close
Cover Story

ປີທ່ອງທ່ຽວ 2018 ໄປໃສແດ່? Visit Laos Year 2018

Untitled-1

ທ່ານຮູ້ແລ້ວບໍ່!!! ປີທ່ອງທ່ຽວລາວ 2018 ໄດ້ເປີດຂຶ້ນ ພ້ອມກັບການເປີດງານບຸນນະມັດສະການພະທາດຫລວງວຽງຈັນ ປະຈໍາປີ 2017 ຜ່ານມາ ທີ່ເດີນດ້ານຫນ້າຮູບປັ້ນຫລໍ່ພະເຈົ້າໄຊເຊດຖາ, ເດີ່ນທາດຫລວງ ໂດຍໄດ້ຮັບກຽດເປັນປະທານເປີດງານ ໂດຍ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ພ້ອມດ້ວຍພັນລະຍາ, ທ່ານ ປະລິນຍາເອກ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ມີບັນດາລັດຖະມົນຕີ, ຮອງລັດຖະມົນຕີ, ທູຕານຸທູດ, ບັນດາແຂກ ທັງພາຍໃນ ແລະ ຕ່າງປະເທດ ເຂົ້າຮ່ວມ ຢ່າງພ້ອມພຽງ.

ການເປີດປີທ່ອງທ່ຽວລາວ 2018 ນັບໄດ້ວ່າເປັນເຫດການທີ່ມີຄວາມຫມາຍ-ຄວາມສໍາຄັນຂອງຊາດ, ເຊິ່ງສະແດງໃຫ້ເຫັນວ່າ: ທົ່ວພັກ-ທົ່ວລັດ, ທົ່ວກອງທັບ ແລະ ທົ່ວປວງຊົນລາວ ໄດ້ພ້ອມພຽງຮຽງຫນ້າ ປະຕິບັດຕາມນະໂຍບາຍ ຂອງລັດຖະບານ ໃນການຈັດປີທ່ອງທ່ຽວລາວ 2018.

ມື້ນີ້ ທີມງານ 108 ພວກເຮົາຂໍເປັນສື່ໜຶ່ງໃນການແບ່ງປັນ ກ່ຽວກັບປີທ່ອງທ່ຽວລາວ. ພວກເຮົາຈະພາທ່ານຜູ້ອ່ານມາຮູ້ຈັກລາຍລະອຽດເພີ່ມເຕີມ ກ່ຽວກັບປີທ່ອງທ່ຽວລາວ 2018 ທີ່ຫຼາຍໆທ່ານຍັງບໍ່ຮູ້ ມາຕິດຕາມວ່າ ປີທ່ອງທ່ຽວ 2018 ນີ້ ມີຫຍັງແດ່? ແລະ ໄປທ່ຽວໃສດີ? ມີຫຍັງປ່ຽນແປງ ມາຕິດຕາມໄປພ້ອມໆກັບພວກເຮົາເລີຍ.

ເປັນຫຍັງຈຶ່ງເປີດປີທ່ອງທ່ຽວ?

ທ່ານ ສາດສະດາຈານ ປະລິນຍາເອກ ບໍ່ແສງຄໍາ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ກ່າວວ່າ: ການທ່ອງທ່ຽວຖືເປັນຂະແຫນງເສດຖະກິດໜຶ່ງ ທີ່ມີການຂະຫຍາຍຕົວຢ່າງວ່ອງໄວ ແລະ ກວ້າງຂວາງ ຢູ່ບັນດາປະເທດໃນທົ່ວໂລກ, ໃນຊຸ່ມປີຜ່ານມາລັດຖະບານ ສປປ ລາວ ໄດ້ຖືເອົາການທ່ອງທ່ຽວເປັນຂະແຫນງບູລິມະສິດໜຶ່ງ ເພື່ອຊຸກຍູ້ເສດຖະກິດ-ສັງຄົມ, ເປັນຂະແຫນງໜຶ່ງທີ່ພາໃຫ້ມີການສະສົມເງິນຕາ ແລະ ມີການຫມູນວຽນພາຍໃນເປັນຢ່າງດີ, ສ້າງວຽກເຮັດງານທໍາແກ່ປະຊາຊົນໃນຂົງເຂດບໍລິການ ແລະ ການຜະລິດ, ເປັນຕົ້ນແມ່ນການຜະລິດກະສິກຳ ແລະ ຫັດຖະກໍາ ຖືເປັນການສົ່ງອອກກັບທີ່ ແລະ ກະຈາຍລາຍໄດ້ລົງສູ່ທ້ອງຖີ່ນ ກໍ່ຄືຊົນນະບົດເຂດຫ່າງໄກ.

