close

Uncategorized

Uncategorized

ໄດ້ແລ້ວ!! ທີມຜູ້ຊະນະເລີດ Laos ICT Awards 2018

36892205_10156538955362375_6390995925828894720_n

ໂຄງການ ຈັດປະກວດ Laos ICT Awards ເປັນໂຄງການ ຂອງ ກະຊວງ ປທສ, ຊຶ່ງຈະຈັດເປັນຂຶ້ນເປັນຄັ້ງທໍາອິດ ໃນປີ 2017 ນີ້ ເພື່ອສະໜັບສະໜູນ ນັກຮຽນ-ນັກສຶກສາ, ນັກຄົ້ນຄວ້າ ແລະ ບໍລິສັດຕ່າງໆ ໄດ້ມີໂອກາດສະແດງສັກກະຍະພາບ ແລະ ຄວາມສາມາດ ຂອງຕົນ ທາງດ້ານໄອຊີທີ. ພ້ອມນັ້ນ, ກໍຍັງເປັນການສ້າງແຮງບັນດານໃຈໃນການສົ່ງຜົນງານເຂົ້າຮ່ວມໃນເວທີພາກພື້ນອາຊຽນ ກໍຄື ໂຄງການ ASEAN ICT Awards.

ຫຼັງຈາກທີ່ເລີ່ມເປີດໃຫ້ບັນດານັກຮຽນ-ນັກສຶກສາ, ນັກຄົ້ນຄວ້າ ແລະ ບໍລິສັດຕ່າງໆ ສົ່ງຜົນງານ ແລະ ຜະລິດຕະພັນທາງດ້ານໄອຊີທີ ເຂົ້າມາແຂ່ງຂັນ ຕັ້ງແດ່ເດືອນ ມີນາ ຈົນມາຮອດວັນທີ 7 ເດືອນ 7 ໄດ້ຄັດເລືອກເອົາທີມຜູ້ເຂົ້າຮອບທັງໝົດ 9 ທີມ ເພື່ອມານໍາສະເໜີ ແລະ ຄັດເລືອກຜູ້ຊະນະເລີດ.

ທີມຜູ້ຊະນະເລີດອັນດັບໜຶ່ງແມ່ນ BCEL Oneheart (BCEL)

ຮອງອັນດັບ 1 JobJipJip (1081009 Group)

ຮອງອັນດັບ 2 Typr

ລາງວັນຊົມເຊີຍ LOCA (Bizgital)

ສໍາລັບທີມຜູ້ຊະນະ ຈະໄດ້ໄປຮ່ວມ ແຂ່ງຂັນ ງານ ASEAN ICT Awards ຕໍ່ທີ່ປະເທດອິນໂດເນເຊຍ ສ່ວນປະເປັນມື້ໃດນັ້້ນ ສາມາດຕິດຕາມ ແລະ ຮ່ວມເປັນກໍາລັງໃຈໃຫ້ກັບທີມລາວໄດ້ຈາກ page facebook: Lao ICT Award.

ງານຄັ້ງນີ້ ເປັນອີກໜຶ່ງງານທີ່ມີຄວາມສໍາຄັນ ເຊິ່ງທາງກະຊວງໄປສະນີ ໂທລະຄົມມະນາຄົມ ແລະ ການສື່ສານ ໃຫ້ຄວາມສໍາຄັນ ໃນການສົ່ງເສີມວຽກງານ ໄອຊີທີ ຂອງລາວ, ການສົ່ງເສີມຄວາມສາມາດຂອງໄວໜຸ່ມລາວ ໃຫ້ທຽບເທົ່າກັບບັນດາປະເທດໃນອາຊຽນ. ສໍາລັບໃຜທີ່ພາດງານໃນປີນີ້ ປີໜ້າ ສາມາດຕິດຕາມ ແລະ ສົ່ງຜົນງານເຂົ້າຮ່ວມແຂ່ງຂັນ ເພື່ອສົ່ງຜົນງານໄປແຂ່ງລະດັບອາຊຽນ.

 

read more
Good2KnowUncategorized

ການຕອບຄຳຖາມເວລາສຳພາດວຽກໃຫ້ໄດ້ໃຈຜູ້ສຳພາດຕ້ອງເຮັດແບບໃດ

Intervie-01

ການສຳພາດວຽກແຕ່ລະຄັ້ງຜູ້ທີ່ຖືກສຳພາດຕ້ອງໄດ້ກຽມໂຕເອງໃຫ້ພ້ອມໃນການຕອບຄຳຖາມແບບໝັ້ນໃຈທີ່ສຸດ ແຕ່ບໍ່ໄດ້ແມ່ນເລື່ອງງ່າຍເລີຍທີ່ຈະສາມາດຕອບໄດ້ກິນໃຈຜູ້ສຳພາດ, ນີ້ເປັນຕົວຢ່າງຄຳຖາມທີ່ມັກຖືກຖາມກັນຫຼາຍທີ່ສຸດໃນເວລາສຳພາດວຽກ ແຕ່ຖ້າໄປສຳພາດວຽກກັບບໍລິສັດຕ່າງປະເທດກໍ່ຕ້ອງກຽມເປັນພາສາອັງກິດໄວ້ພ້ອມ.

  • ຖາມ: ແນະນໍາໂຕເອງໃຫ້ຮູ້ຈັກຫຼາຍຂື້ນອີກແດ່; 
  • ຕອບ: ຄວນເລົ່າແຕ່ປະສົບການທີ່ກ່ຽວຂ້ອງ ຫຼື ມີຜົນຕໍ່ການສຳພາດວຽກໃນຄັ້ງນີ້ ແລະ ຂໍ້ມູນອື່ນໆອີກເຊັ່ນວ່າ: ເປັນຄົນຕົງຕໍ່ເວລາຕະຫລອດ ແຕ່ກາເປັນຂໍ້ເສຍເພາະມັກຈະອາລົມບໍ່ດີເວລາເຫັນຄົນອື່ນບໍ່ຕົງເວລາ ເຊິ່ງກຳລັງຫາວິທີແກ້ໄຂຢູ່.

 

  • ຖາມ: ຍ້ອນຫຍັງເຈົ້າຈຶ່ງຢາກປ່ຽນວຽກ/ຍ້ອນຫຍັງຈຶ່ງອອກຈາກບ່ອນເກົ່າ;
  • ຕອບ:ຫ້າມເວົ້າຫາເລື່ອງທີ່ບໍ່ດີຂອງບ່ອນເຮັດວຽກເກົ່າແຕ່ພຽງຢ່າງດຽວ, ຄວນເວົ້າແບບກາງໆ ເຊັ່ນວ່າ ຕ້ອງການຄວາມກ້າວໜ້າທາງອາຊີບ, ຢາກເຮັດວຽກທີ່ທ້າທາຍ ຫຼືຖ້າເຮົາມີບັນຫາກັບຫົວໜ້າຄົນເກົ່າກໍ່ຄວນຕອບວ່າແນວຄວາມຄິດໃນການເຮັດວຽກຕ່າງກັນ

 

  • ຖາມ: ຍ້ອນຫຍັງຈຶ່ງສົນໃຈຢາກເຮັດວຽກໃນຕຳແໜ່ງນີ້;
  • ຕອບ: ຕ້ອງຕອບໃຫ້ເຂົາຮູ້ວ່າເຮົາມີຄວາມຕັ້ງໃຈຢາກເຮັດວຽກນີ້ຫລາຍທີ່ຈະເຮັດຕຳແໜ່ງນີ້ເຊັ່ນ ຕຳແໜ່ງນີ້ຕ້ອງໄດ້ໃຊ້ທັກສະໃນການເຈລະຈາຕໍ່ລອງ ແລະ ເຮົາເອງກໍ່ເປັນຄົນທີ່ມີຄຸນສົມບັດທີ່ເໝາະສົມ.

 

  • ຖາມ: ຍ້ອນຫຍັງຈຶ່ງຢາກເຂົ້າມາເຮັດວຽກໃນບໍລິສັດພວກເຮົາ;
  • ຕອບ: ຄວນຕອບໃຫ້ເຂົາຮູ້ສຶກວ່າ ເຮົາມີຄວາມຮູ້ກ່ຽວກັບບໍລິສັດຫຼາຍພໍສົມຄວນ, ມີທິດທາງດຽກກັນກັບທິດທາງຂອງບໍລິສັດ, ໄດ້ຍິນສື່ສຽງມາດົນ ແລະ ມີຄວາມຮູ້ສຶກປະທັບໃຈຂອງຜູ້ບໍລິຫານ(ລະບຸຊື່ຖ້າເປັນໄປໄດ້)ທີມີວິໄສທັດກວ້າງໄກໃນການເຈາະຕະຫລາດໃຫມ່ ແລະ ຄິດວ່າມັນເປັນສິ່ງທີ່ທ້າທາຍຫລາຍຖ້າມີໂອກາດຮ່ວມວຽກກັບບໍລິສັດ

 

  • ຖາມ: ຍ້ອນຫຍັງພວກເຮົາຈຶ່ງຈະຮັບເຈົ້າເຂົ້າເຮັດວຽກ;
  • ຕອບ: ຄວນຕອບວ່າເຮົາເກັ່ງຫຍັງ, ມີຄວາມສາມາດ ແລະ ປະສົມການຫຍັງທີ່ເໝາະສົມກັບຕຳແໜ່ງທີ່ເຂົາຕ້ອງການ ແຕ່ຖ້າໃນກໍລະນີທີ່ຄຸນສົມບັດຂອງເຮົາບໍ່ຕົງກັບທີ່ເຂົາຕ້ອງການເຮົາຈະຕ້ອງພະຍາຍາມເວົ້າໃນລັກສະນະທີ່ວ່າເຮົາມີທັກສະອື່ນທີ່ສາມາດແທນກັນໄດ້.

