ ຫຼື ຮ້ານອາຫານ ແລະ ໄຟຟ້າ. ເປັນບໍລິສັດ ທີ່ມີການບໍລິການຕັ້ງແຕ່ເລີ່ມຕົ້ນຈົນສໍາເລັດ ເລີ່ມຕັ້ງແຕ່ໃຫ້ຄໍາປຶກສາແກ່ລູກຄ້າ, ອອກແບບໃຫ້ລູກຄ້າ, ຮັບເໝົາກໍ່ສ້າງ, ຕົບແຕ່ງພາຍໃນ ແລະ ແລ່ນໄຟຟ້າເຂົ້າ ສ້າງຕັ້ງແຕ່ປີ 2012 ແຕ່ດ້ວຍປະສົບການການເຮັດວຽກຂອງຜູ້ບໍລິຫານພວກເຮົາທີ່ມີມາຫຼາຍກວ່າ 20 ປີ, ຊ້າງລາວ ພວກເຮົາຈຶ່ງສາມາດສ້າງຄວາມໝັ້ນໃຈ ໃຫ້ລູກຄ້າມາໃຊ້ບໍລິການກັບພວກເຮົາ.


      ຫຼັງຈາກ2ປີຜ່ານມາທີ່ຂຶ້ນປົກວາລະສານ108ຊ້າງລາວມີການປ່ຽນແປງແນວໃດ?

ຫຼັງຈາກ 2 ປີ ຜ່ານມາພວກເຮົາເຫັນຄວາມແຕກຕ່າງຫຼາຍໆດ້ານ ເປັນຕົ້ນແມ່ນ ພວກເຮົາມີໂຄງການທີ່ໜ້າສົນໃຈຫຼາຍຂຶ້ນ, ຂະໜາດໂຄງການຫຼາຍຂຶ້້ນ, ຕອບສະໜອງຄວາມຕ້ອງການຂອງລູກຄ້າ ກ່ຽວກັບສະລອຍນໍ້າ, ໂຄງການສ້າງໂຮງແຮມ , ໂຄງການເຮັດຫົນທາງ ເຊິ່ງແຕກຕ່າງຈາກ 2 ປີ ກ່ອນຫຼາຍ ຈໍານວນພະນັກງານເອງກໍ່ເພີ່ມຂຶ້ນເຊັ່ນດຽວກັນ. ໃນຂະນະດຽວກັນນັ້ນ ທີມງານພວກເຮົາເອງກໍ່ໄດ້ຮັບປະສົບການຈາກຫຼາຍໆໂຄງການ ແນວຄວາມຄິດໃນການບໍລິຫານ, ການບໍລິການ ແລະ ການຮ່ວມມືກັບຫຼາຍຝ່າຍທີ່ເພີ່ມຂຶ້ນ ເພື່ອໃຫ້ບັນລຸເປົ້າໝາຍຮ່ວມກັນ. ພວກເຮົາໄດ້ຮ່ວມມືກັບຜູ້ສະໜອງວັດຖຸ ເຮັດໃຫ້ໄດ້ລາຄາທີ່ຖືກລົງ, ຈັບມືກັບບໍລິສັດນ້ອຍເພື່ອຮ່ວມມືກັນສ້າງຄວາມເຊື່ອໝັ້ນໃຫ້ກັນລູກຄ້າຂອງພວກເຮົາ.


ການບໍລິການຂອງ ຊ້າງລາວທີ່ລູກຄ້າຈະໄດ້ສໍາຜັດມີຫຍັງແດ່?

  • ອອກແບບບ້ານ
  • ສະລອຍນໍ້າ
  • ຈັດສວນ
  • ອາຄານ
  • ໂຮງໝໍ
  • ຕຶກສູງ
  • ໂຮງແຮມ ຫຼື ຮ້ານອາຫານ