ມາຕິດຕາມທິດທາງການທ່ອງທ່ຽວປີ 2018

ປີທ່ອງທ່ຽວ 2018 ໄດ້ກໍານົດທິດທາງໃນການຂະຫຍາຍການທ່ອງທ່ຽວ ທາງທໍາມະຊາດ, ປະຫວັດສາດ ແລະ ວັດທະນະທໍາ ດັ່ງກັບຄໍາຂວັນ ຂອງປີທ່ອງທ່ຽວລາວ 2018 ທີ່ວ່າ: ທ່ອງທ່ຽວເມືອງລາວ ຮຽນຮູ້ປະຫວັດສາດ, ຊື່ນຊົມທໍາມະຊາດ ແລະ ອະນຸລັກສົ່ງເສີມວັດທະນະທໍາ”ການຈັດປີທ່ອງທ່ຽວລາວ 2018 ແມ່ນເປັນກິດຈະກຳທີ່ສໍາຄັນທີ່ສຸດ, ນອກຈາກຈະເປັນການສົ່ງເສີມການທ່ອງທ່ຽວແລ້ວ ຍັງແນໃສ່ສົ່ງເສີມອະນຸລັກວັດທະນະທໍາ ທີ່ເປັນເອກະລັກ ແລະ ຮິດຄອງປະເພນີອັນດີງາມ ຂອງ ສປປ ລາວ ອີກດ້ວຍ, ພ້ອມກັນນັ້ນ ການຈັດປີທ່ອງທ່ຽວລາວ 2018 ຍັງເປັນການສ້າງຄວາມຄຶກຄື້ນເພື່ອຊຸກຍູ້ເສດຖະກິດ ທາງກົງ ແລະ ທາງອ້ອມ ໂດຍສະເພາະແມ່ນບັນດາຫົວຫນ່ວຍທຸລະກິດ ທີ່ປີ່ນອ້ອມໃນຂະແຫນງການທ່ອງທ່ຽວ

ແຫຼ່ງທີ່ມາ: http://www.laostartv.la

ຄວາມພ້ອມ ກັບປີທ່ອງທ່ຽວ 2018

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ ໄດ້ເນັ້ນໜັກໃຫ້ພາກສ່ວນ ແລະ ຂະແໜງການທີ່ກ່ຽວຂ້ອງ ເອົາໃຈໃສ່ຕໍ່ວຽກງານປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມສະອາດຈົບງາມ ໃນສັງຄົມ, ໂດຍສະເພາະ ຕ້ານ ແລະ ສະກັດກັ້ນ ປະກົດການຫຍໍ້ທໍ້ ຂີ້ລັກ, ປຸ້ນຈີ້ຊິງຊັບ, ການກໍ່ອາຊະຍາກຳ ແລະ ປະກົດການຫຍໍ້ທໍ້ອື່ນໆ ທີ່ເປັນພາບພົດບໍ່ດີ, ປັບປຸງພື້ນຖານໂຄງລ່າງ.