 

  • ຖາມ: ເຈົ້າໄດ້ວາງແຜນແນວໃດໃນອີກ 5 ປີຕໍ່ຈາກນີ້;
  • ຕອບ: ຄວນຕອບໃຫ້ເຂົາຮູ້ວ່າເຮົາມີເປົ້າໝາຍໃນຊີວິດ, ມີເປົ້າໝາຍກຽ່ວກັບອາຊີບຂອງຕົນວ່າຈະກ້າວໄປຢູ່ໃນຕຳແໜ່ງໃດ ແລະ ມີຄວາມຮັບຜິດຊອບຫຼາຍຂື້ນແບບໃດໃນອານາຄົດ.

 

  • ຖາມ: ນອກຈາກມາສະຫມັກງານກັບບໍລິສັດພວກເຮົາແລ້ວ ເຈົ້າໄປສະຫມັກບ່ອນອື່ນໄວ້ແດ່ບໍ່;
  • ຕອບ: ຄວນຕອບໃຫ້ເຂົ້າໝັ້ນໃຈວ່າ ເຮົາມີຄວາມຕັ້ງໃຈທີ່ຢາກເຮັດວຽກກັບເຂົ້າໄປດົນໆແທ້ ເຖິງແມ່ນວ່າເຮົາໄດ້ໄປສະໝັກບ່ອນອື່ນໄວ້ແລ້ວກໍ່ຕາມ ຖ້າເຂົາຮັບເຮົາ ເຮົາກໍ່ເລືອກທີ່ຈະຢູ່ກັບເຂົາ.

 

  • ຖາມ: ຊ່ວຍບອກຈຸດແຂງ ແລະ ຈຸດອ່ອນຂອງເຈົ້າມາເບິ່ງວ່າມີຫຍັງແດ່;
  • ຕອບ: ເວລາເວົ້າກ່ຽວກັບຈຸດອ່ອນຂອງໂຕເອງຄວນເວົ້າແຕ່ຈຸດອອ່ນທີ່ບໍ່ໄດ້ມີຜົນເສຍຕໍ່ການເຮັດວຽກເຊັ່ນ: ເປັນຄົນລອຍນ້ຳບໍ່ເປັນ, ຂຽນໜັງສືບໍ່ງາມແຕ່ພີມເອກະສານເກັ່ງ; ສ່ວນຈຸດເດັ່ນແມ່ນຄວນເວົ້າແຕ່ສິ່ງທີ່ກ່ຽວຂອງກັບວຽກ ແລະ ຕ້ອງຕອບໃຫ້ເໝາະສົມ, ມີນ້ຳໜັກ ແລະ ໜ້າເຊື່ອຖື ໂດຍມີຂໍ້ມູນມາຊີ້ແຈ້ງພ້ອມ.

 

  • ຖາມ: ເຈົ້າຄິດວ່າຈະສາມາດເຮັດວຽກກັບຫົວໜ້າທີ່ມີນິໄສແຕກຕ່າງກັບເຈົ້າໄດ້ຫຼືບໍ່;
  • ຕອບ: ຄວນຕອບວ່າເວລາເຮັດວຽກເຮົາຈະໃຫ້ຄວາມສຳຄັນໄປທີ່ເປົ້າໝາຍຂອງວຽກຫຼາຍກວ່າ ສ່ວນເລື່ອງນິໄສໃຈຄໍນັ້ນເຮົາເອງມີທັກສະໃນການປັບໂຕເຂົ້າກັບຄົນອື່ນໄດ້ດີພໍສົມຄວນ ເຊິ່ງບໍ່ໜ້າຈະເປັນບັນຫາໃນການເຮັດວຽກຮ່ວມກັນ

 

  • ຖາມ: ໃນຊີວິດທີ່ຜ່ານມາເຈົ້າເຄີຍເຮັດຫຍັງຜິດພາດບໍ່ ຖ້າມີແລ້ວເຈົ້າແກ້ໄຂມັນແບບໃດ;
  • ຕອບ: ຫ້າມຕອບວ່າບໍ່ເຄີຍເດັດຂາດ ເພາະໃນໂລກນີ້ບໍ່ມີໃຜທີ່ບໍ່ເຄີຍຜິດພາດຈັກເທື່ອ ແຕ່ການຕອບຄວນອິງຕາມຄວາມເປັນຈິງວ່າເວລາເຮົາຜິດພາດໄປແລ້ວເຮົາໄດ້ເອົາຄວາມຜິດນັ້ນມາເປັນບົດຮຽນ ແລະ ພະຍາຍາມບໍ່ໃຫ້ມັນເກີດຂື້ນອີກ

ຄຳຖາມເຫຼົ່ານີ້ເປັນພຽງຕົວຢ່າງສຳລັບການກຽມຄວາມພ້ອມເທົ່ານັ້ນ ແຕ່ຖ້າຖືກຄຳຖາມທີ່ບໍ່ຄາດຄິດໄວ້ ມີແຕ່ໃຫ້ພະຍາຍາມຄວບຄຸມອາລົມ ຫຼືພຶດຕິກຳທີ່ສະແດງອອກຂອງໂຕເອງໃຫ້ໄດ້ ເພາະບາງຄັ້ງການຕອບຄຳຖ້າກໍ່ບໍ່ໄດ້ສຳຄັນເທົ່າກັບພຶດຕິກຳທີ່ສະແດງອອກໃນເວລາຕອບຄຳຖາມ.

 

read more
Uncategorized

ລູກນ້ອງແບບໃດຈຶ່ງຈະຖືກໃຈຫົວໜ້າ

I-ME-Mine-boss

         ບາດກ້າວທຳອິດກັບການກ້າວເຂົ້າສູ່ໂລກແຫ່ງການເຮັດວຽກ ໜ້າທີ່ທຳອິດທີ່ເຈົ້າຈະໄດ້ຮັບຍ່ອມໜີບໍ່ພົ້ນການເປັນ “ລູກນ້ອງ” ເຊິ່ງຖືວ່າເປັນກຳລັງສຳຄັນໃນການເຮັດວຽກ ແລະ ເມື່ອມີ “ລູກນ້ອງ” ກໍຕ້ອງມີ “ຫົວໜ້າ” ທີ່ຈະເປັນຜູ້ຄອຍຕິດຕາມ, ຄວບຄຸມເບີ່ງແຍງ ໃຫ້ວຽກຂອງທີມເປັນໄປຕາມເປົ້າໝາຍທີ່ວາງໄວ້. ຫາກລູກນ້ອງຄົນໃດທີ່ສາມາດເອົາຊະນະໃຈຫົວໜ້າໄດ້ ຂໍບອກເລີຍວ່າການງານຂອງເຈົ້າຈະຈະເລີນຮຸ່ງເຮືອງ, ມີໂອກາດທີ່ຈະໄດ້ເລື່ອນຊັ້ນ ເລື່ອນຕຳແໜ່ງຢ່າງແນ່ນອນ. ມາເບິ່ງກັນວ່າເປັນລູກນ້ອງແບບໃດຫົວໜ້າຈຶ່ງມັກ.

ມີທັດສະນະຄະຕິໃນທາງບວກ  😀 

ຄົນທີ່ມີທັດສະນະຄະຕິທີ່ດີເປັນຄົນທີ່ຄິດບວກ, ເບີ່ງໂລກໃນແງ່ດີ ສຳລັບຄົນທີ່ຄິດບວກຈະມີພະລັງໃນການເຮັດວຽກງານຕ່າງໆໄດ້ຢ່າງເຕັມທີ່, ເຊິ່ງຄົນເຫຼົ່ານີ້ຈະເຮັດວຽກດ້ວຍຄວາມມ່ວນຊື່ນ ແລະ ພ້ອມທີ່ຈະຊ່ວຍເຫຼືອເພື່ອນຮ່ວມງານເຮັດວຽກນັ້ນໆສຳເລັດຕາມເປົ້າໝາຍ ເຖິງແມ່ນວ່າຈະປະສົບກັບບັນຫາ ເຂົາກໍຈະຊອກຫາຂໍ້ຜິດພາດ ແລະ ພ້ອມທີ່ຈະປັບປຸງແກ້ໄຂໃນຄັ້ງຕໍ່ໄປ.

ມີຄວາມຕັ້ງໃຈໃນການເຮັດວຽກ

   ຄົນທີ່ມີຄວາມຕັ້ງໃຈໃນການເຮັດວຽກກໍຄືຄົນທີ່ກະຕືລືລົ້ນໃນການເຮັດວຽກທີ່ໄດ້ຮັບມອບໝາຍ ແລະ ຍິນດີທີ່ຈະຊ່ວຍເຫລືອຄົນອື່ນ ໂດຍບໍ່ໄດ້ຄິດພຽງແຕ່ວ່າເຮັດໃຫ້ວຽກສຳເລັດ, ແຕ່ຈະຄິດຢູ່ສະເໝີວ່າ ພວກເຂົາຈະໄດ້ປະໂຫຍດຫຍັງ, ເປັນຜົນດີຕໍ່ອົງກອນ ຫຼື ບໍລິສັດ ແນວໃດ ແລະ ວຽກທີ່ເຮັດນັ້ນສາມາດຊ່ວຍໃຫ້ໂຕຂອງພວກເຂົາມີການພັດທະນາແນວໃດ ເຊີ່ງມັນຈະສົ່ງຜົນເຮັດໃຫ້ວຽກທີ່ເຮັດອອກມາຢ່າງມີປະສິດທິພາບ.

