close
Cover Story

BAKERY BY BORIS

FLK_6495

ຫຼາຍໆຄໍາຖາມ ຂອງນັກຮຽນທີ່ກໍາລັງຈົບມັດທະຍົມໃໝ່ ຈະໄດ້ຮຽນຫຍັງດີ, ອານາຄົດຈະເຮັດວຽກຫຍັງ? ແລ້ວຄໍາຕອບທີ່ໄດ້ສ່ວນໃຫຍ່ “ຮຽນໃນສິ່ງທີ່ມັກ ແລ້ວມາເຮັດໃນສິ່ງທີ່ມັກ” ແລ້ວເຮົາຈະຮູ້ໄດ້ແນວໃດວ່າຕົນເອງມັກຫຍັງກັນແທ້ ຄວາມສາມາດຂອງຕົນເອງມີຫຍັງແດ່?, ການຈະຫາຄໍາຕອບນີ້ ບໍ່ແມ່ນເລື່ອງງ່າຍ ສໍາລັບຫຼາຍໆຄົນເລີຍ. ແລ້ວຖ້ານ້ອງໆ ບໍ່ແມ່ນນັກຮຽນເກັ່ງ ເລກ, ຟີຊິກ, ເຄມີ, ພາສາລາວ ຫຼື ເກັ່ງແຕ່ວິຊາເຫຼົ່ານີ້ ສາມາດເຮັດຫຍັງໄດ້ແດ່? ແລ້ວຈະຫາຄໍາຕອບ ທີ່ເປັນໂຈດຍາກຂອງເສັ້ນທາງເລີ່ມຕົ້ນອານາຄົດໄດ້ແນວໃດ. ມື້ນີ້ ທີມງານພວກເຮົາໄດ້ຮັບກຽດຈາກ ອ້າຍ ໂບຣິສ ຫຼວງໂຄດ ເຈົ້າຂອງ Brand Bakery by Boris ເຈົ້າຂອງທຸລະກິດຂອງຫວານ ໂດຍສະເພາະແມ່ນເຄັກ ທີ່ບໍ່ວ່າທ່ານຈະໄປໃສ ກໍ່ເຫັນສິນຄ້າຂອງເພີ່ນ, ມື້ນີ້ເພີ່ນຈະມາເລົ່າເຖິງຈຸດເລີ່ມຕົ້ນ ແລະ ຂໍ້ແນະນໍາ ການເລືອກອາຊີບ ແບບວິທີຂອງເພີ່ນ ເພື່ອຈະເປັນແນວທາງ ໃຫ້ໄວໜຸ່ມ ໄດ້ເອົາເປັນແບບຢ່າງ. ຈະເປັນແນວໃດນັ້ນມາຕິດຕາມ ເພື່ອຈະຊ່ວຍຫາຫາຄໍາຕອບຂອງຕົນເອງໄດ້ງ່າຍຂຶ້ນ.

ອ້າຍ ໂບຣິສ ຫຼວງໂຄດ ເຈົ້າຂອງ Brand Bakery by Boris ຜູ້ຫຼົງໄຫຼໃນອາຊີບເຮັດ bakery ມາຫຼາຍກວ່າ 10 ປີ ເລີ່ມຕົ້ນເຮັດທຸລະກິດ bakery ຈາກການສົ່ງໃຫ້ຮ້ານກາເຟຫຼາຍໆຮ້ານໃນນະຄອນຫຼວງ ແລະ ປັດຈຸບັນແມ່ນເປີດຮ້ານເປັນຂອງຕົນເອງ ຮ້ານ Bakery by Boris.

ຈຸດເລີ່ມຕົ້ນ ເປັນຫຍັງຈຶ່ງເລືອກຂອງຫວານ?

