close
Cover Story

ສະກາຍ ທ່າແຂກ

POK

“ ໄວໜຸ່ມຍຸກໃໝ່ ໃສ່ໃຈການສຶກສາ” 

ເປັນຄໍາຂວັນ ໄວໜຸ່ມຍອດຮິດ ທີ່ເປັນຄະຕິເຕືອນໃຈ ແລະ ສອນໄວໜຸ່ມໃຫ້ໝັ້ນສຶກສາຮໍ່າຮຽນ ເພີ່ມຄວາມຮູ້, ແຕ່ແນ່ນອນ ຍຸກນີ້ໄຮ້ຂອບເຂດ ການສຶກສາ ບໍ່ໄດ້ຖືກຈໍາກັດສະເພາະພາຍໃນຫ້ອງຮຽນເທົ່ານັ້ນ ທຸກຄົນ ສາມາດຊອກຮູ້ໄດ້ຕະຫຼອດເວລາ ຈາກສິ່ງທີ່ໃກ້ໂຕ ແລ້ວສ້າງສິ່ງດີໆຫຼາຍກວ່າທີ່ຄິດ. ຫຼັງຈາກປີໃໝ່ເຂົ້າມາ ວາລະສານ 108 ພວກເຮົາເອງ ກໍ່ຢາກມີສ່ວນໃນການສົ່ງເສີມ ສິ່ງດີໆ ຂອງກຸ່ມໄວໜຸ່ມແບບຢ່າງ ໃຫ້ກັບຜູ້ອ່ານໄດ້ ຕິດຕາມ ແລະ ສໍາລັບໄວໜຸ່ມອີກຫຼາຍໆຄົນ ທີ່ຍັງບໍ່ຮູ້ວ່າ ຈະເລີ່ມຕົ້ນວາງແຜນແບບໃດ ລອງມາຕິດຕາມເລື່ອງເລົ່າຂອງໄວໜຸ່ມກຸ່ມນີ້ ເພື່ອຈະເປັນແນວທາງຕໍ່ໄປ.
ມື້ນີ້ ພວກເຮົາຈະພາທຸກຄົນ ມາຮູ້ຈັກກັບ SKY Thakhek ກຸ່ມໄວໜຸ່ມດັງໃນ youtube ຕອນນີ້ ທີ່ໃຜໆກໍ່ຮູ້ຈັກ, ແຕ່ຜູ້ອ່ານຮູ້ແລ້ວບໍ່ ກ່ອນຈະມາເປັນ SKY Thakhek ໃນທຸກມື້ນີ້ ທຸກຄົນໃນກຸ່ມໄດ້ຜ່ານຫຍັງມາແດ່? ເຄັດລັບດີໆ ທີ່ທ່ານຈະໄດ້ຮັບຈາກໄວໜຸ່ມກຸ່ມນີ້ ຂໍບອກວ່າ ບໍ່ທໍາມະດາແນ່ນອນ. ມາຕິດຕາມບົດສຳພາດ ແລະ ຮູ້ຈັກກັບທຸກຄົນກັນເລີຍປັດຈຸບັນທຸກຄົນ ກຳລັງສຶກສາຢູ່ມະຫາວິທະຍາໄລແຫ່ງຊາດ ຄະນະວິທະຍາສາດສັງຄົມ ປີທີ 4

ແນະນໍາໃຫ້ຮູ້ຈັກ SKY Thakhek ເຮັດກ່ຽວກັບຫຍັງແດ່?

ສະກາຍ ທ່າແຂກ ເປັນກຸ່ມຄົນທີ່ເຮັດຄຣິບເພື່ອຄວາມບັນເທີງໃນ Facebook ຈະເປັນຄຣິບ Cover ເພງ, ສະທ້ອນສັງຄົມ, ວິທີເອົາຕົວລອດໃນສະຖານະການຕ່າງໆ, ສຳພາດຄວາມຄິດເຫັນຂອງໄວໜຸ່ມ ແລະ ອື່ນໆ