ອົດທົນ, ດຸໝັ່ນ ແລະ ມີລະບຽບວິໄນ

    ບາງຄັ້ງໃນການເຮັດວຽກເຮົາຕ້ອງຮູ້ຈັການອົດທົນກັບສະພາວະຄວາມກົນດັນຕ່າງໆເຊັ່ນ: ຄວາມກັງວົນທີ່ເກີດຈາກການເຮັດວຽກ, ການເວົ້າຈາຮຸນແຮງ ເຊິ່ງບາງຄົນອາດມີຄວາມອົດທົນໜ້ອຍ, ເມື່ອພົບກັບສະຖານະການແບບນີ້ກໍ່ລາອອກໄປເລີຍ!! ໃນໂລກແຫ່ງການເຮັດວຽກນີ້ ການຢູ່ໃນສະພາວະທີ່ຖືກກົດດັນແມ່ນລ້ວນແລ້ວແຕ່ເກີດຂື້ນກັບທຸກໆຄົນ ແຕ່ຖ້າຫາກວ່າເຮົາມີຄວາມອົດທົນ, ມຸ່ງໝັ້ນ ແລະ ທຸ້ມເທ ທີ່ຈະຜ່ານພ່າສະຖານະການເຊັ່ນນີ້ໄປໃຫ້ໄດ້ ເຮົາຈະມີພູມຄຸ້ມກັນໃນການເຮັດວຽກ ແມ້ວ່າຈະປະສົບກັບຫົວໜ້າທີ່ເຄັ່ງຄັດພຽງໃດເຮົາກໍຈະສາມາດຮັບມືໄດ້ຢ່າງສະບາຍໆ.

ມີຄວາມຮັບຜິດຊອບ

    ຄົນທີ່ມີຄວາມຮັບຜິດຊອບຈະຊ່ວຍໃຫ້ການເຮັດວຽກຮ່ວມກັນເປັນທີມນັ້ນສາມາດສຳເລັດລຸລ່ວງໄປໄດ້ດ້ວຍດີ ແລະ ສາມາດເຮັດວຽກສຳເລັດໄປຕາມເປົ້າໝາຍທີ່ວາງໄວ້, ຫົວໜ້າເອງກໍສາມາດໄວ້ໃຈໄດ້ວ່າ ຖ້າມອບໝາຍວຽກໃຫ້ແລ້ວວຽກຈະຕ້ອງສຳເລັດລຸລ່ວງໄປໄດ້ດ້ວຍດີແນ່ນອນ.

ເປີດຮັບສີ່ງໃໝ່ໆ

           ໃນການເຮັດວຽກໃນປັດຈຸບັນ ຕ້ອງບອກເລີຍວ່າ ການເປີດໃຈຍອມຮັບສິ່ງໃໝ່ໆ ນັ້ນເປັນສິ່ງທີ່ຈຳເປັນຫຼາຍ ຍ້ອນເທັກໂນໂລຢີທີ່ໄດ້ມີການພັດທະນາໄປຢ່າງບໍ່ຢຸດຢັ້ງ ເຮັດໃຫ້ມີວິທີການໃໝ່ໆເຂົ້າມາຕະຫຼອດເວລາ ເພື່ອຊ່ວຍໃນການເຮັດວຽກງ່າຍ ແລະ ສະດວກສະບາຍຫຼາຍຂື້ນ, ສະນັ້ນ, ເຮົາຕ້ອງເຮັດໃຫ້ໂຕເອງເປັນລູກນ້ອງທີ່ພ້ອມຈະປັບປຸງ ແລະ ພັດທະນາການເຮັດວຽກໃຫ້ທັນຕາມຍຸກສະໄໝທີ່ປ່ຽນແປງໄປ.

ຊື່ສັດ

         ພະນັກງານທີ່ມີຄວາມຊື່ສັດຕໍ່ອົງກອນ ຫຼື ບໍລິສັດ ໂດຍການປະຕິບັດຕາມກົດລະບຽບ, ຂໍ້ບັງຄັບ; ຊ່ວຍຮັກສາຜົນປະໂຫຍດຂອງບໍລິສັດ ຄົນເຫຼົ່ານີ້ມັກຈະເປັນຄົນທີ່ຫົວໜ້າຮັກຢູ່ສະເໝີ ເພາະຄົນເຫຼົ່ານີ້ສາມາດເປັນຫູເປັນຕາໃຫ້ບໍລິສັດໄດ້, ຫົວໜ້າສາມາດມອບໝາຍວຽກທີ່ສຳຄັນໆ ຫຼື ວຽກທີ່ເປັນຄວາມລັບຂອງບໍລິສັດໃຫ້ພະນັກງານທີ່ມີຄວາມຊື່ສັດໄດ້, ເພາະສາມາດເຊື່ອຖືໄດ້ວ່າເຂົາຈະບໍ່ເປີດເຜີຍລາຍລະອຽດຕ່າງໆທີ່ສຳຄັນໃຫ້ຄົນອື່ນຮູ້.

ປັບໂຕໃຫ້ເຂົ້າກັບຜູ້ອື່ນ

        ໃນການເຮັດວຽກບໍ່ວ່າຈະເປັນບໍລິສັດນ້ອຍ ຫຼື ໃຫຍ່ຊໍ່າໃດ ກໍຕ້ອງເຮັດວຽກຮ່ວມກັບຜູ້ອື່ນ ລວມທັງເພື່ອນຮ່ວມງານທີ່ຢູ່ໃນພະແນກດຽວກັນ ຫຼື ຕ່າງພະແນກກໍຕາມ ການປັບໂຕໃຫ້ເຂົ້າກັບຄົນອື່ນໄດ້ງ່າຍ ເຮັດໃຫ້ຫົວໜ້າສາມາດໄວ້ວາງໃຈໃຫ້ເຮົາເປັນຕົວແທນຂອງພະແນກໃນການປະສານງານ ຫຼື ຮ່ວມງານກັບຄົນອື່ນໃນບໍລິສັດໄດ້ ເຊີ່ງຄົນທີ່ສາມາດປັບໂຕເຂົ້າກັບຄົນອື່ນໄດ້ງ່າຍ ຈະຊ່ວຍໃຫ້ບັນຍາກາດຂອງການເຮັດວຽກນັ້ນລາບລື່ນ, ບໍ່ມີອຸປະສັກໃນການເຮັດວຽກເປັນຕົ້ນ.

ຮອບຄອບ

       ຄວາມຮອບຄອບໃນການເຮັດວຽກສາມາດບົ່ງບອກເຖິງຄວາມຕັ້ງໃຈໃນການເຮັດວຽກ ຫາກວ່າເຮົາມີຄວາມຮອບຄອບ ສະແດງວ່າເຮົາມີຄວາມຕັ້ງໃຈເຮັດວຽກ, ສຸມໃສ່ວຽກນັ້ນຢ່າງເຕັມທີ່ ເຮັດໃຫ້ມີສ່ວນທີ່ຜິດພາດໜ້ອຍ ຫຼື ອາດຈະບໍ່ມີເລີຍ, ເຮັດໃຫ້ຜົນງານທີ່ອອກມາມີປະສິດທິພາບອີກດ້ວຍ.

ຕົງຕໍ່ເວລາ

       ພະນັກງານທີ່ເປັນຄົນຕົງຕໍ່ເວລານັບວ່າເປັນຄົນທີ່ມີຄວາມດຸໝັ່ນ, ຄົນກຸ່ມນີ້ຈະມີຄວາມກະຕືລືລົ້ນໃນການເຮັດວຽກ ແລະ ວຽກທີ່ອອກມາຈະມີປະສິດທິພາບ ແລະ ສຳເລັດຕາມເປົ້າໝາຍທີ່ຕັ້ງໄວ້. ຫົວໜ້າຈະມັກລູກນ້ອງທີ່ຕົງຕໍ່ເວລາເພາະເຂົາສາມາດໄວ້ວາງໃຈ ແລະ ເຊື່ອຖືໄດ້ວ່າວຽກທີ່ມອບໝາຍໄປຈະຕ້ອງອອກມາດີ ແລະ ສົ່ງໄດ້ທັນຕາມກຳນົດເວລາ.

      ຈະເຫັນໄດ້ວ່າພຶດຕິກຳຕ່າງໆທີ່ຫົວໜ້າມັກສ່ວນໃຫຍ່ແລ້ວຈະເປັນລັກສະນະນິໄສຂອງຄົນທີ່ປະສົບຜົນສຳເລັດ, ສະນັ້ນລອງຝືກຝົນ ແລະ ປັບເອົາລັກສະນະການເຮັດວຽກເຫຼົ່ານີ້ໄປໃຊ້ໃນການເຮັດວຽກລອງເບິ່ງ ເພາະວ່ານອກຈາກພຶດຕິກຳເຫຼົ່ານີ້ຈະຊ່ວຍໃຫ້ເຈົ້າເປັນທີ່ຮັກຂອງຫົວໜ້າ ແລະ ຍັງຊ່ວຍໃຫ້ເຈົ້າປະສົບຄວາມສຳເລັດໃນໜ້າທີ່ວຽກງານໄດ້ອີກດ້ວຍ.