ເພື່ອຮອງຮັບການທ່ອງທ່ຽວທີ່ຈຳເປັນ ເຊັ່ນ: ເສັ້ນທາງ, ສະໜາມບິນ, ສະຖານທີ່ທ່ອງທ່ຽວ, ທີ່ພັກ, ຮ້ານອາຫານ, ພາຫະນະຂົນສົ່ງ ແລະ ລະບົບໂທລະຄົມມະນາຄົມ, ພ້ອມການບໍລິການ ທີ່ອຳນວຍຄວາມສະດວກ ດ້ານເອກະສານເຂົ້າ-ອອກ ຂອງນັກທ່ອງທ່ຽວ, ຄ່າທຳນຽມສຳລັບນັກທ່ອງທ່ຽວ, ກວດກາຄືນ ແລະ ປັບປຸງໃຫ້ເໝາະສົມ ກ່ຽວກັບຄ່າບໍລິການ, ຄ່າຜ່ານປະຕູ ຢູ່ແຕ່ລະແຫລ່ງທ່ອງທ່ຽວ ລວມທັງການບໍລິການແຂກ, ໂດຍເນັ້ນໃສ່ຄວາມສະດວກ, ວ່ອງໄວ, ສະອາດ, ປອດໄພ, ຮັກສາໄດ້ວັດທະນະທຳອັນດີງາມຂອງຊາດ ແລະ ຂອງເຜົ່າ. ການນຳໃຊ້ງົບປະມານຕ້ອງບົນພື້ນຖານປະຢັດມັດທະຍັດ, ສົມເຫດສົມຜົນ, ຫລີກເວັ້ນການຟຸມເຟືອຍ, ໂຄສະນາເຜີຍແຜ່, ສ້າງຂະບວນການ ແລະ ຈັດກິດຈະກຳຕ່າງໆ ໃຫ້ມີບັນຍາກາດຟົດຟື້ນ, ມີເນື້ອໃນສັງຄົມຮັບຮູ້ຢ່າງກວ້າງຂວາງ, ສ້າງຄວາມເຊື່ອໝັ້ນ ແລະດຶງດູດນັກທ່ອງທ່ຽວໄດ້ຢ່າງແທ້ຈິງ. ເດັດຂາດບໍ່ໃຫ້ມີກໍລະນີສວຍໂອກາດ ເອົາປຽບນັກທ່ອງທ່ຽວ, ຊຶ່ງວຽກງານທັງໝົດເຫລົ່ານີ້ ແມ່ນເອົາໃຈໃສ່ຊຸກຍູ້ທຸກພາກສ່ວນ ໃນທົ່ວສັງຄົມໃຫ້ມີສ່ວນຮ່ວມຫລາຍຂຶ້ນ.

ແຫຼ່ງທີ່ມາ: https://laopost.com

ຜົນສໍາເລັດວຽກງານທ່ອງທ່ຽວ

ວຽກງານທ່ອງທ່ຽວ ສາມາດຈັດຕັ້ງປະຕິບັດໄດ້ສຳເລັດ ຫລາຍດ້ານເຊັ່ນ:

– ສຳເລັດການສ້າງແຜນ ແມ່ບົດພັດທະນາ ແລະ ຄຸ້ມຄອງເມືອງ ທ່ອງທ່ຽວຜົ້ງສາລີ ແຂວງຜົ້ງສາລີ

– ສຳເລັດການ ສຳຫລວດຈັດສັນ 2 ແຫ່ງ ຢູ່ຖ້ຳປູຄຳ ເມືອງວັງວຽງ ແຂວງວຽງຈັນ ແລະ ເຊພະເຊປອງໄລ ແຂວງ ອັດຕະປື.