ປະຫວັດຄວາມເປັນມາ ຂອງ SKY Thakhek ທີ່ເຮັດໃຫ້ສ້າງ Video

ສະກາຍ ທ່າແຂກ ໄດ້ເລີ່ມຕົ້ນສ້າງຕັ້ງຂຶ້ນມາແຕ່ປີ 2011 ສະໄໝນັ້ນພວກເຮົາໃຊ້ກ້ອງໂທລະສັບຖ່າຍເຊິ່ງຄຣິບທໍາອິດແມ່ນ: Cover ເພງ ກັດເຂົ້າສູ້ ຂອງ ອ້າຍເຈ້ຍແລ້ວໄດ້ເຜີຍແຜ່ລົງໃນ ເວັບໄຊທ໌ ຢູທູບ ເພາະສະໄໝນັ້ນ Facebook ຍັງບໍ່ເປັນທີ່ນິຍົມເທື່ອ ແລະ ຍັງບໍ່ສາມາດ ເຜີຍແຜ່ຄຣິບລົງໃນ facebook ໄດ້ເທື່ອ. ສະໄໝນັ້ນພວກເຮົາຕ້ອງໄດ້ໄປອັບໂຫຼດຄຣິບຢູ່ຮ້ານອິນເຕີເນັດ ເພາະ 3G ຫຼືວ່າ Wifi ຍັງບໍ່ນິຍົມເພາະມັນມີມູນຄ່າທີ່ສູງ. ເມື່ອພວກເຮົາໄດ້ເຜີຍແຜ່ຄຣິບອອກໄປໃນຢູທູບກໍ່ມີຄົນໃຫ້ຄວາມສົນໃຈ. ແຕ່ສິ່ງທີ່ເຮັດໃຫ້ພວກເຮົາມີກໍາລັງໃຈເຮັດຄຣິບມາເລື່ອຍໆກໍ່ຍ້ອນວ່າ ຄຣິບທີ່ພວກເຮົາເຮັດຄຣິບທຳອີດແມ່ນໄດ້ມີການສົ່ງຕໍ່ຜ່ານ Bluetooth ຂອງໂທລະສັບຢ່າງຫຼວງຫຼາຍ ເຮັດໃຫ້ຄົນຢູ່ໃນພື້ນທີ່ນັ້ນເລີ່ມຮູ້ຈັກຊື່ ສະກາຍ ທ່າແຂກ.

ທຸກຄົນໃນທີມມາລວມຕົວກັນໄດ້ແນວໃດ?

ຍ້ອນເວລາກັບໄປ ຕັ້ງແຕ່ເລີ່ມຕົ້ນແມ່ນ ພວກເຮົາເປັນໝູ່ຮຽນຢູ່ຫ້ອງດຽວກັນ ເຊິ່ງທີມພວກເຮົາກໍ່ຈະມີຢູ່ 15 ຄົນ ມື້ໜຶ່ງພວກເຮົານັ່ງຫຼິ້ນ ເບິ່ງໂທລະພາບລາວເຫັນເອັມວີ ເພງລາວ ເລີຍໄດ້ແຮງບັນດານໃຈ ຢາກຈະເປັນແບບເຂົາເຈົ້າໃນເອັມວີເພງ, ຢາກມີຊື່ສຽງ (ຮ່າຮ່າ). ປັດຈຸບັນສະມາຊິກໃນທີມກໍ່ເລີ່ມແຍກຕົວໄປເຮັດຕາມຄວາມຝັນຂອງແຕ່ລະຄົນ ແຕ່ກໍ່ຍັງເປັນ ສະກາຍ ທ່າແຂກ ຄືເກົ່າ ຖ້າຫາກວ່າໃຜມີເວລາກໍ່ມາຮ່ວມເຮັດຄຣິບນຳກັນຕາມປົກກະຕິ

ເປົ້າໝາຍ ຫຼື ແນວທາງຂອງ SKY Thakhek

ສິ່ງສໍາຄັນແມ່ນ ເຮັດໃນສິ່ງທີ່ມັກ ແລະ ສ້າງຄວາມສຸກໃນເວລາທີ່ຄົນອື່ນເບິ່ງຄຣິບພວກເຮົາ ເພາະພວກເຮົາຄິດສະເໝີວ່າ:

“ ຄວາມສຸກຂອງເຈົ້າ ຄືຄວາມຕ້ອງການຂອງເຮົາ ”

ຕອນນີ້ SKY Thakhek ເຮັດຫຍັງແດ່?

– ຮັບຖ່າຍຮູບ
– ພິທີກອນ
– ຖ່າຍໂຄສະນາສິນຄ້າ

ແບ່ງປັນ ການສ້າງ Video ເລີ່ມຕົ້ນແນວໃດ?