ແຫຼ່ງຂໍ້ມູນຈາກ: https://th.jobsdb.com/

read more
Uncategorized

ປະກາດແລ້ວ AirAsia Runway Ready Designer Search 2017

IMG_6178

2 ຄົນສຸດທ້າຍຂອງປະເທດລາວ

ວັນທີ 10 ມິຖຸນາ 2017 ທີ  ໂຮງແຮມ Lao Plaza, AirAsia Runway Ready Designer Search ໄດ້ຈັດການແຂ່ງຂັນຄັດເລືອກ 2 ຄົນສຸດທ້າຍເພື່ອເປັນຕົວແທນປະເທດລາວໄປແຂ່ງຂັນທີ່ກົວລາລໍາເປີ (ປະເທດມາເລເຊຍ) ໃນເດືອນສິງຫາ

AirAsia Runway Ready Designer Search ແມ່ນໄດ້ຈັດການແຂ່ງຂັນຂຶ້ນຢູ່ 10 ປະເທດອາຊຽນ ເພື່ອເປັນການສ້າງໂອກາດໃຫ້ແກ່ຜູ້ອອກແບບທີ່ມີຄວາມສາມາດພິເສດເຂົ້າຮ່ວມແຂ່ງຂັນໃນລະດັບພາກພື້ນ ແລະ ວາງສະແດງຜົນງານຂອງພວກເຂົາຢູ່ເວທີແຟຊັນລະດັບສາກົນ ໃນຊ່ວງໄລຍະ KL Fashion Week Ready to Wear.

ຄະນະກຳມະການຄັດເລືອກ ປະກອບມີ: ທ່ານ Andew Tan ຜູ້ກໍ່ຕັ້ງ KL Fashion Week, ທ່ານ ເທບ ນີຣະນາດພູຣີ ຜູ້ຈັດການອະວຸໂສ ຝ່າຍຜະລິດຕະພັນ ຂົງເຂດອິນໂດຈີນ ຂອງແອເອເຊຍ, ທ່ານນາງ ປານີ ໄຊຍະວົງ ຜູ້ບໍລິຫານສູງສຸດ//ຜູ້ອໍານວຍການ ວາລະສານ Society Lifestyle Magazine, ທ່ານ ບັນດິດ ລາດຊະວົງ ຜູ້ອອກແບບແຟນຊັນຂອງ  MAN Folder.

     ຜູ້ເຂົ້າຮອບ ສອງທ່ານສຸດທ້າຍ ທີ່ຖືກຄັດເລືອກເປັນຕົວແທນຈາກປະເທດລາວໄດ້ແກ່:

Ms. Manithip Vongphachanh

ນາງ ມະນີທິບ ວົງພະຈັນ

23 ປີ

Mr. Siamphan Chanthavichit

ທ້າວ ສີອຳພັນ ຈັນທະວິຈິດ

19 ປີ

ທັງສອງທ່ານຈະໄດ້ສະແດງຜົນງານໃນການແຂ່ງຂັນຮອບສຸດທ້າຍ (Grand Finale) ທີ່ນະຄອນຫລວງກົວລາລໍາເປີ (ປະເທດມາເລເຊຍ) ໃນເດືອນສິງຫານີ້.

ນອກຈາກນີ້ ຜູ້ເຂົ້າຮອບທັງ 2 ທ່ານຈະໄດ້ຮັບລາງວັນເຊັ່ນ: ຄະແນນ 150,000 ຈາກ AirAsia BIG Points, ເງິນຈໍານວນ 25,000 ຣິງກິດ (ປະມານ 48,000,000 ກີບ) ເພື່ອຜະລິດເຄື່ອງນຸ່ງແຟຊັນ ທີ່ຈະຂາຍທາງ fashionvalet.com, Traval3sixty ເຊິ່ງເປັນວາລະສານແຟຊັນ ທີ່ປະກອບມີ 6 ຫນ້າ ສໍາລັບຖ້ຽວບິນຂອງແອເອເຊຍ, ການເດີນທາງກັບແອເອເຊຍ ແລະ ຄໍາປຶກສາແນະນໍາຈາກ KLFW RTW, ລວມທັງຊ່ອງທາງເພື່ອວາງສະແດງຜົນງານທັງຫມົດຂອງທັງສອງທ່ານ ໃນໄລຍະ  KL Fashion Week RTW 2018.

ອີກບາດກ້າວຫນຶ່ງຂອງໄວຫນຸ່ມລາວ ໃນວົງການອອກແບບ ມາຮ່ວມກັນເປັນກຳລັງໃຈໃຫ້ກັບທັງສອງທ່ານ ໃນການເປັນຕົວແທນປະເທດລາວໄປແຂ່ງຂັນໃນຮອບຕໍ່ໄປຮ່ວມກັນ.

ທຸກທ່ານສາມາດຕິດຕາມລາຍລະອຽດການເດີນທາງຂອງຜູ້ເຂົ້າຮ່ວມທັງຫມົດໃນງານ AirAsia Runway Ready Designer Search 2017 ທີ່: YouTube ຂອງ AirAsia

read more
Uncategorized

Crowne Plaza Vientiane ສະເຫຼີມສະຫຼອງ ອາທິດແຫ່ງ ການຂອບໃຈ ແລະ ຕອບແທນທີມງານໃນວຽກງານການບໍລິການ ຂອງເຄືອໂຮງແຮມ IHG

DSCF8785

ວ້າວໆ!!! ກິດຈະກໍາດີໆ ເພື່ອພະນັກງານ! ສະເພາະ Crowne Plaza Vientiane ເທົ່ານັ້ນ. ອີກໜຶ່ງກິດຈະກໍາດີໆທີ່ແຕ່ລະປີ ທຸກໆໂຮງແຮມໃນເຄື່ອ IHG ຫຼາຍກວ່າ 5,000 ສາຂາທົ່ວໂລກ ຈັດເພື່ອເປັນການຂອບໃຈສຳລັບຄວາມມຸ່ງໝັ້ນ ແລະ ຄວາມຕັ້ງໃຈ ຂອງທີມງານໃນການເຮັດວຽກ ແລະ ບໍລິການລູກຄ້າ. Crowne Plaza Vientiane ໂຮງແຮມໜຶ່ງດຽວໃນລາວ ທີ່ຢູ່ໃນເຄືອຂອງ IHG ໄດ້ຈັດກິດຈະກໍານີ້ເຊັ່ນດຽວກັນ, ເຊິ່ງເອີ້ນວ່າ IHG Celebrate Service week ທີ່ Crowne Plaza Vientiane. ກິດຈະກໍານີ້ ເລີ່ມຕັ້ງແຕ່ ວັນທີ 22-28 ພຶດສະພາ ເຊິ່ງເລີ່ມຕົ້ນອາທິດດ້ວຍການມອບອາຫານເຊົ້າ ແລະ ເສີບກະແລ້ມໃຫ້ກັບທີມງານໃນຕອນບ່າຍ, ບໍລິການນວດໃຫ້ພະນັກງານ, ເບິ່ງໜັງ ແລະ ພິເສດແມ່ນກິດຈະກໍາການຫຼີ້ນກິລາ ເພື່ອໃຫ້ພະນັກງານໄດ້ມາຮ່ວມກິດຈະກໍານໍາກັນ ກິດຈະກໍານີ້ຍັງຈະຈັດຢ່າງຕໍ່ເນື່ອງຈົນຮອດທ້າຍອາທິດ.

“ພວກເຮົາເຫັນຄວາມສໍາຄັນໃນການຍ້ອງຍໍ ຜູ້ທີ່ເຮັດວຽກເບື້ອງຫຼັງກໍ່ຄື ບຸກຄົນຜູ້ທີ່ຈອງຫ້ອງພັກ, ຫ້ອງປະຊຸມ ແລະ ງານຕ່າງໆສໍາລັບຜູ້ອື່ນ. ພວກເຮົາເຊື່ອວ່າ ທ່ານຄວນໄດ້ຮັບການສໍາມະນາຄຸນ ສໍາລັບວຽກທີ່ທ່ານໄດ້ເຮັດມາ. ທ່ານສົມຄວນທີ່ຈະໄດ້ຮັບການຍ້ອງຍໍແລະ ລາງວັນຕອບແທນທີ່ຄຸ້ມຄ່າ. ດັ່ງນັ້ນ, ພວກເຮົາຈຶ່ງໄດ້ສ້າງ ໂປຼແກມ IHG Business Rewards”

ໃຜໆ ທີ່ຢາກສໍາຜັດການຕອບແທນດີໆແບບນີ້ ຂໍເຊີນມາຮ່ວມເປັນຄອບຄົວດຽວກັນກັບ Crowne Plaza Vientiane ແລ້ວທ່ານຈະໄດ້ຮັບສິ່ງດີໆຈາກ Crowne Plaza Vientiane ເຊັ່ນດຽວກັນ.

read more
Uncategorized

Butterfly Global ທຸລະກິດເຄືອຂ່າຍສີຂາວ ສັນຊາດລາວ ເປີດບໍລິການແລ້ວ

ວັນທີ 6 ເມສາທີ່ຜ່ານມາ Butterfly Global ໄດ້ເປີດບໍລິການຢ່າງເປັນທາງການທີ່ສູນການຄ້າ ອາຊຽນມໍ, ໂດຍການເປັນປະທານຂອງທ່ານ ຖັງ ຈິ່ງເຕີ ປະທານ ແລະ ຜູ້ກໍ່ຕັ້ງ Butterfly Global, Butterfly Global ແມ່ນເປີດໂຕໃນຖານະບໍລິສັດເຄືອຂ່າຍສີຂາວ ຫຼື ເປັນການຊື້ຂາຍຈໍາໜ່າຍສິນຄ້າ ຕາມການສະໝັກເປັນຕົວແທນຈໍາໜ່າຍ. ປັດຈຸບັນທາງບໍລິສັດຈໍາໜ່າຍຜະລິດຕະພັນ ອາຫານເສີມ ເພື່ອສຸຂະພາບ ຊາເຊ່ ແລະ ໃນອານາຄົດແມ່ນຈະພັດທະນາເປັນເຄື່ອງໃຊ້ທົ່ວໄປໃນຄົວເຮືອນ, ເຄື່ອງໃຊ້ໄຟຟ້າ, ແລະ ເນັ້ນກຸ່ມກະເສດ. ສໍາລັບທ່ານໃດທີ່ສົນໃຈຜະລິດຕະພັນ ຫຼື ຢາກເປັນສະມາຊິກ ແມ່ນສາມາດຕິດຕໍ່ຫາທາງບໍລິສັດໂດຍກົງ ຄ່າສະມາຊິກເລີ່ມຕົ້ນແມ່ນ 75.000 ກີບ.