ນອກຈາກນັ້ນ ພວກເຮົາຍັງສາມາດອອກແບບ ແລະ ກໍ່ສ້າງຕາມຄວາມຕ້ອງການຂອງລູກຄ້າທຸກຮູບແບບພິເສດ ພວກເຮົາໃຫ້ຄໍາປຶກສາຟຣີ ເພາະພວກເຮົາຢາກຕອບແທນຄືນທີ່ລູກຄ້າເຊື່ອໝັ້ນ ແລະ ເລືອກປຶກສາກັບພວກເຮົາ ລູກຄ້າສາມາດເຂົ້າມາປຶກສາກັບທີມງານພວກເຮົາໄດ້ ໂດຍບໍ່ເສຍຄ່າໃຊ້ຈ່າຍໃດ.
ທີມງານອອກແບບຊ້າງລາວ ໃສ່ໃຈທຸກລາຍລະອຽດ ຂອງການໃຊ້ພື້ນທີ່ພາຍໃນບ້ານຂອງທ່ານ ໃຫ້ແທດເຫມາະ ກັບສະຕາຍການດຳລົງຊີວິດ ແລະ ຍັງເປັນໂຕແທນຈຳຫນ່າຍ ວັດສະດຸກໍ່ສ້າງຫລາກຫລາຍລາຍການ. ທ່ານທີ່ກຳລັງມີແຜນກໍ່ສ້າງບ້ານໃນຝັນ ຂອງທ່ານ ແມ່ນສາມາດເຂົ້າມາຫາທີມງານພວກເຮົາໄດ້.

ປັດຈຸບັນ ທຸລະກິດນີ້ມີການແຂ່ງຂັນຫຼາຍບໍ່?

ພວກເຮົາເຊື່ອວ່າ ທຸກທຸລະກິດ ຍ່ອມຂາດບໍ່ໄດ້ທີ່ຈະມີການແຂ່ງຂັນກັນ ເຊິ່ງທຸລະກິດນີ້ເອງກໍ່ເຊັ່ນດຽວກັນມີການແຂ່ງຂັນສູງ ໂດຍສ່ວນໃຫຍ່ແມ່ນເລື່ອງຂອງລາຄາ ແຕ່ສໍາຄັນທີ່ສຸດແມ່ນ ຂຶ້ນກັບຄວາມເຊື່ອໝັ້ນ ແລະ ຄວາມໄວ້ວາງໃຈຂອງລູກຄ້າ ເຊິ່ງພວກເຮົາເອງ ໄດ້ຮັບໂຄງການຫຼາກຫຼາຍ, ມີຜົນງານຫຼາຍ, ທີມງານພ້ອມແລະ ພວກເຮົາໃນຖານະຜູ້ບໍລິຫານເອງມີປະສົບການຫຼາຍກວ່າ 20 ປີ ເຊິ່ງໃຊ້ຈຸດນີ້ ເປັນຈຸດສ້າງຄວາມເຊື່ອໝັ້ນ ແລະ ເຮັດໃຫ້ລູກຄ້າໄວ້ວາງໃຈພວກເຮົາ.

ການແຂ່ງຂັນຈາກພາຍນອກ

ສໍາລັບຊ້າງລາວພວກເຮົາ ເຫັນວ່າເປັນໂອກາດຫຼາຍກວ່າ ຫຼາຍໆບໍລິສັດຕ່າງປະເທດທີ່ເຂົ້າມາ ສ່ວນໃຫຍ່ ແມ່ນເຂົ້າມາຮ່ວມມືກັບທາງພວກເຮົາຫຼາຍ ແລະ ອີກທາງດ້ານໜຶ່ງແມ່ນພວກເຮົາຈະຖືກເລືອກເປັນຜູ້ສະໜອງ ເຊິ່ງເປັນການຮ່ວມມືກັນຫຼາຍກວ່າ ພວກເຮົາຈຶ່ງຖືວ່າເປັນຜົນດີຫຼາຍກວ່າ.

ແນວໂນ້ມກ່ຽວກັບທຸລະກິດການຮັບເໝົາກໍ່ສ້າງເປັນແນວໃດ?