ກ່ອນອື່ນໝົດຕ້ອງຂໍເລົ່າຍ້ອນຄືນ ກັບໄປຕອນມັດທະຍົມປາຍ ຫຼັງຈາກຮຽນຈົບອ້າຍໄດ້ມີໂອກາດລອງຝຶກງານຢູ່ໂຮງແຮມ Lao Plaza ເຊິ່ງເປັນຈຸດເລີ່ມຕົ້ນຂອງອາຊີບນີ້ກໍ່ວ່າໄດ້. ໂດຍທໍາອິດຕອນຝຶກງານແມ່ນໄດ້ລອງເຮັດອາຫານຫຼາຍໆແບບເຊັ່ນ: ອາຫານເອີຣົບ, ອາຫານຍີ່ປຸ່ນ, ອາຫານຝຣັ່ງ ເພື່ອລອງເບິ່ງວ່າຕົນເອງມັກອາຫານປະເພດໃດ ແຕ່ທັງໝົດທີ່ລອງໄປ ຍັງບໍ່ເຫັນວ່າຈະມັກປະເພດໃດເປັນພິເສດ ສຸດທ້າຍແມ່ນມາລອງເຮັດປະເພດຂອງຫວານ ເຂົ້າໃຈເລີຍວ່າ ນີ້ແມ່ນສິ່ງທີ່ກໍາລັງຕາມຫາ ເຫັນເຖິງມົນສະເໜ່ຂອງອາຫານຫວານ ເພາະເມື່ອໄດ້ກິນແລ້ວເຮັດໃຫ້ມີຄວາມສຸກ.

“ຄວາມຝັນຂອງຫຼາຍໆຄົນ ແມ່ນການໄດ້ນຸ່ງເສື້ອສູດ ຜູກເນັກໄທ ເຮັດວຽກນັ່ງຢູ່ຫ້ອງການ ແຕ່ສໍາລັບ ອ້າຍແມ່ນ ຊຸດພໍ່ຄົວ ແມ່ນຊຸດທີ່ມີສະເໜ່ທີ່ສຸດ”

ຫຼັງຈາກຈົບການຝຶກງານ ອ້າຍໄດ້ບອກກັບພໍ່ຄົວວ່າ: “ອານາຄົດຈະໃສ່ຊຸດພໍ່ຄົວແບບນີ້!!!” ນັ້ນແມ່ນເປົ້າໝາຍດຽວ ທີ່ເລີ່ມຕົ້ນອາຊີບນີ້.ເມື່ອມີເປົ້າໝາຍຢາກເປັນ chef ຂອງຫວານ ອ້າຍໄດ້ໄປຮຽນຕໍ່ bakery ຢູ່ປະເທດຝຣັ່ງ, ລືມແນະນໍາ ອ້າຍເກີດຢູ່ຝຣັ່ງ ແລະ ມາໃຫຍ່ຢູ່ລາວ. ແຕ່ມັນບໍ່ແມ່ນເລື່ອງງ່າຍ ກັບການທີ່ຈະໄປຮຽນຢູ່ຫັ້ນ ເພາະບໍ່ຮູ້ພາສາຝຣັ່ງ ຕ້ອງໄດ້ເລີ່ມຕົ້ນຮຽນພາສາຢ່າງໜັກ ແລະ ພະຍາຍາມຮຽນຮູ້ກ່ຽວກັບການເຮັດຂອງຫວານຢ່າງຕັ້ງໃຈເພາະແມ່ນສິ່ງທີ່ມັກ ຈຶ່ງບໍ່ຍາກເກີນຄວາມສາມາດ.
ຫຼັງຈາກຮຽນຈົບ ອ້າຍໄດ້ຕັດສິນໃຈເຮັດວຽກຢູ່ຮ້ານອາຫານຢູ່ຝຣັ່ງ ເພື່ອຝຶກຊ້ອມ ແລະ ພັດທະນາສີມືຕົນເອງ ໄລຍະໜຶ່ງ ເພື່ອໃຫ້ຕົນເອງມີປະສົບການ, ເມື່ອພ້ອມແລ້ວ ຈຶ່ງຕັດສິນໃຈກັບມາລາວ ເພື່ອນໍາໃຊ້ເອົາຄວາມຮູ້ທີ່ມີດ້ານຂອງຫວານ ກັບມາລາວ ໂດຍມີເປົ້າໝາຍສົ່ງຕໍ່ຄວາມສຸກໃຫ້ກັບລູກຄ້າ.
ຂ້າພະເຈົ້າຄິດວ່າ “ຄວາມພະຍາຍາມ ແມ່ນວິທີດຽວທີ່ເຮັດໃຫ້ປະສົບຜົນສໍາເລັດ” ແນ່ນອນວ່າ ທຸກສິ່ງທຸກຢ່າງຕ້ອງພົບກັບອຸປະສັກຢູ່ແລ້ວ ແຕ່ເມື່ອເຮົາມີຄວາມຕັ້ງໃຈ ແລະ ພະຍາຍາມ ບັນຫາຕ່າງໆ ຈະກາຍມາເປັນຄວາມຮູ້ ແລະ ປະສົບການດີໆ.