ສຳລັບ ໃຜທີ່ຢາກຈະສ້າງວີດີໂອ ຫຼັກໆແມ່ນເວົ້າເລື່ອງໃຈມັກຮັກ ຕ້ອງໄດ້ອົດທົນກັບຄຳຕິຊົມຂອງຜູ້ຊົມເປັນພິເສດ, ບາງຄັ້ງມັນອາດຈະທຳຮ້າຍຈິດໃຈເຮົາ ແຕ່ທາງກັບກັນຫາກນໍາເອົາຄໍາເຫຼົ່ານັ້ນມາປັບປຸງແກ້ໄຂ ຈະກາຍເປັນການພັດທະນາທີ່ດີຂຶ້ນ, ຄົນເຮົາທຸກຄົນຕ່າງຄົນກໍ່ຕ່າງມີຄວາມຄິດຂອງໃຜມັນ ຈະໃຫ້ຄິດຄືກັນທຸກຄົນ ບໍ່ສາມາດຈະເປັນໄປໄດ້ ດັ່ງນັ້ນ ຈົ່ງຄິດ ແລະ ລົງມືເຮັດ ສູ້ກັບບັນຫາ ແລ້ວສັງຄົມຈະເຫັນສິ່ງດີໆ ທີ່ພວກເຮົາເຮັດແນ່ນອນ.

ສາມາດສ້າງລາຍຮັບມາຈາກທາງໃດໄດ້ແດ່?

ຫຼັງຈາກທີ່ເລີ່ມຕົ້ນຈາກສິ່ງທີ່ພວກເຮົາມັກ ປັດຈຸບັນ ພວກເຮົາສາມາດພັດທະນາ ແລະ ສ້າງລາຍຮັບຈາກ ການຜະລິດຄຣິບໂຄສະນາ, ງານພິທີກອນ, ຖ່າຍຮູບເຊິ່ງເປັນການສ້າງຈາກສິ່ງທີ່ມັກຕໍ່ຍອດຂຶ້ນມາ ໄວໜຸ່ມຫຼາຍໆຄົນ ກໍ່ສາມາດສ້າງໄດ້ເຊັ່ນດຽວກັນ ມີແຕ່ວ່າ ມື້ນີ້ ເລີ່ມແລ້ວບໍ່? ກວ່າຈະໄດ້ມາບໍ່ແມ່ນສິ່ງທີ່ງ່າຍ ແຕ່ຈົ່ງເຊື່ອໝັ້ນ ແລະ ພັດທະນາເລື້ອຍໆ ສີມືຈະດີຂຶ້ນ ເຊັ່ນດຽວກັບພວກເຮົາ.

ສິ່ງທ້າທາຍ ແລະ ອຸປະສັກຂອງທີມ ກ່ອນຈະກາຍມາເປັນ SKY Thakhek ທີ່ມີຍອດຄົນຕິດຕາມຫຼາຍທຸກມື້ນີ້?

  • ສິ່ງທ້າທາຍ:

ແຕ່ລະຄົນພາຍໃນທີມບໍ່ເຄີຍມີຄວາມຮູ້ສະເພາະດ້ານມາກ່ອນອາໃສຊອກຫາຄວາມຮູ້ຜ່ານ Youtube ແລະ ຫາປຶກສາຄົນທີ່ມີຄວາມຮູ້ມາບວກກັບລອງຜິດລອງຖືກ ເຊິ່ງເປັນເລື່ອງຍາກຢູ່ ກວ່າຈະກາຍມາເປັນຄືທຸກມື້ນີ້ ຫາກຫຼາຍທ່ານ ທີ່ຕິດຕາມພວກເຮົາມາ ຈະເຫັນໄດ້ຢ່າງຊັດເຈນ ວ່າແຕ່ລະຊ່ວງເວລາ ພວກເຮົາຈະມີການພັດທະນາຂຶ້ນ ເພາະຮຽນຮູ້ ແລະ ປັບປຸງ.

  • ອຸປະສັກ:

ຄວາມເຂົ້າໃຈເຊິ່ງກັນ ແລະ ກັນພາຍໃນທີມ ບໍ່ແມ່ນເລື່ອງງ່າຍ ເມື່ອຫຼາຍຄົນມາລວມຕົວກັນ, ຄຳຕິຊົມ ຫຼື ຫາງສຽງຈາກບາງບຸກຄົນທີ່ຍັງບໍ່ເຂົ້າໃຈໃນຈຸດປະສົງທີ່ພວກເຮົາເຮັດ ເຮັດໃຫ້ບາງຄັ້ງ ພວກເຮົາກໍ່ທໍ້ ແຕ່ແນ່ນອນ ທໍ້ໄດ້ແຕ່ບໍ່ຖອຍ.