ຂໍ້ມູນເພີ່ມເຕີມ:
ສະຖານທີ: ບ້ານ ໂພນທັນ, ເມືອງ ໄຊເສດຖາ, ນະຄອນຫຼວງວຽງຈັນ
ສູນການຄ້າອາຊຽນມໍ (ຕຶກ C05)
Facebook: Butterfly Global
Website: butterflyglobals.com

read more
Uncategorized

ນັກສຶກສາຜູ້ມີຄວາມຝັນຢາກເຮັດວຽກຮ່ວມກັບອົງການ ສາກົນໃນດ້ານການໂຄສະນາເຜີຍແຜ່ການສຶກສາໃນເຂດຊົນນະບົດ

ສະບາຍດີ ຂ້າພະເຈົ້າ ນຸດລັດດາ ອັກຄະວົງ (ໜິງ), ຂ້າພະເຈົ້າໄດ້ຮັບທຶນການສຶກສາຈາກລັດຖະບານເກົາຫຼີໃຕ້ (KGSP) ໃນປີ 2015. ປະຈຸບັນ ກຳລັງສຶກສາລະດັບປະລິນຍາໂທ ສາຂາ ບໍລິຫານການສຶກສາ ທີ່ມະຫາວິທະຍາໄລ ຫັນຢັງ (Hanyang University), ເຊອຸນ ປະເທດເກົາຫຼີໃຕ້. ຂ້າພະເຈົ້າ ມາສຶກສາຢູ່ທີ່ນີ້ ເປັນເວລາເກືອບສອງປີແລ້ວ.

ເປັນຫຍັງຈຶ່ງເລືອກມາຮຽນຢູ່ປະເທດນີ້?
ນັບຕັ້ງແຕ່ສຶກສາປະລິນຍາຕີ ບວກກັບປະສົບການເຮັດວຽກອາສາສະໝັກຕ່າງໆທີ່ກ່ຽວຂ້ອງດ້ານການສຶກສາ ເຮັດໃຫ້ຂ້າພະເຈົ້າມີຄວາມສົນໃຈຫຼາຍໃນດ້ານສາຂາພັດທະນາ ແລະ ບໍລິຫານການສຶກສາ. ສ່ວນຕົວແລ້ວ ຂ້າພະເຈົ້າຄິດວ່າ ປະເທດເກົາຫຼີໃຕ້ເປັນປະເທດໜຶ່ງທີ່ມີການພັດທະນາຢ່າງວ່ອງໄວ ແລະ ລະບົບການສຶກສາຂອງປະເທດນີ້ກໍຖືກຈັດຢູ່ໃນລະດັບຕົ້ນໆຂອງອາຊີ ເຊິ່ງເປັນສິ່ງດຶງດູດໃຫ້ຂ້າພະເຈົ້າພະຍາຍາມຊອກທຶນການສຶກສາເພື່ອຕໍ່ໃນສາຂາວິຊາທີ່ຕົນເອງສົນໃຈ, ພ້ອມດຽວກັນນັ້ນ ປະເທດເກົາຫຼີໃຕ້ ກໍຍັງມີມະຫາວິທະຍາໄລຫຼາຍໆແຫ່ງທີ່ມີຊື່ສຽງດ້ານສາຂບໍລິຫານການສຶກສາ ໂດຍສະເພາະມະຫາວິທະຍາໄລຫັນຢັງ (Hanyang University) ທີ່ຂ້າພະເຈົ້າຮຽນຢູ່ ເຊິ່ງນັ້ນກໍເປັນໜຶ່ງໃນບັນດາປັດໄຈທີ່ເຮັດໃຫ້ຂ້າພະເຈົ້າເລືອກມາສຶກສາທີ່ປະເທດນີ້.

ໄດ້ຫຍັງແດ່ຈາກການມາຮຽນຢູ່ຕ່າງປະເທດ?
ຂ້າພະເຈົ້າຄິດວ່າ ຄໍາຖາມຂໍ້ນີ້ຕອບຈັ່ງໃດກໍບໍ່ສິ້ນສຸດ ເພາະການມາຮຽນຢູ່ຕ່າງປະເທດມີຂໍ້ດີຫຼາກຫຼາຍ, ສຳລັບຂ້າພະເຈົ້າ ນອກຈາກຈະໄດ້ຄວາມຮູ້, ປະສົບການ ແລະ ແນວຄິດໃໝ່ໆແລ້ວ ການຮຽນຢູ່ຕ່າງປະເທດບໍ່ພຽງແຕ່ເປີດໂອກາດໃຫ້ຮັບຮູ້ໂລກກວ້າງຂຶ້ນ, ໄດ້ພົວພັນກັບບັນດານັກສຶກສາຈາກນາໆປະເທດ ຈຶ່ງເປັນຊ່ອງທາງໃຫ້ໄດ້ຮັບຮູ້ເຖິງຈຸດແຂງ ແລະ ຂໍ້ບົກຜ່ອງຂອງຕົນເອງ ວ່າຕົນເອງຕ້ອງພັດທະນາຈຸດດີ ແລະ ປັບປຸງຂໍ້ບົກຜ່ອງຂອງຕົນເອງແນວໃດແດ່ຈຶ່ງຈະທຽບເທົ່າກັບສາກົນໄດ້. ພ້ອມນັ້ນ ການສຶກສາຮ່ວມກັນກັບນັກສຶກສາຈາກຫຼາຍໆປະເທດໃນທົ່ວໂລກກໍຍັງເປັນຈຸດດີ ເຮັດໃຫ້ເຂົ້າໃຈ ແລະ ສໍາພັດໂດຍກົງກ່ຽວກັບວັດທະນາທຳຂອງຫຼາຍໆປະເທດໂດຍສະເພາະປະເທດເຈົ້າພາບ.

ຄວາມແຕກຕ່າງລະຫວ່າງປະເທດນີ້ກັບປະເທດລາວ?
ປະເທດເກົາຫຼີໃຕ້ມີການພັດທະນາຢ່າງຮອບດ້ານໂດຍສະເພາະທາງດ້ານເຕັກໂນໂລຊີ ແລະ ດ້ານການສຶກສາ. ທຸກໆມະຫາວິທະຍາໄລມີລະບົບຫໍສະມຸດທີ່ສະດວກ ແລະ ບໍ່ມີມື້ປິດບໍລິການ. ການຮຽນຢູ່ທີ່ນີ້ແມ່ນເນັ້ນໜັກໃຫ້ນັກສຶກສາອ່ານດ້ວຍຕົນເອງ ເຊິ່ງເປັນການປູກຈິດສຳນຶກໃຫ້ນັກສຶກສາຮັກໃນການອ່ານ ພ້ອມນັ້ນ ຫຼັກສູດການຮຽນ-ການສອນ ໂດຍສະເພາະແມ່ນພາກວິຊາທີ່ຂ້າພະເຈົ້າຮຽນຢູ່ ນັບຕັ້ງແຕ່ປື້ມແບບຮຽນຈົນ
ເຖິງພາກປະຕິບັດຕົວຈິງແມ່ນໄດ້ອີງໃສ່ ແລະ ນໍາໃຊ້ຫຼັກສູດ, ລະບົບຂອງສະຫະລັດອາເມລິກາ, ບັນດາອາຈານກໍມີວຸດທິການສຶກສາສູງ ເປັນມາດຕະຖານສາກົນ ພ້ອມດຽວກັນນັ້ນ ກໍຍັງມີອາຈານຈາກຫຼາຍໆປະເທດມາຮ່ວມສອນນໍາອີກ.

ຄິດຮອດຫຍັງຢູ່ບ້ານທີ່ສຸດ?
ການຈາກບ້ານມາເປັນເວລາເກືອບ 2 ປີ ສິ່ງທີ່ຂ້າພະເຈົ້າຄິດຮອດທຸກມື້ແມ່ນຄອບຄົວ, ໝູ່ເພື່ອນ ແລະ ອາຫານລາວທີ່ແຊບໆຈາກຄອບຄົວ.

ເວລາຢູ່ໄກບ້ານເຫັນຂໍ້ດີຂອງລາວຄືແນວໃດ?
ແນ່ນອນວ່າຢູ່ໃສກໍບໍ່ສຸກເທົ່າຢູ່ບ້ານເຮົາ, ການໃຊ້ຊີວິດຢູ່ລາວແມ່ນລຽບງ່າຍ, ສະບາຍ, ບໍ່ແອອັດ, ຄ່າຄອງຊີບກໍສົມເຫດສົມຜົນ ແລະ ບໍ່ຕ້ອງແລ່ນນຳເວລາທຸກໆຄັ້ງ ເຊິ່ງແຕກຕ່າງກັບການໃຊ້ຊີວິດຢູ່ທີ່ເກົາຫຼີຢ່າງຂາດຂັ້ນ, ຢູ່ທີ່ນີ້ ບ່ອນໃດກໍຄົນຫຼາຍ ຈະເຮັດຫຍັງກໍຕາມຕ້ອງໄດ້ແລ່ນນຳເວລາ ເຮັດຫຍັງກໍຕ້ອງໄວໆ ແລະ ທຸກຄັ້ງຈະໄດ້ຍິນຄໍາວ່າ ໄປຣລີໄປຣລີ” ເຊິ່ງແປວ່າ ໄວໄວ”ຖ້າເຮັດຫຍັງຊ້າໆແລ້ວຈະເຈີບັນຫາອາການຊ໊ອກທາງດ້ານວັດທະນາທຳ (Culture Shock) ໂດຍສະເພາະຢູ່ ລົດໄຟໃຕ້ດິນ, ຮ້ານອາຫານ ແລະ ສະຖານທີ່ທ່ອງທ່ຽວຕ່າງໆ.