ພ້ອມນັ້ນ, ກໍໄດ້ພັດທະນາ ພື້ນຖານໂຄງລ່າງ ສິ່ງອຳນວຍຄວາມສະດວກ ດ້ານການທ່ອງທ່ຽວ ຄື:

– ກໍ່ສ້າງສູນຂໍ້ມູນຂ່າວສານ ການທ່ອງທ່ຽວພູເກືອ ເບີອີ ແຂວງອັດຕະປື

– ປັບປຸງຫ້ອງວາງສະແດງ ວັດຖຸສະໄໝສົງຄາມ ທີ່ ທົ່ງໄຫຫີນແຫ່ງທີ 1 ແຂວງຊຽງຂວາງ

– ກໍ່ສ້າງ ທ່າຈອດເຮືອ ແລະ ຂັ້ນໄດຂຶ້ນ-ລົງ ຂອງນັກທ່ອງທ່ຽວໄດ້ 3 ແຫ່ງ ຢູ່ດອນຄອນ, ດອນເດດ ແລະ ດອນໂຂງ ເຂດມະຫານາທີສີພັນດອນ

– ສ້າງ ແລະ ຮັບຮອງແຜນພັດທະນາການ ທ່ອງທ່ຽວລະດັບພາກທັງ 3 ພາກ ສຳລັບປີ 2016-2020 (ພາກເໜືອ, ພາກກາງ, ພາກໃຕ້), ໄດ້ສ້າງຮ່າງມາດຕະຖານການ ຈັດລະດັບສະຖານທີ່ທ່ອງທ່ຽວ

– ໄດ້ສ້າງແຜນ ພັດທະນາ, ສົ່ງເສີມ ແລະ ຄຸ້ມຄອງຈຸດໝາຍປາຍທາງ ການທ່ອງທ່ຽວຢູ່ 7 ແຂວງ ຄື: ແຂວງ ຫລວງນ້ຳທາ, ອຸດົມໄຊ, ຫລວງພະບາງ, ຊຽງຂວາງ, ບໍລິຄຳໄຊ, ຄຳມ່ວນ, ແຂວງຈຳປາສັກ ແລະ ຢູ່ຕາມແລວ ເສດຖະກິດເໜືອ-ໃຕ້, ເສັ້ນທາງມໍລະດົກ, ເຂດສາມລ່ຽມມໍລະກົດ ແລະ ເສັ້ນທາງເຊື່ອມຕໍ່ ວົງຈອນການທ່ອງທ່ຽວ.

ໃນຂອບເຂດທົ່ວປະເທດ ມີແຫລ່ງທ່ອງທ່ຽວ ທີ່ໄດ້ຄົ້ນພົບ ແລະ ຂຶ້ນບັນຊີແລ້ວ ຈຳນວນ 2.104 ແຫ່ງ, ໃນນັ້ນແຫລ່ງທ່ອງທ່ຽວ ທາງທຳມະຊາດ 1.194 ແຫ່ງ, ວັດທະນະທຳ 628 ແຫ່ງ ແລະ ປະຫວັດສາດ 282 ແຫ່ງ.

ແຫຼ່ງທີ່ມາ: http://www.micat.gov.la (ເວັບໄຊທ໌ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ)

ກິດຈະກໍາທ່ອງທ່ຽວ 2018 ມີຫຍັງແດ່?

ເພື່ອດຶງດູດນັກທ່ອງທ່ຽວຕ່າງປະເທດເຂົ້າມາທ່ຽວຊົມ ສປປ ລາວ ເປັນການໂຄສະນາເຜີຍແຜ່ວັດທະນະທຳອັນດີງາມ ປະຫວັດສາດອັນເປັນມູນເຊື້ອຂອງລາວ ແລະ ຄວາມອຸດົມສົມບູນຮັ່ງມີທາງດ້ານທຳມະຊາດທີ່ສວຍງາມຂອງປະເທດລາວເຮົາແລ້ວ ຍັງມີການໂຄສະນາບຸນປະເພນີຕ່າງໆ ທີ່ບັນດາແຂວງໄດ້ຈັດຂຶ້ນພາຍໃນປີ 2018 ແລະ ໂຄສະນາບັນດາແຫຼ່ງທ່ອງທ່ຽວທີ່ໂດດເດັ່ນຂອງແຕ່ລະແຂວງອີກດ້ວຍ.