ໃນເມື່ອກ່ອນ ສ່ວນໃຫຍ່ພວກເຮົາຈະເວົ້າເຖິງການສ້າງບ້ານ ແລະ ຮ້ານອາຫານຊັ້ນດຽວເປັນຫຼັກ ແຕ່ປັດຈຸບັນ ມີການປ່ຽນແປງຫຼາຍ ພວກເຮົາເວົ້າເຖິງຕຶກ 5 ຊັ້ນ, ຕຶກ 9 ຊັ້ນ ຫຼື ຕຶກ 15 ຊັ້ນ, ກ່ຽວກັບໂຮງໝໍ, ໂຮງແຮມ ຫຼື ໂຊວລູມລົດ ເຊິ່ງທາງພວກເຮົາເຫັນເຖິງຂະໜາດຂອງໂຄງການທີ່ລູກຄ້າເຂົ້າມາຫາ ຈະໃຫຍ່ຂຶ້ນ ເຊິ່ງພວກເຮົາຄິດວ່າ ນີ້ແມ່ນຕົວວັດຂອງການຂະຫຍາຍໂຕທາງດ້ານເສດຖະກິດບ້ານເຮົາໃນປັດຈຸບັນ ເຊິ່ງຖືໄດ້ວ່າ ຂະໜາດການລົງທຶນແມ່ນໃຫຍ່ກວ່າ ສະແດງເຖິງການພັດທະນາຂອງເສດຖະກິດບ້ານເຮົາທີ່ນັບມື້ນັບພັດທະນາຂຶ້ນ.


ຂໍ້ຈໍາກັດ ແລະ ສິ່ງທ້າທາຍຂອງທຸລະກິດນີ້ມີຫຍັງແດ່?

ຫຼາຍໆວຽກແມ່ນຈະຕ້ອງພົບກັບສິ່ງທ້າທາຍຄື: ຜູ້ຮັບເໝົາກໍ່ສ້າງ ແລະ ເຈົ້າຂອງໂຄງການທີ່ຍັງບໍ່ເຂົ້າໃຈກັນ ເຊິ່ງຕ້ອງມີການປັບໂຕເຂົ້າຫາກັນ ພວກເຮົາເຊື່ອວ່າເຈົ້າຂອງໂຄງການທຸກຄົນ ແມ່ນຕ້ອງການຄຸນນະພາບ ສູງສຸດ ແຕ່ໃນລາຄາທີ່ຕໍ່າສຸດ ສ່ວນໃນດ້ານຂອງຜູ້ຮັບເໝົາເອງ ຄວາມເປັນຈິງອາດຈະເຮັດບໍ່ໄດ້ ເຊິ່ງຈະຕ້ອງມີການປັບເຂົ້າຫາກັນ ເພື່ອຫາຈຸດເໝາະສົມ ທີ່ສາມາດສ້າງຄວາມພໍໃຈທັງສອງຝ່າຍ.
ດ້ານຂອງພະນັກງານ ເຊິ່ງຖືໄດ້ວ່າ ບ້ານເຮົາກໍາລັງພັດທະນາ ຕຶກ 5-10 ຊັ້ນຍັງມີບໍ່ຫຼາຍ ເຊິ່ງການເຮັດວຽກ ພວກເຮົາຍອມຮັບ ແມ່ນການຮຽນຮູ້ໃໝ່ໆໄປພ້ອມກັນ. ແຕ່ທີ່ສໍາຄັນແມ່ນ ປະສົບການທີ່ພວກເຮົາຮຽນຮູ້ມາຈາກຕ່າງປະເທດ ບໍ່ວ່າຈະເປັນ ອາເມລິກາ, ອົດສະຕາລີ, ຍີ່ປຸ່ນ ມາຝຶກທີມງານ ເພື່ອທີ່ສາມາດສ້າງຄວາມເຊື່ອໝັ້ນ ແລະ ຕອບໂຈດຄວາມຕ້ອງການໃຫ້ກັບລູກຄ້າໄດ້.


ເປົ້າໝາຍໃນການພັດທະນາຕໍ່ໄປຂອງຊ້າງລາວ?

ປັດຈຸບັນພວກເຮົາມີການຮ່ວມມືກັບຕ່າງປະເທດ ໃນການຮ່ວມມື ສະໜອງສິນຄ້າ ແລະ ມີການປະສານງານໃນການຮ່ວມມືໃຫ້ຄໍາປຶກສາ ແລະ ອອກແບບກັບບໍລິສັດຕ່າງປະເທດ. ແນ່ນອນ ໃນອະນາຄົດ ພວກເຮົາໃນຖານະເປັນບໍລິສັດ ວິສາວະກອນລາວ ຈະຂໍເປັນໜຶ່ງ ໃນການມີສ່ວນຮ່ວມໃນການພັດທະນາ ໂຄງການກໍ່ສ້າງບ້ານເຮົາໃຫ້ຄຽງຄູ່ກັບສາກົນ.ພວກເຮົາເປັນວິສາວະກອນລາວ ແນ່ນອນທີ່ສຸດ ພວກເຮົາຈະພະຍາຍາມ ໃນອຸດົມການ ສ້າງວິສາວະກອນລາວໃຫ້ມີຄວາມສາມາດ ແລະ ພ້ອມທີ່ຈະຮ່ວມມືກັບສາກົນ ແລະ ເປັນບໍລິສັດແບບຢ່າງ ເພື່ອສະແດງສັກກະຍາພາບ ເພື່ອໃຫ້ວິສາວະກອນລາວບໍ່ໜ້ອຍໜ້າກັບປະເທດອື່ນ.