ອຸປະສັກທີ່ຫຍຸ້ງຍາກທີ່ສຸດຂອງການໃຊ້ຊີວິດຢູ່ຕ່າງແດນແມ່ນຫຍັງ ? ແລະ ຜ່ານມາໄດ້ແນວໃດ?
ອຸປະສັກທີ່ຫຍຸ້ງຍາກທີ່ສຸດແມ່ນການສື່ສານ ເພາະໄລຍະທຳອິດຂ້າພະເຈົ້າຕ້ອງໄດ້ໄປຮຽນກຽມພາສາເກົາຫຼີຢູ່ຕ່າງແຂວງ ເຊິ່ງໃນເຂດນັ້ນບາງຄົນກໍສື່ສານພາສາອັງກິດບໍ່ໄດ້ດີ, ແຕ່ເມື່ອເລີ່ມພາສາເກົາຫຼີໄດ້ໄລຍະໜຶ່ງກໍເຮັດໃຫ້ສື່ສານໄດ້ ອຸປະສັກດັ່ງກ່າວກໍໝົດໄປ ແລະ ໃນປະຈຸບັນນີ້ກໍຖືວ່າບໍ່ມີອຸປະສັກໃດໆໃນການໃຊ້ຊີວິດຢູ່ທີ່ນີ້.

ເຈົ້າຄິດວ່າສິ່ງດີໆຈາກປະເທດນີ້ທີ່ຈະນຳກັບໄປນຳໃຊ້ຢູ່ປະເທດລາວແມ່ນຫຍັງ?
ມີຫຼາກຫຼາຍຢ່າງທີ່ຂ້າພະເຈົ້າຈະນຳເອົາກັບໄປໃຊ້ຢູ່ປະເທດລາວ ແຕ່ສິ່ງທີ່ສຳຄັນທີ່ສຸດກໍແມ່ນຄວາມຮູ້, ປະສົບການ ແລະ ແນວຄິດໃໝ່ໆໂດຍສະເພາະດ້ານສາຂາທີ່ຂ້າພະເຈົ້າໄດ້ສຶກສາຄົ້ນຄວ້າຢູ່ທີ່ນີ້. ຂ້າພະເຈົ້າຫວັງວ່າໃນອານາຄົດຈະມີໂອກາດໄດ້ນຳໃຊ້ວິຊາສະເພາະທີ່ຕົນຮຽນຢູ່ປະກອບສ່ວນເຂົ້າໃນວຽກງານການບໍລິຫານ ແລະ ພັດທະນາລະບົບການສຶກສາຂອງປະເທດເຮົາບໍ່ຫຼາຍກໍໜ້ອຍ.

ຫຼັງຈາກຈົບກັບມາແລ້ວຄິດວ່າຈະປະກອບອາຊີບຫຍັງ? ຍ້ອນຫຍັງ?
ຕາມຄວາມຝັນແຕ່ສະໄໝເປັນນັກຮຽນມັດທະຍົມ, ສຳລັບແຜນການໄລຍະສັ້ນ ຂ້າພະເຈົ້າຢາກເຮັດວຽກຮ່ວມກັບອົງການສາກົນໃນດ້ານການໂຄສະນາເຜີຍແຜ່ການສຶກສາໂດຍສະເພາະໃນເຂດຊົນນະບົດ. ສ່ວນແຜນການໄລຍະຍາວນັ້ນ ຂ້າພະເຈົ້າຢາກເປີດໂຮງຮຽນອະນຸບານ-ປະຖົມ ຫຼື ລະດັບມັດທະຍົມ ຢູ່ຕ່າງແຂວງຂອງປະເທດລາວ ເຊິ່ງເປັນຊ່ອງທາງໃຫ້ນັກຮຽນໃນຂົງເຂດດັ່ງກ່າວມີທາງເລືອກຫຼາຍຂຶ້ນ.

read more
Uncategorized

ອີຊູຊຸຕັ້ງເປົ້າໝາຍຄອງສ່ວນແບ່ງຕະຫຼາດ ລົດໃນລາວ 30% ໃນຫ້າປີຂ້າງໜ້າ

ລະຫວ່າງວັນທີ່ 23-26 ເມສາທີ່ຜ່ານມາ ບໍລິສັດ ຕຣີເພັດ ອີຊູຊຸ ເຊວສ໌ ຈຳກັດ ໄດ້ນຳຄະນະສື່ມວນຊົນຈາກ ສປປລາວ ທັງໝົດ 28 ທ່ານເຂົ້າຢ້ຽມຢາມສຳນັກງານໃຫຍ່ບໍລິສັດຕຣີເພັດ ອີຊູຊຸ ເຊວສ໌ ຈຳກັດ ທີ່ບາງກອກ, ໂຮງງານປະກອບລົດອີຊູຊຸທີ່ແຂວງຊະເຊີງເຊົາ ແລະ ສະໜາມທົດທອງລົດຂັບເຄື່ອນສີ່ລໍ້ທີ່ພັດທະຢາ, ແຂວງຊົນບຸລີ, ປະເທດໄທ.

ທ່ານ ນາງ ປະນັດດາ ເຈນນະວາສັນ ຮ້ອງຜຸ້ຈັດການບໍລິສັດ ຕຣີເພັດ ອີຊູຊຸ ເຊວສ໌ ຈຳກັດກ່າວວ່າ: ບໍລິສັດ ຕຣີເພັດ ອີຊູຊຸ ເຊວສ໌ ຈຳກັດໄດ້ສ້າງຕັ້ງຂຶ້ນເມື່ອວັນທີ່ 22 ພະຈິກ ປີ 1974. ເປັນການຮ່ວມມືລະຫວ່າງ ບໍລິສັດການຄ້າຄົບວົງຈອນຍັກໃຫຍ່ຂອງໂລກຄື: ບໍລິສັດມິດຊູບິຊິ ຄໍຣ໌ປໍເຣຊັນ ແລະ ບໍລິສັດ ອີຊູຊຸມໍເຕີ (ປະເທດຍີປຸ່ນ) ຜູ້ຜະລິດເຄື່ອງຈັກກາຊວນ ແລະ ລົດເພື່ອການຄ້າຊັ້ນນຳຂອງໂລກ ເພື່ອດຳເນີນທຸລະກິດຈຳໜ່າຍ (The Sole Distributor) ລົດກະບະ, ລົດນັ່ງອະເນກປະສົງ, ລົດບັນທຸກຂະໜາດກາງ ແລະ ຂະໜາດໃຫຍ່ ຍີຫໍ້ ອີຊູຊຸ ພຽງຜູ້ດຽວໃນປະເທດໄທ, ປະຈຸບັນມີເຄື່ອຂ່າຍການຈຳໜາຍ, ຫ້ອງວາງສະແດງ ແລະ ສູນບໍລິການອີຊູຊຸຫຼາຍກວ່າ 300 ແຫ່ງທົ່ວປະເທດໄທ. ລົດອີຊູຊຸດັ່ງກ່າວຜະລິດ ແລະ ປະກອບໂດຍບໍລິສັດຄູ່ຄ້າທີ່ສຳຄັນຄື: ບໍລິສັດອີຊູຊຸ ມໍເຕີ (ປະເທດໄທ) ຈຳກັດ ເຊິ່ງມີໂຮງງານປະກອບລົດ ຈຳນວນ 2 ແຫ່ງທີ່ແຂວງສະໝຸດປາການ ແລະ ແຂວງຊະເຊີງເຊົາ ເຊິ່ງເຮັດໜ້າທີ່ຜະລິດ ແລະ ປະກອບລົດອີຊູຊຸ ເພື່ອປ້ອນຕະຫຼາດໃນປະເທດໄທ ແລະ ຕະຫຼາດທົ່ວໂລກ.

ໂດຍຕະຫຼອດໄລຍະເວລາ 60 ປີທີ່ໄດ້ສ້າງຄວາມເຂັ້ມແຂງໃຫ້ກັບລົດຍີຫໍ້ອີຊູຊຸຈົນກາຍເປັນໜຶ່ງໃຫ້ລົດຍີ່ຫໍ້ລົດຊັ້ນນຳຂອງປະເທດໄທ ແລະ ໄດ້ຮັບຄວາມເຊື່ອໝັ້ນຢ່າງສູງຈາກຜູ້ຊົມໃຊ້ລົດຊາວໄທ. ເຊິ່ງນອກຈາກຈະເປັນຜູ້ນຳດ້ານນະວັດຕະກຳສ້າງຄວາມແປກໃຫມ່ໃຫ້ກັບຕະຫຼາດລົດເມືອງໄທຕະຫຼອດມາແລ້ວບໍລິສັດຍັງເປັນຜູ້ສ້າງຄວາມສຳເລັດໃຫ້ກັບລົດອີຊູຊຸ ທຸກລຸ້ນ ບໍ່ວ່າພາວະເສດຖະກິດຈະເປັນແນວໄດກໍ່ຕາມ.