ສຳລັບ ກິດຈະກຳສະເຫຼີມສະຫຼອງປີທ່ອງທ່ຽວປະກອບມີ: ກິດຈະກຳສະເຫຼີມສະຫຼອງປີທ່ອງທ່ຽວຢູ່ໃນບັນດາແຂວງມີກິດຈະກຳຕ່າງໆເຊັ່ນ:

  • ບຸນປີໃໝ່ຊົນເຜົ່າກຶມມຸ ແຂວງອຸດົມໄຊ
  • ບຸນເສົາຫຼັກເມືອງ 10 ຊົນເຜົ່າ ແຂວງເຊກອງ
  • ບຸນພະບາດໂພນສັນ ແຂວງບໍລິຄຳໄຊ
  • ບຸນຊົນເຜົ່າ ແຂວງຫຼວງນໍ້າທາ
  • ງານເທສະການດອກງີ້ວບານ ແຂວງບໍ່ແກ້ວ
  • ບຸນຊ້າງ ແຂວງໄຊຍະບູລີ
  • ບຸນວັດພູ ແຂວງຈຳປາສັກ
  • ບຸນພະທາດສີໂຄດ ແຂວງຄຳມ່ວນ
  • ບຸນປີໃໝ່ລາວ ແຂວງຫຼວງພະບາງ
  • ງານສະເຫຼີມສະຫຼອງແກ້ວຫຼັກເມືອງ ແລະ ທ່ຽວຊົມຖ້ຳທ່ານຜູ້ນຳ ແຂວງຫົວພັນ
  • ງານບຸນຊ່ວງເຮືອ ແຂວງສາລະວັນ
  • ບຸນນະມັດສະການພະທາດຫຼວງ ນະຄອນຫຼວງວຽງຈັນ
  • ບຸນຊ່ວງເຮືອເມືອງຂວາ ແຂວງຜົ້ງສາລີ
  • ບຸນພະທາດອີງຮັງ ແຂວງສະຫວັນນະເຂດ
  • ບຸນກິນຈຽງ ແຂວງຊຽງຂວາງ ບຸນກິນຈຽງ (ຫຼັກ 52) ແຂວງວຽງຈັນ ບຸນກິນຈຽງ ແຂວງໄຊສົມບູນ
  • ງານນະມັດສະການພະເຈົ້າໄຊເຊດຖາ ແຂວງອັດຕະປື.

ການເຄື່ອນໄຫວ ແລະ ກິດຈະກຳປິ່ນອ້ອມຢູ່ພາຍໃນປະກອບມີ: ການຈັດຂະບວນຄາລາວານລົດທ່ອງທ່ຽວ ຕາມເສັ້ນທາງແຫຼ່ງທ່ອງທ່ຽວຂອງບາງແຂວງພາກເໜືອ ແລະ ພາກໃຕ້ ການຈັດລາຍການຢ້ຽມຢາມແຫຼ່ງທ່ອງທ່ຽວສຳລັບສື່ມວນຊົນ ແລະ ບໍລິສັດທ່ອງທ່ຽວພາຍໃນ ແລະ ຕ່າງປະເທດ ເພື່ອໂຄສະນາຜະລິດຕະພັນ ແລະ ແຫຼ່ງທ່ອງທ່ຽວອັນໂດດເດັ່ນຂອງ ສປປ ລາວ ໂດຍສະເພາະແມ່ນແຫຼ່ງທ່ອງທ່ຽວປະຫວັດສາດວັດທະນະທຳ ແລະ ທຳມະຊາດ ກິດຈະກຳສະເຫຼີມສະຫຼອງວັນທ່ອງທ່ຽວໂລກ ບຸນມະໂຫລານສິລະປະການສະແດງພື້ນເມືອງບັນດາເຜົ່າ ທົ່ວປະເທດ ໃນງານບຸນນະມັດສະການພະທາດຫຼວງ.