ທ່ານ ວິທະຍາ ພອນແກ້ວ ຜູ້ຮ່ວມກໍ່ຕັ້ງ ແລະ ຜູ້ອໍານວຍການ (Co-founder & Director) ໜ້າທີ່ຮັບຜິດສອບ ຫົວໜ້າພາກສະໜາມ ໂດຍຫຼັກໆ ແມ່ນເຮັດວຽກກັບຄົນງານ, ຄວບຄຸມເວລາ ແລະ ເບິ່ງເລື່ອງການຈັດງົບປະມານ.

ອຸປະສັກ ຫຼື ສິ່ງທ້າທາຍສໍາລັບວຽກງານສາຍນີ້ມີຫຍັງແດ່?

ວຽກຫຼັກໆ ແມ່ນຈະພົວພັນກັບຄົນເປັນສ່ວນໃຫຍ່ ບັນຫາແມ່ນເລື່ອງການສື່ສານກັບຫົວໜ້າຈຸງານ ແລະ ຄວາມປອດໄພ. ໂດຍການເຮັດວຽກພາກສະໜາມຖືໄດ້ວ່າຕ້ອງເອົາໃຈໃສ່ເປັນພິເສດ ເຊິ່ງທີມພວກເຮົາເອງ ແມ່ນຕ້ອງໄດ້ມີການປະຊຸມ 7:30 ທຸກໆເຊົ້າ ກ່ອນການເລີ່ມວຽກ ເພື່ອໃຫ້ທຸກຄົນໃນທີມໄດ້ທໍາຄວາມເຂົ້າໃຈກ່ຽວກັບໜ້າວຽກທີ່ຈະເລີ່ມ, ເພື່ອເຕືອນສະຕິທຸກຄົນ ໃນການເຮັດວຽກຢູ່ ພາກສະໜາມ.
ອີກໜຶ່ງບັນຫາແມ່ນ ການເຄື່ອນຍ້າຍຂອງແຮງງານ ຖືໄດ້ວ່າແມ່ນໜຶ່ງບັນຫາເຊັ່ນດຽວກັນ ທີ່ບັນດາບໍລິສັດກໍ່ສ້າງຕ້ອງພົບເລື້ອຍໆ ເພື່ອແກ້ໄຂບັນຫາ ພວກເຮົາມີການຮັບເໝົາມອບໃຫ້ແຕ່ລະຈຸງານເປັນແຕ່ລະງານ ເພື່ອການເຮັດວຽກທີ່ໄດ້ປະສິດຕິພາບຫຼາຍຂຶ້ນ ແລະ ພວກເຮົາມີທີມແຮງງານປະຈໍາ.