ຈຸດເລີ່ມຕົ້ນກ່ອນຈະມາເປີດຮ້ານ?

ຫຼັງຈາກກັບມາປີ 2013 ອ້າຍເຫັນວ່າເລື່ອງ bakery ຢູ່ບ້ານເຮົາຕອນນັ້ນແມ່ນຍັງບໍ່ມີຫຼາກຫຼາຍ ແລະ ມີອີກຫຼາຍໆຢ່າງທີ່ຢາກນໍາສະໜີ ເລີຍນໍາເອົາ bakery ແບບໃໝ່ມາ ໃຫ້ຄົນລາວໄດ້ຊິມ ໂດຍເລີ່ມຈາກເຮັດເຂົ້າໜົມສົ່ງໃຫ້ໂຮງຮຽນ. ຫຼັງຈາກນັ້ນ ແມ່ນເລີ່ມຂະຫຍາຍອອກ ສົ່ງຕາມຮ້ານກາເຟ ແລະ ມາຮອດຈຸດໜຶ່ງ ເກີດຄໍາຖາມວ່າ ເປັນຫຍັງເຮົາຈຶ່ງບໍ່ເຮັດ bakery ໃນແບບຂອງຕົນເອງ ແລະ ລູກຄ້າຫຼາຍໆຄົນກໍ່ມັກຈະຖາມວ່າ ຮ້ານຢູ່ໃສ? ຈຶ່ງກາຍເປັນຈຸດເລີ່ມຕົ້ນຂອງການເປີດຮ້ານຕົນເອງ ເພື່ອໃຫ້ຄົນຮູ້ຈັກແບຣນຂອງພວກເຮົາຫຼາຍຂຶ້ນ. ຮ້ານ Bakery by Boris ພວກເຮົາເລີ່ມເປີດ 13 ເດືອນ 2 ປີ 2017 ໄດ້ຮັບການຕອບຮັບເປັນຢ່າງດີ, ຈາກເມື່ອກ່ອນທີ່ພວກເຮົາປິດຮ້ານ ໜຶ່ງມື້ ແຕ່ມີລູກຄ້າຫຼາຍໆທ່ານຮຽກຮ້ອງມາ ປັດຈຸບັນແມ່ນເປີດຮ້ານທຸກໆມື້ ບໍ່ມີມື້ປິດ ລູກຄ້າສາມາດເຂົ້າມາຊິມເຄັກສົດໃໝ່ ໄດ້ທຸກມື້.

ແນະນໍາ Bakery by Boris ມີຫຍັງແດ່

  • ຮ້ານຂອງພວກເຮົາມີເຄັກ ຫຼາຍກວ່າ 10 ຢ່າງ ໃຫ້ລູກຄ້າໄດ້ເລືອກ ຕາມຄວາມມັກຂອງແຕ່ລະທ່ານ
  • ພິເສດ ຮ້ານພວກເຮົາຈະມີການປັບປ່ຽນລົດຊາດ ຕາມລະດູການເຊັ່ນດຽວກັນ ເພື່ອເພີ່ມຄວາມຫຼາກຫຼາຍ ແລະ ແປກໃໝ່ເລື້ອຍໆ
  • ນອກຈາກນັ້ນ ສໍາລັບທ່ານໃດທີ່ຢາກສັ່ງເຄັກພິເສດ ແມ່ນ ສາມາດສັ່ງໄດ້ 1 ມື້ລ່ວງໜ້າ
  • ສໍາລັບ ຮ້ານອາຫານ ຫຼື ຮ້ານກາເຟ ທີ່ຢາກມີເຄັກສະເພາະຮ້ານຕົນເອງ ທາງພວກເຮົາ ກໍ່ຮັບເຮັດເຄັກສະເພາະໃຫ້ໄດ້ ເພື່ອຄວາມໂດດເດັ່ນປະຈໍາຮ້ານທ່ານເທົ່ານັ້ນ.
  • ຮັບຈັດງານລ້ຽງໃນຮ້ານ
  • ຮັບຈັດງານ ນອກສະຖານທີ່

ຄວາມທ້າທາຍຂອງທຸລະກິດ Bakery? ມີຄວາມຍາກ ງ່າຍແນວໃດ?