ທ່ານ ອາຄິຣະ ໂອດາງາກິ ຜູ້ຈັດການທົ່ວໄປ ບໍລິສັດ ຕຣີເພັດ ອີຊູຊຸ ເຊວສ໌ ຈຳກັດ ທັງເປັນຜູ້ຮັບຜິດຊອບຕະຫຼາດໃນປະເທດລາວ ແລະ ກຳປູເຈຍ ກ່າວວ່າ: ຕຣີເພັດ ອີຊູຊຸ ເຊວສ໌ ມີນະໂຍບາຍທີ່ຈະສ້າງຄວາມເປັນເລີດໃຫ້ກັບຍີ່ຫໍ້ ອີຊູຊຸ ໃນ ສປປ ລາວ ໂດຍຍຶດຫລັກຕາມປັດຊະຍາໃນການດຳເນີນທຸລະກິດຕະຫຼອດ 6 ທົດສະວັດທີ່ຜ່ານມາ, ນັ້ນຄື: “ວີຖີອີຊູຊຸ-ຜູ້ໃຊ້ສຸກໃຈ ເພິ່ມພູນລາຍໄດ້ ຊ່ວຍໃຫ້ສັງຄົມພັດທະນາ” ທັງນີ້ກໍເພື່ອຍົກລະດັບມາດຕະຖານການດຳເນີນງານຂອງຜູ້ຈຳໜ່າຍ ອີຊູຊຸ ທັງໃນດ້ານການຂາຍ ແລະ ການບໍລິການຫຼັງການຂາຍ. ທ່ານ ອາຄິຣະ ກ່າວຕື່ມວ່າ ປະຈຸບັນທ່າງບໍລິດສັດສາມາດຄອງສ່ວນແບ່ງຕະຫຼາດລົດໃນລາວ 15% ແລະ ໄດ້ມີແຜນກະຕຸ້ນການຂາຍເພື່ອທີ່ຈະຄອງສ່ວນແບ່ງຕະຫຼາດລົດໃນລາວ 30% ໃນ 5 ປີຂ້າງໜ້າດ້າວການນຳສະເໝີຜະລົດຕະພັນອັນສຸດຍອດໃຫ້ກັບຊາວລາວນັ້ນຄື: ລົດກະບະ ໃໝ່ ອີຊູຊຸດີແມັກບລູພາວເວີ ແລະ ລົດອະເນກປະສົງ ໃໝ່ ອີຊູຊຸມິວ-ເອັກ ບລູພາວເວີ ນະວັດຕະກຳທີ່ເຕັມໄປດ້ວຍຄວາມຄຸ້ມຄ່າ ແລະ ສະມັດຖະນະເໝືອຊັ້ນ ຂອງເຄືອງຈັກ ບລູພາວເວີທີ່ພັດທະນາໃໝ່ ອັນມີຊື່ສຽງໃຫ້ພະລັງ ແຮງ, ປະຢັດ ແລະ ຕອບໂຈດຂອງຜູ້ໃຊ້ລົດທີ່ມາພ້ອມກັບ Isuzu Insight ເຕັກໂນໂລຊີແຫ່ງອານາຄົດໜຶ່ງດຽວທີ່ມີສະ ເພາະໃນລົດອີຊູຊຸ ທີ່ເຮັດໜ້າທີ່ໃນການບັນທຶກພຶດຕິກຳການຂັບຂີ່ຂອງຜູ້ໃຊ້ລົດ ແລະ ສະຫຼຸບອອກມາເປັນລາຍງານການຂັບຂີ່ທີ່ເຂົ້າໃຈງ່າຍ ເພື່ອໃຫ້ຜູ້ໃຊ້ລົດສາມາດນຳມາພັດທະນາພຶດຕິກຳການຂັບຂີ່ໃຫ້ດີຂື້ນ, ປະຍັດນຳມັນຫຼາຍຂື້ນ ແລະ ປອດໄພຫຼາຍຂື້ນ. 

ຂໍ້ມູນ ແລະ ພາບໂດຍ: Pong Phoonsab

read more
Uncategorized

ສະຫຼຸບ Barcamp Vientiane

ຜ່ານໄປແລ້ວ, ກັບງານ Barcamp Vientiane ງານໃຫຍ່ເພື່ອສັງຄົມປະຈໍາປີ 2017ຊຶ່ງໄດ້ຈັດຂຶ້ນໃນວັນທີ 1/4/2017 ກົງກັບ ວັນຂີ້ຕົວະສາກົນ ທີຜ່ານມານີ້ (ງານນີ້ຈັດແທ້ບໍ່ໄດ້ຕົວະໃດ໋ ຮ່າຮ່າຮ່າ) ທີ່ວິທະຍາໄລລາວ-ທັອບ ຮູ້ຈັກກັບບາແຄັມກັນກ່ອນເລີຍ

Barcamp Vientiane?
ງານ ບາແຄັມ ແມ່ນງານລະດັບສາກົນເທິງພື້ນຖານແນວຄິດໃຫມ່ ແລະ ການຮ່ວມປະຊຸມທີ່ຜູ້ເຂົ້າຮ່ວມຈະເປັນຜູ້ກຳໜົດຫົວຂໍ້ໃນການສົນທະນາເອງ, ເຊິ່ງຈະກ່ຽວກັບເຕັກໂນໂລຢີແບບເປີດ ກວ້າງ, ເຕັກໂນໂລຢີການພັດທະນາເວັບໄຊທ໌, ລະບົບເຄືອຂ່າຍສັງຄົມໃນອິນເຕີເນັດ ແລະ ຫົວຂໍ້ອື່ນໆທີ່ຜູ້ເຂົ້າຮ່ວມສົນໃຈ ເຊັ່ນຫົວຂໍ້ກ່ຽວກັບວັດທະນະທຳ ແລະ ສັງຄົມ ກໍ່ມີການໂອ້ລົມໃນງານບາແຄ້ມຢູ່ປະເທດໃນເອຊີ ໂດຍແນໃສ່ບຸກຄົນທີ່ສົນໃຈທາງດ້ານຄອມພິວເຕີ, ຜູ້ຊົມໃຊ້ອິນເຕີເນັດ, ນັກເຕັກໂນໂລຢີ, ຜູ້ປະກອບການ, ນັກຂ່າວຍຸກດິຈິຕອນ, ນັກພັດທະນາເວັບໄຊທ໌ ແລະ ຊາວອິນເຕີເນັດມາຮ່ວມແບ່ງປັນ ແລະ ຮຽນຮູ້ເຕັກໂນໂລຢີຕ່າງໆໃນບັນຍາກາດທີ່ເປັນກັນເອງ. ໂດຍມີການສະໜັບສະໜູນຈາກຫຼາຍພາກສ່ວນຈະເປັນການເປີດໃຫ້ທຸກຄົນສະເໜີຫົວຂໍ້ຂອງຕົວເອງ ແລະ ໂຫວດກັນຖ້າຫົວຂໍ້ໃດມີຄົນສົນໃຈຫຼາຍ ຫົວຂໍ້ນັ້ນກໍຈະສາມາດຂື້ນນໍາສະເໜີແກ່ທຸກຄົນໄດ້ ສໍາລັບຫ້ອງທີຈະນໍາສະເໜີນັ້ນແມ່ນຂຶ້ນກັບຈໍານວນຄົນໂຫວດເລີຍ. ຍິ່ງຍອດໂຫວດ ຫຼື ວ່າມີຄົນສົນໃຈຫຼາຍກໍຈະສາມາດສະເໜີທີມງານເພື່ອນໍາໃຊ້ຫ້ອງໃຫຍ່ໄດ້ ແລະ ຫົວຂໍ້ໃນປີນີ້ ຫົວຂໍ້ທີຈະນໍາສະເໜີນັ້ນສາມາດສະເໜີໄດ້ຫາຍໆດ້ານ ຫຼາຍໆຢ່າງ ແຕ່ກໍມີກົດລະບຽບຂອງງານກໍຄືວ່າ ເຮົາສາມາດສະເໜີຫົວຂໍ້ໃດ ກໍໄດ້ແຕ່ຕ້ອງບໍ່ຂັດກັບກົດໝາຍບ້ານເມືອງ ຫຼື ການຍຸແຍປຸກລະດົມມວນຊົນໃນທາງທີບໍ່ດີ ນອກຈາກການນໍາສະເໜີຫົວຂໍ້ຕ່າງໆແລ້ວ ພາຍໃນງານກໍຍັງມີກິດຈະກໍາທີຫຼາກຫຼາຍເລີຍບໍ່ວ່າຈະເປັນ: ການຫຼິ້ນບອດເກມ ໆລໆ XD ແລະ ກໍມີບູດຕ່າງໆຂອງຜູ້ໃຫ້ການສະໜັບສະໜູນ .

ບາແຄັມໃຫ້ຫຍັງແນ່?