ໄວໜຸ່ມທຸກມື້ນີ້ ແຕກຕ່າງຈາກ ໄວໜຸ່ມໃນເມື່ອກ່ອນແນວໃດ?

ໄວໜຸມທຸກມື້ນີ້ມັກຈະນຳໃຊ້ Social ເປັນສື່ກາງໃນການນໍາສະເໜີເລື່ອງລາວຕ່າງໆ, ມັກຈະຊອກຫາສິ່ງໃໝ່ໆ ເຊິ່ງເຮັດໃຫ້ ພວກເຮົາພັດທະນາໄດ້ໄວ ແລະ ອາດຈະໄວກວ່າເມື່ອກ່ອນຫຼາຍ, ທຸກຢ່າງຫາກໃຊ້ຖືກວິທີ ຈະສ້າງສິ່ງດີໆ ໃຫ້ກັບຕົນເອງ ແລະ ສັງຄົມຢ່າງແນ່ນອນ.

ເຄັດລັບແນະນໍາ ການສ້າງ Video ສໍາລັບໄວໜຸ່ມທີ່ຢາກສ້າງ ເລີ່ມຕົ້ນແນວໃດ?

  • ຄິດ ແລະ ລົງມືປະຕິບັດ:

ບໍ່ຕ້ອງຄິດວ່າ ຂ້ອຍບໍ່ມີກ້ອງດີໆ, ຄອມເຈັງໆ, ໄມສຽງຄັກໆ ຖ້າຄິດແນວນັ້ນກໍ່ຈະບໍ່ໄດ້ເລີ່ມຈັກເທື່ອ. ທຸກມື້ໂລກພວກເຮົາພັດທະນາໄປໄກແລ້ວ ມີໂທລະສັບໜ່ວຍໜຶ່ງ ບວກກັບ ໄອເດຍ ກໍ່ສາມາດເຮັດວີດີໂອໄດ້ແລ້ວ, ຖ້າ content ເຮົາດີ ແລ້ວທຸກສິ່ງທຸກຢ່າງຈະຕາມມານຳຫຼັງ.

  • ພິເສດ:

ຂໍພຽງໃຈມັກ ທຸກມື້ນີ້ຄວາມຮູ້ມີຢູ່ເຕັມໂທລະສັບທີ່ເຮົາຫຼິ້ນຕ່າງແຕ່ວ່າຈະໃຊ້ໄປໃນທາງໃດ ເພາະທຸກມື້ນີ້ຄິດຫຍັງບໍ່ອອກຄິດຫາ Google (ຮ່າຮ່າ) ເພາະມັນຄືຄຳຕອບ.

ຝາກໃຫ້ຜູ້ອ່ານຕິດຕາມ ຜົນງານຂອງ SKY Thakhek

ຕ້ອງຂໍຂອບໃຈສຳລັບຜູ້ທີ່ຕິດຕາມພວກເຮົາມາຕະຫຼອດ ແລະ ຂໍຂອບໃຈຜູ້ທີ່ອ່ານບົດຄວາມຂອງພວກເຮົາໃນຕອນນີ້ ພວກເຮົາຮູ້ສຶກດີໃຈ ແລະ ຍິນດີທີ່ໄດ້ແບ່ງປັນປະສົບການຂອງພວກເຮົາຕະຫຼອດ 7 ປີທີ່ຜ່ານມາ ຫວັງວ່າຈະເປັນປະໂຫຍດໃຫ້ແກ່ຄົນທີ່ກໍາລັງຢາກຈະເຮັດວີດີໂອຄືພວກເຮົາບໍ່ຫຼາຍກໍໜ້ອຍ.

ສຸດທ້າຍນີ້ຂໍຝາກຊ່ອງທາງການຕິດຕາມຜົນງານຂອງພວກເຮົາໄດ້ທີ່
Facebook.com/sky thakhek – ສະກາຍ ທ່າແຂກ
Youtube.com/sky thakhek

 

ສໍາລັບລູກຄ້າທີ່ສົນໃຈຢາກໃຫ້ທີມສ້າງ video ໃຫ້
ສາມາດຕິດຕໍ່ໄດ້ຕິດຕໍ່ໄດ້ທີ່
sky thakhek – ສະກາຍ ທ່າແຂກ
skythakhek27@gmail.com
020 95516623

Nee

The author Nee