ບ້ານເຮົາສ່ວນຫຼາຍແມ່ນຍັງບໍ່ໃຫ້ຄວາມສໍາຄັນ ກັບປະເພດຂອງຫວານປານໃດ, ແຕ່ອ້າຍຄິດວ່າ bakery ແມ່ນອາຊີບໜຶ່ງທີ່ມອບຄວາມສຸກໃຫ້ລູກຄ້າ ມັນບໍ່ແມ່ນເລື່ອງງ່າຍ ທີ່ຈະເຮັດໃຫ້ລູກຄ້າມີຄວາມສຸກທຸກໆຄັ້ງ ທີ່ໄດ້ກິນເຄັກ ເຮົາອາດຈະຕ້ອງພະຍາຍາມພັດທະນາຕະຫຼອດ ແລະ ມີການໃສ່ໃຈເປັນພິເສດ ລູກຄ້າຈະໄດ້ສໍາພັດກັບຄວາມຕັ້ງໃຈ.
ຖ້າຖາມວ່າຄວາມຍາກຂອງອາຊີບນີ້ຢູ່ໃສ? ອ້າຍຄິດວ່າ ທຸກຄົນສາມາດເຮັດ bakery ໄດ້ ແຕ່ການເຮັດໃຫ້ຄົນອື່ນມັກ ບໍ່ແມ່ນເລື່ອງງ່າຍ ແລະ ການເຮັດໃຫ້ລູກຄ້າກັບມາກິນ ຍິ່ງເປັນສິ່ງທ້າທາຍ ດັ່ງນັ້ນ ການຄວບຄຸມຄຸນນະພາບ ແລະ ລົດຊາດທີ່ດີ ນໍາສະເໜີລົດແປກໃໝ່ ຮັບຟັງຄວາມຕ້ອງການຂອງລູກຄ້າ ແມ່ນສິ່ງໜຶ່ງທີ່ບໍ່ຄວນເບິ່ງຂ້າມ.

ແນະນໍາສໍາລັບຜູ້ທີ່ຢາກມີທຸລະກິດ Bakery ຄວນເລີ່ມຕົ້ນຈາກຫຍັງ?

ການຈະເລີ່ມຕົ້ນເຮັດຫຍັງກໍ່ຕາມ ທຸກຄົນຄວນເລີ່ມຈາກ ການເຮັດໃນສິ່ງທີ່ເຮົາຮັກ ທຸກສິ່ງທຸກຢ່າງ ບໍ່ແມ່ນເລື່ອງງ່າຍ ແຕ່ເມື່ອໃດທີ່ເຈົ້າເຮັດໃນສິ່ງທີ່ມັກ ອຸປະສັກຕ່າງໆ ຈະກາຍເປັນບົດຮຽນ ແລະ ທຸກຄົນຈະສາມາດຜ່ານໄປໄດ້.
ອ້າຍສາມາດເວົ້າໄດ້ວ່າ “ຄວາມດຸໝັ່ນ ອົດທົນ” ຈະພາໃຫ້ທຸກຄົນປະສົບຜົນສໍາເລັດ ແນ່ນອນ ເລີ່ມຕົ້ນມື້ນີ້ແລ້ວຈະມີມື້ໜຶ່ງເປັນມື້ຂອງຕົນເອງ. ສໍາລັບ ໄວໜຸ່ມຄົນໃດທີ່ສົນໃຈໃນອາຊີບນີ້ ກໍ່ຂໍໃຫ້ຕັ້ງໃຈ ສຶກສາ ຈາກຊອງທາງຕ່າງໆເທິງສື່ອອນລາຍ ແລະ ພັດທະນາສ້າງຄວາມເປັນເອກະລັກຂອງຕົນເອງ, ເລື່ອງການພັດທະນາສີມືກໍ່ແມ່ນເລື່ອງສໍາຄັນເຊັ່ນດຽວກັນ ການຮຽນຮູ້ທິດສະດີ ບໍ່ໄດ້ເຮັດໃຫ້ເກັ່ງ ຕ້ອງລອງລົງມືເຮັດຕົວຈິງ ເປັນການຮຽນຮູ້ທີ່ດີທີ່ສຸດ.