ກິດຈະກຳປິ່ນອ້ອມຢູ່ພາຍໃນທີ່ໄດ້ສະເໜີເຂົ້າເພີ່ມມີຄື: ພິທີໃສ່ບາດໃຫຍ່ ການເຕັ້ນລຳວົງ ແລະ ເຕັ້ນບັດສະຫຼົບ ລາຍການທ່ອງທ່ຽວຂີ່ລົດຖີບອາຊຽນ ການແຂ່ງຂັນລົດຈັກວີບາກ ການແຂ່ງລົດໃຫຍ່ວີບາກ ກິດຈະກຳປີນໜ້າຜາ    ແລະ   ກິດຈະກຳອື່ນໆ.

ສ່ວນລາຍການເຄື່ອນໄຫວ ແລະ ກິດຈະກຳປິ່ນອ້ອມຢູ່ຕ່າງປະເທດ ປະກອບມີ: ຈັດງານວັນລາວ ໃນງານ ATF 2018 ຢູ່ຊຽງໃໝ່ ປະເທດໄທ, ຈັດງານ Cocktail ຢູ່ ITB Berlin 2018 ປະເທດເຢຍລະມັນ, ງານວາງສະແດງທ່ອງທ່ຽວສາກົນ SMT ຢູ່ປາຣີປະເທດຝຣັ່ງ, ຈັດງານວັນລາວ ທີ່ງານ Lao Festival ທີ່ໂຕກຽວ ປະເທດຍີ່ປຸ່ນ, ຈັດງານວັນລາວ ໃນງານ ITE HCM ຢູ່ປະເທດຫວຽດນາມ ແລະ ງານວາງສະແດງທ່ອງທ່ຽວສາກົນ WTM ຢູ່ດອນລອນ ປະເທດອັງກິດ.

ແຫຼ່ງທີ່ມາ: https://www.vientianemai.net

ປີ 2018 ຍົກເລີກ Visa ອໍານວຍຄວາມສະດວກສໍາລັບນັກທ່ອງທ່ຽວ

ປັດຈຸບັນ ສປປ ລາວ ໄດ້ເຊັນສັນຍາ ຍົກເວັ້ນວີຊ່າສອງຝ່າຍ ໃຫ້ກັບ 45 ປະເທດ ແລະ ຍົກເວັ້ນວີຊ່າ ຝ່າຍດຽວກັບ 4 ປະເທດ ຄື: ສ.ເກົາຫລີ, ຍີ່ປຸ່ນ, ລຸກຊໍາບວກ, ສະວິດເຊີແລນ.ເພື່ອເປັນການສະໜອງຕາມນະໂຍບາຍ “ເປີດປີທ່ອງທ່ຽວ 2018” ຂອງລັດຖະບານລາວ ໃຫ້ບັນລຸເປົ້າໝາຍ ແລະ ມີຄວາມຄຶກຄື້ນ, ລັດຖະບານ ໄດ້ເຫັນດີອະນຸມັດ ໃຫ້ຍົກເວັ້ນວີຊ່າຝ່າຍດຽວ (ຍົກເວັ້ນແບບບໍ່ຕິດວີຊ່າ ສະຕິກເກີ້ໃສ່ໜັງສືຜ່ານແດນ) ໃຫ້ແກ່ພົນລະເມືອງ ທີ່ຖືໜັງສື່ຜ່ານແດນທໍາມະດາຂອງປະເທດ: Denmark, Norway, Sweden ແລະ Finland ທີ່ຈະເດີນທາງເຂົ້າ-ອອກຕັ້ງແຕ່ 1/1/2018 – 31/12/2018 (ສະເພາະປີທ່ອງທ່ຽວລາວ 2018) ໂດຍກໍານົດພັກເຊົາ 15 ວັນ.