ເປົ້າໝາຍໃນການພັດທະນາຂອງຊ້າງລາວ

ທີ່ຜ່ານມາ ການເຮັດວຽກຂອງແຮງງານຍັງມີການເຄື່ອນຍ້າຍ ປ່ຽນວຽກເລື້ອຍໆ ເຊິ່ງຍັງຖືວ່າເປັນບັນຫາ ແຕ່ປັດຈຸບັນ ທີມງານຊ້າງລາວພວກເຮົາໄດ້ພັດທະນາໃໝ່ໂດຍການສ້າງຫົວໜ້າທີມໃນການເຮັດວຽກ ແບ່ງເປັນແຕ່ລະຈຸງານ. ພັດທະນາທັກສະ ແລະ ຄວາມຮູ້ໃຫ້ກັບຫົວໜ້າຈຸ ໃຫ້ຮູ້ຈັກວັດທະນະທໍາການເຮັດວຽກຂອງຊ້າງລາວ. ຫຼັງຈາກນັ້ນ ຈະໃຫ້ສິດໃນການເລືອກທີມເຮັດວຽກຂອງຫົວໜ້າຈຸແຕ່ລະຄົນ ຫົວໜ້າຈຸຈະຈັດຕັ້ງທີມ ແລະ ສາມາດຄວບຄຸມທີມເອງ ເຮັດໃຫ້ການເຮັດວຽກມີຄຸນນະພາບຫຼາຍຂຶ້ນ.
ຊ້າງລາວພວກເຮົາເຊື່ອວ່າ ພວກເຮົາເອງກໍ່ສາມາດກ້າວໄປສູ່ສາກົນໄດ້, ການເຮັດວຽກທີ່ມີຄຸນນະພາບ ໃສ່ໃຈຄວາມປອດໄພ. ນອກຈາກການເຮັດວຽກ ພວກເຮົາຍັງສອນໃຫ້ພະນັກງານທຸກຄົນເອົາໃຈໃສ່, ອົດອອມ ສາມາດສົ່ງເງິນກັບບ້ານ ຫາພໍ່ແມ່. ພວກເຮົາສ້າງຄວາມເຊື່ອໝັ້ນໃຫ້ພໍ່ແມ່ໝັ້ນໃຈ ເມື່ອລູກຫຼານມາເຮັດວຽກຮ່ວມທີມຊ້າງລາວ ເຊິ່ງແມ່ນການໃສ່ໃຈແບບພິເສດຂອງພວກເຮົາ ເພື່ອຫຼຸດຜ່ອນບັນການການເຄື່ອນຍ້າຍແຮງງານ ແລະ ແຮງງານບໍ່ມີສັງກັດ ໃນບ້ານເຮົາໃນອະນາຄົດ.


ທ່ານ  ຂັນທະນູ ພິມມະເສນ ຜູ້ຮ່ວມກໍ່ຕັ້ງ ແລະ ຜູ້ອໍານວຍການ (Co-founder & Director), (Director of Architecture) ຮັບຜິດຊອບການອອກແບບທັງໝົດຂອງຊ້າງລາວ

ອຸປະສັກ ຫຼື ສິ່ງທ້າທາຍສໍາລັບວຽກງານສາຍນີ້ມີຫຍັງແດ່?

ການອອກແບບໂດຍຫຼັກໆແມ່ນ ອອກແບບຕາມຄວາມຕ້ອງການຂອງລູກຄ້າ, ແຕ່ສິ່ງທີ່ຖືເປັນບັນຫາຂອງພວກເຮົາແມ່ນ “ຮວງຈຸ້ຍ” ເຊິ່ງບາງຄັ້ງ ການອອກແບບ ແລະ ເລື່ອງ ຮວງຈຸ້ຍອາດຈະບໍ່ກົງກັນ ແຕ່ໂດຍຫຼັກໆ ແມ່ນພວກເຮົາອີງໃສ່ຄວາມຕ້ອງການຂອງລູກຄ້າ ແລະ ພ້ອມທີ່ຈະໃຫ້ຄໍາແນະນໍາທີ່ດີທີ່ສຸດໃຫ້ກັບລູກຄ້າ ເພື່ອຄວາມສະບາຍໃຈຂອງຜູ້ຢູ່ອາໄສ.

ແນວໂນ້ມການອອກແບບເມື່ອທຽບລະຫວ່າງອະດີດກັບປັດຈຸບັນເປັນແນວໃດ?

ສໍາລັບເລື່ອງການອອກແບບ ຖືໄດ້ແມ່ນວ່າມີຄວາມແຕກຕ່າງຫຼາຍ ໂດຍເມື່ອກ່ອນ ແມ່ນການເຮັດຕາມແບບທີ່ລູກຄ້າຕ້ອງການ ຫຼື ເອີ້ນວ່າ ມີຕົວຢ່າງມາແລ້ວ ແລະ ເຮັດຕາມ, ສ່ວນປັດຈຸບັນນີ້ ລູກຄ້າຈະໃຫ້ໂຈດມາ ໂດຍທີ່ບອກຂະໜາດຂອງພື້ນທີ່ ແລະ ໃຫ້ພວກເຮົາອອກແບບໃຫ້ ຕາມຄວາມມັກ ແລະ ສະຕາຍທີ່ຕ້ອງການ ລວມເຖິງການຕົບແຕ່ງພາຍໃນທັງໝົດຂອງບ້ານ ເພື່ອໃຫ້ອອກມາກົງກັບຄວາມຕ້ອງການຂອງລູກຄ້າ. ການອອກແບບປັດຈຸບັນ ນັບມື້ນັບມີການພັດທະນາຂຶ້ນເລື້ອຍໆ ທາງທີມຊ້າງລາວພວກເຮົາເອງກໍ່ຕ້ອງໄດ້ພັດທະນາສີມືຕະຫຼອດ ເພື່ອຕອບສະໜອງຄວາມຕ້ອງການຂອງລູກຄ້າ.