ສິ່ງທີ່ຕ້ອງຮູ້ ສໍາລັບຄົນທີ່ຈະເປີດຮ້ານຂອງຕົນເອງ

ພະນັກງານ ແມ່ນຫົວໃຈສໍາຄັນຂອງການເຮັດວຽກ ຖ້າພໍ່ຄົວເກັ່ງຄົນດຽວ ກໍ່ບໍ່ສາມາດເປີດຮ້ານໄດ້ເຊັ່ນດຽວກັນ ພໍ່ຄົວທີ່ເກັ່ງ ຈະສາມາດສອນໃຫ້ຄົນອື່ນເກັ່ງຕາມ ເຮັດວຽກແມ່ນເປັນທີມງານ. ສໍາລັບອ້າຍແມ່ນ ເຮັດໃຫ້ພະນັກງານຮູ້ສຶກວ່າ ເປັນສ່ວນໜຶ່ງຂອງຮ້ານ ເພາະຫາກຖ້າບໍ່ມີພະນັກງານ ກໍ່ບໍ່ສາມາດເຮັດວຽກຄົນດຽວໄດ້ ອ້າຍຈະບອກສອນຄວາມຮູ້ທຸກຢ່າງ ໃຫ້ທຸກຄົນເກັ່ງ ບໍ່ຫວງຄວາມຮູ້ ຫາກອານາຄົດ ພະນັກງານ ຈະຂໍອອກໄປສ້າງຕົນເອງ ກໍ່ເປັນເລື່ອງທີ່ຍິນດີ ສໍາລັບອ້າຍ.

“Chef ເກັ່ງຄົນດຽວ ແມ່ນເລື່ອງທີ່ດີ ແຕ່ຈະດີກວ່າ ຖ້າສາມາດສອນພະນັກງານໃຫ້ເປັນພະນັກງານທີ່ເກັ່ງເຊັ່ນດຽວກັນ”


ເຊີນຊວນຜູ້ອ່ານລອງມາຊິມເຄັກຮ້ານ Bakery by Boris

ເຄັກຮ້ານພວກເຮົາຈະບໍ່ຫວານ ເຮັດໃຫ້ຮູ້ສຶກວ່າກິນເຄັກ ແຕ່ບໍ່ຄືກິນເຄັກ, ດ້ວຍຄວາມທີ່ອ້າຍເປັນຄົນໜຶ່ງທີ່ມັກກິນເຄັກ ຈະກິນມື້ໜຶ່ງ 3 ປ່ຽງ ເລີຍຕ້ອງໄດ້ເຮັດເຄັກທີ່ພິເສດ ແລະ ຈະເອົາຕົນເອງ ເປັນລູກຄ້າສະເໝີ ຖ້າຕົນເອງບໍ່ຢາກກິນ ແລ້ວເປັນຫຍັງລູກຄ້າຕ້ອງກິນ ນີ້ແມ່ນການໃສ່ໃຈຂອງຮ້ານພວກເຮົາ. ຮ້ານຂອງພວກເຮົາ ຢາກເປັນສ່ວນໜຶ່ງໃນການສ້າງມູມນ້ອຍໆ ຫຼື ຄວາມສຸກນ້ອຍໆໃຫ້ກັບຄົນໃນຄອບຄົວ, ປົກກະຕິ ທຸກຄົນຈະເລືອກກິນເຄັກສະເພາະວັນເກີດ ແຕ່ອ້າຍຄິດວ່າ ການກິນເຄັກເປັນເລື່ອງງ່າຍ ທີ່ຄອບຄົວສາມາດມາສ້າງສັນ ອອກນອກບ້ານໃນມື້ພັກ ສະບາຍ ສະບາຍ ນັ່ງກິນຂອງຫວານ ພັກຜ່ອນ ທ່ານໃດທີ່ຢາກສໍາພັດບັນຍາກາດແບບນີ້ ເຊີນທີ່ຮ້ານພວກເຮົາໄດ້.

 

ຂໍ້ມູນເພີ່ມເຕີມສາມາດຕິດຕໍ່ໄດ້
ສະຖານທີ: ບ້ານ ເກົ້າຍອດ, ເມືອງ ສີສັດຕະນາກ, ນະຄອນຫຼວງວຽງຈັນ
Facebook: Bakery by Boris
ເບີໂທຕິດຕໍ່: 020 77 792 228

Nee

The author Nee