ແຫຼ່ງທີ່ມາ: ສໍານັກຂ່າວສານປະເທດລາວ

ເປົ້າໝາຍປີທ່ອງທ່ຽວ

ຊຸກຍູ້ສົ່ງເສີມການທ່ອງທ່ຽວລາວດ້ວຍ 3 ປະການຫລັກຄື: ທ່ອງທ່ຽວທຳມະຊາດ, ວັດທະນະທຳ ແລະ ປະຫວັດສາດໃຫ້ມີການຂະຫຍາຍຕົວຢ່າງແຂງແຮງ, ຕໍ່ເນື່ອງ, ສີຂຽວ ແລະ ຍືນຍົງ, ມີພື້ນຖານໂຄງລ່າງດ້ານທ່ອງທ່ຽວທີ່ດີ, ມີສິ່ງຮອງຮັບທີ່ມີມາດຕະຖານແລະ ສວຍງາມ, ສະໜອງການບໍລິການດ້ານການທ່ອງທ່ຽວທີ່ຫລາກຫລາຍ ເພື່ອມີຫລາຍທາງເລືອກ ແລະ ສ້າງຄວາມພໍໃຈໃຫ້ຜູ້ມາຢ້ຽມຢາມທ່ອງທ່ຽວ. ພ້ອມໄດ້ເອົາໃຈໃສ່ໂຄສະນາດຶງດູດນັກທ່ອງທ່ຽວ ໂດຍສະເພາະນັກທ່ອງທ່ຽວທີ່ມີລາຍຈ່າຍສູງໃຫ້ກວມເອົາອັດຕາສ່ວນເພີ່ມຂຶ້ນໃນແຕ່ລະປີ, ຊຸກຍູ້ສົ່ງເສີມການທ່ອງທ່ຽວພາຍໃນ “ລາວທ່ຽວລາວ” ໃຫ້ແຂງແຮງ, ເພື່ອຫລຸດຜ່ອນການຮົ່ວໄຫລຂອງເງິນຕາອອກໄປຕ່າງປະເທດ, ເຮັດໃຫ້ການທ່ອງທ່ຽວເປັນຂະແໜງສ້າງລາຍຮັບເງິນຕາຕ່າງປະເທດໃຫ້ນັບມື້ຫລາຍຂຶ້ນ, ນອກຈາກນີ້, ຍັງໄດ້ປະກອບສ່ວນສ້າງວຽກເຮັດງານທຳໃຫ້ແກ່ສັງຄົມ ແລະ ຊ່ວຍຫລຸດຜ່ອນຄວາມທຸກຍາກ, ດຶງດູດການລົງທຶນຈາກພາຍໃນ ແລະ ຕ່າງປະເທດເຂົ້າໃນການພັດທະນາການທ່ອງທ່ຽວແລະ ຂະແໜງການທີ່ຕິດພັນກັບການທ່ອງທ່ຽວ.

ແຫຼ່ງທີ່ມາ: http://www.laophattananews.com

ບ້ານເຮົາມີສະຖານທີ່ທາງ ການທ່ອງທ່ຽວ ທາງທໍາມະຊາດ, ປະຫວັດສາດ ແລະ ວັດທະນະທໍາເປັນທີ່ສົນໃຈຂອງຕ່າງຊາດ ດ້ວຍຄວາມອຸດົມສົມບູນມີເອກະລັກສະເພາະໂດດເດັ່ນມາຮ່ວມກັນສົ່ງເສີມການທ່ອງທ່ຽວ ຮັກສາວັດທະນາທໍາຕາມຮອຍປະຫວັດສາດຮ່ວມກັນ, ອອກໄປທ່ຽວສໍາພັດ ແລະ ຮຽນຮູ້ວັດທະນະທໍາຂອງຄົນຕ່າງຖີ່ນນໍາກັນ ຮ່ວມກັນ “ທ່ອງທ່ຽວເມືອງລາວ ຮຽນຮູ້ປະຫວັດສາດ, ຊື່ນຊົມທໍາມະຊາດ ແລະ ອະນຸລັກສົ່ງເສີມວັດທະນະທໍາ” ແລະ ຢ່າລືມມາແບ່ງປັນຮູບງາມໆ ປີທ່ອງທ່ຽວ 2018 ເພື່ອສົ່ງເສີມການທ່ອງທ່ຽວລາວ ໃຫ້ເຂັ້ມແຂງຂຶ້ນກວ່າເກົ່າ.

Nee

The author Nee