ວິບູນ ສິດທິມໍລະດາ (Viboon Sithimolada) ຜູ້ຮ່ວມກໍ່ຕັ້ງ ແລະ ຜູ້ອໍານວຍການ (Co-founder & Director) ໜ້າທີ່ຫຼັກແມ່ນ ຍຸດທະສາດ ແລະ ການປັບປຸງທຸລະກິດ (Business Improvement & Strategy). ນອກຈາກນັ້ນຍັງເປັນຜູ້ບໍລິຫານ (Executive) ຝ່າຍທີ່ປຶກສາວິສະວະກໍາໄຟຟ້າ, ອຸດສາຫະກໍາພະລັງງານ ແລະ ບໍ່ແຮ່, ແລະ ລະບົບການຄຸ້ມຄອງໂຮງງານ.

ມຸມມອງຂອງການພັດທະນາຊ້າງລາວໃນກ້າວຕໍ່ໄປ

ຊ້າງລາວ ຈະສືບຕໍ່ພັດທະນາ ແລະ ຂະຫຍາຍຕົວໄປເທື່ອລະກ້າວ ສອດຄ່ອງກັບວິໄສທັດຂອງພວກເຮົານັ້ນກໍ່ຄື ການສ້າງບໍລິສັດວິສະວະກໍາລາວຮຸ່ນໃໝ່ທີ່ເປັນລະດັບສາກົນ ແລະ ສົ່ງເສີມການ ພັດທະນາວິສະວະກໍາທີ່ມີຄຸນນະພາບໃນລາວ. ເພື່ອບັນລຸວິໄສທັດດັ່ງກ່າວ ຊ້າງລາວ ຈະສືບຕໍ່ສ້າງຜົນງານ ໂປຼຟາຍລ໌ ຂອງບໍລິສັດທີ່ມີຊື່ສຽງສາມາດໄວ້ວາງໃຈໄດ້ ຄຽງຄູ່ກັບການພັດທະນາບຸກຄະລະກອນທີ່ມີຄຸນະພາບ ແລະ ການກໍ່ສ້າງໂຄງການຂະຫນາດໃຫຍ່ ເຊັ່ນ: ໂຮງງານ ແລະ ອາຄານພານິດ ພ້ອມກັນນັ້ນ ກໍ່ມີຍຸດທະສາດ ໃນການຮ່ວມມືກັບ ຄູ່ຮ່ວມທຸລະກິດ ທັງພາຍໃນ ແລະ ຕ່າງປະເທດ ເພື່ອການພັດທະນາໂຄງການໃນລາວ. ພວກເຮົາຍັງຕ້ອງສືບຕໍ່ປັບປຸງລະບົບທຸລະກິດ ແລະ ຂະບວນການການບໍລິຫານ ຂອງພວກເຮົາ ພ້ອມທັງປັບປຸງຍຸດທະສາດທາງທຸລະກິດຢ່າງຕໍ່ເນື່ອງ.

ຂໍ້ມູນເພີ່ມເຕີມ ສໍາລັບລູກຄ້າທີ່ສົນໃຈໃຊ້ບໍລິການ

ທີ່ຢູ່: ບ້ານ ໂພນທັນ, ເມືອງ ໄຊເສດຖາ, ນະຄອນຫຼວງວຽງຈັນ
ຕິດຕາມເພີ່ມຕື່ມໄດ້ທີ່: xanglao.la
Facebook: ຊ້າງລາວຮັບອອກແບບກໍ່ສ້າງ
ເບີໂທຕິດຕໍ່: 020 22 691 887

Nee

The author Nee