ນອກຈາກເສື້ອ ແລະ ຄູປ່ອງຂອງກິນແລ້ວ. ສິ່ງໄດ້ຈາກງານບາແຄັມຫຼັກໆກໍຈະເປັນຄວາມຮູ້ ຄຽງຄູ່ໄປພ້ອມຄວາມບັນເທີງຈາກທັ້ງຜູ່ຂື້ນໄປເວົ້າເອງ ແລະ ການຮ່ວມຫຼິ້ນເກມບອດ ໆລໆ. ທີສໍາຄັນກໍເປັນການເປີດກວ້າງຄວາມຮູ້ແກ່ຜູ້ເຂົ້າຮ່ວມຟັງການບັນຍາຍ. ນີ້ກໍເປັນສະເໜ່ຢ່າງໜື່ງຂອງງານບາແຄັມ. ແລ້ວພົບກັນໃໝ່ 🙂


ບົດແລະພາບຈາກ

ສະຫຼຸບງານ Barcamp Vientiane 2017

read more
Uncategorized

ການເຂົ້້າຮ່ວມໂຄງການ JENESYS ທີ່ປະເທດຍີ່ປຸ່ນ ໃນຫົວຂໍ້ ເສດຖະກິດ ແລະ ການທ່ອງທ່ຽວ

ຈຸດເລີ່ມຕົ້ນຂອງໂຄງການ JENESYS ແມ່ນເກີດຈາກແນວຄວາມຄິດຂອງທາງລັດຖະບານຍີ່ປຸ່ນຮ່ວມມືກັບອົງການ JICE ທີ່ເລັງເຫັນເຖິງຄວາມອາດສາມາດທີ່ຈະສານສຳພັນທະໄມຕີ ແລະ ແລກປ່ຽນຄວາມຮູ້ ທາງດ້ານວັດທະນະທຳຂອງແຕ່ລະປະເທດ ທີ່ເຂົ້າຮ່ວມໂຄງໃນການ ໂດຍອີງໃສ່ການສົ່ງເສີມຄວາມຮູ້ຄວາມເຂົ້າໃຈທາງດ້ານຊີວິດການເປັນຢູ່, ວັດທະນະທຳ ແລະ ເສດຖະກິດຂອງປະເທດຍີ່ປຸ່ນເປັນຕົ້ນ. ໂຄງການນີ້ແມ່ນເລີ່ມຕົ້ນກໍ່ຕັ້ງຂຶ້ນໃນປີ 2007 ໂດຍເລີ່ມຈາກຂອບເຂດປະເທດລຸ່ມແມ່ນ້ຳຂອງ ແລະ ປະຈຸບັນໄດ້ກ້າວຂະ
ຫຍາຍໄປສູ່ປະເທດໃນອາຊຽນ.
ໂຄງການ JENESYS2016 ນີ້ ແມ່ນຫົວຂໍ້ ເສດຖະກິດ ແລະ ການທ່ອງທ່ຽວ ເຊິງມີ13ປະເທດເຂົ້າຮ່ວມຄື: ບຣູໄນທ໌, ກຳປູເຈຍ, ອິນເດຍ, ອິນໂດເນເຊຍ, ລາວ, ມາເລເຊຍ, ມຽນມາ, ສິງກະໂປ, ໄທ, ຟີລິບປິນ, ຕີມໍ-ເລັດສະເຕ, ຫວຽດນາມ ແລະ ລວມທັງປະເທດເຈົ້າພາບເອງ (ຍີ່ປຸ່ນ). ຂ້າພະເຈົ້າ ນ. ດວງນາລີ ແກ້ວກາໃຈ ໃນນາມສື່ຈາກວາລະສານ 108 ກໍ່ໄດ້ຮັບເຊີນເຂົ້າຮ່ວມ.
ປະເທດລາວທີ່ເຂົ້າຮ່ວມໂຄງການທັງໝົດມີ 28 ຄົນ ມີທັງພາກລັດ ແລະ ເອກະຊົນທີ່ມາຈາກຫຼາກຫຼາຍພາກສ່ວນ. ໃນມື້ທຳອິດທີ່ເດີນທາງຮອດປະເທດຍີ່ປຸ່ນ ພວກເຮົາໄດ້ເຂົ້າຮ່ວມຟັງຄຳບັນຍາຍເພື່ອຮຽນຮູ້ກ່ຽວກັບຂໍ້ມູນທີ່ສຳຄັນທາງດ້ານເສດຖະກິດ ການຄ້າ, ການທ່ອງທ່ຽວຂອງປະເທດຍີ່ປຸ່ນ ທີ Tower Hall Funabori. ຜ່ານການຟັງຄຳບັນຍາຍບວກກັບການສັງເກດ ການໃຊ້ຊີວິດການເປັນຢູ່ຂອງຄົນຍີ່ປຸ່ນ ເຮັດໃຫ້ເຮົາໄດ້ຮູ້ ແລະ ເຂົ້າໃຈຫຼາຍຂື້ນ ຍີ່ປຸ່ນເປັນປະເທດທີ່ມີການວາງແຜນຜັງຂອງປະເທດໄດ້ດີ, ສວຍງາມ ສະອາດ ເປັນລະບຽບ ແລະ ຖືເອົາເວລາເປັນເລື່ອງທີ່ສຳຄັນ. ຄົນຍີ່ປຸ່ນຈະນິຍົມໃຊ້ລົດຖີບເປັນຍານພະຫະນະ ແລະ ຕາມຖະໜົນຫົນທາງກໍ່ມີຜູ້ຄົນຢ່າງສວນໄປມາຫຼາຍ ແຕ່ກໍ່ບໍ່ວຸ້ນວານ ກົງກັນຂ້າມພັດມີຄວາມຮູ້ສຶກສະຫງົບເພາະຄົນສ່ວນຫຼາຍບໍ່ຄ່ອຍລົມກັນຫຼືໃຊ້ສຽງດັງແຕ່ຈະໃຊ້ເວລາໄປກັບການອ່ານໜັງສືເປັນສ່ວນຫຼາຍ. ໃນໂຄງການນີ້ປະເທດລາວແມ່ນເຂົ້າຮ່ວມໃນນາມສື່ມວນຊົນ ແລະ ການທ່ອງທ່ຽວຈຶ່ງໄດ້ມີໂອກາດໄປຢ້ຽມຊົມສະຖານທີ່ທ່ອງທ່ຽວໃນເຊີງອານຸລັກຢູ່ທີ່ພາກ Kansai ທີ່ມີຄວາມຫຼາກຫຼາຍ ບໍ່ວ່າຈະເປັນການທ່ອງທ່ຽວແບບສີຂຽວ ການຢ້ຽມຢາມບ້ານປະຊາຊົນ ຫຼື ຈະພັກແບບ Homestay ກໍ່ໄດ້. ທາງຍີ່ປຸ່ນເພິ່ນໄດ້ມີການວາງແຜນສ້າງການທ່ອງທ່ຽວແບບໃຫມ່ ຄຽງຄູ່ໄປພ້ອມກັບການທ່ອງທ່ຽວທີ່ມີຢູ່ໃນປະຈຸບັນ ເພື່ອສົ່ງເສີມໃຫ້ຄົນເຂົ້າມາທ່ອງທ່ຽວຍີ່ປຸ່ນເພິ່ມຂຶ້ນເພື່ອກຽມພ້ອມຕ້ອນຮັບການເປັນເຈົ້າພາບຈັດງານແຂ່ງຂັນໂອລິມປິກປີ 2020ນີ້. Jenesys2016 ນີ້ເຮົາໄດ້ໄປສະຖານທີ່ທ່ອງທ່ຽວທີ່ສຳຄັນຫຼາຍບ່ອນ ເຊັ່ນ:

1. Hino Town or Koka City
ເຊິ່ງເພີ່ນຈະເອົາຈຸດເດັ່ນທີ່ສຳຄັນຂອງເມືອງມາເປັນຈຸດຂາຍໃຫ້ນັກທ່ອງທ່ຽວ. ໝູ່ບ້ານສະຫງົບງຽບເໝາະແກ່ການມາພັກຜ່ອນ ແລະ ທີ່ສຳຄັນເພີ່ນຍັງສົ່ງເສີມໃຫ້ຊາວບ້ານມາເຮັດການທ່ອງທ່ຽວແບບ Homestay ແລະ ແນ່ນອນວ່າພວກເຮົາກໍ່ໄດ້ໄປສຳພັດເຖິງບັນຍາກາດນັ້ນ ເຖິງເປັນພຽງເວລາສັ້ນໆ ແຕ່ເຮັດໃຫ້ເຮົາຮູ້ເຖິງວິຖີຊີວິດການເປັນຢູ່ຂອງຄົນໃນຂົງເຂດນັ້ນ, ໄດ້ເຮັດກິດຈະກຳຮ່ວມກັບຄອບຄົວຄົນຍີ່ປຸ່ນຫຼາຍຢ່າງ ສຳລັບຂ້າພະເຈົ້າເອງຮູ້ສຶກດີ ຫລົງໄຫລ ແລະ ຜູກພັນກັບຄອບຄົວຄົນຍີ່ປຸ່ນ. ຖ້າໃຜມີໂອກາດຢາກໃຫ້ລອງໄປສຳພັດບັນຍາກາດແບບນີ້ເບິ່ງເດີ້.

2. Osaka Castle
ປະສາດໂອສະກ້າ ເປັນໜຶ່ງໃນສະຖານທີ່ສຳຄັນທີ່ມີສື່ສຽງຂອງຍີ່ປຸ່ນ ເປັນປະສາດທີ່ຕັ້ງສູງສະຫງ່າແລະສວຍງາມ ເມື່ອເຂົ້າໄປດ້ານໃນຈະໄດ້ຮຽນຮູ້ປະ
ຫວັດຄວາມເປັນມາ ແລະ ວິຖີຊີວິດຂອງຄົນສະໄຫມເກົ່າ ທີ່ເລົ່າຜ່ານຈໍພາບສາມມິຕິ ຖືໄດ້ວ່າເປັນທັງແຫຼ່ງຄວາມຮູ້ ແລະ ສະຖານທີ່ທ່ອງທ່ຽວໄດ້ໃນໜຶ່ງດຽວ ນັບໄດ້ວ່າເປັນສະຖານທີ່ທີ່ຄວນແກ່ການໄປທ່ຽວຊົມ.

3. Todai-ji Temple
ຕັ້ງຢູ່ເມື່ອງນາລະທີ່ຂຶ້ນຊື່ວ່າເປັນເມືອງຂອງກວາງ ເພາະມີກວາງຢ່າງຫລວງຫຼາຍຍ່າງຕາມຖະໜົນຫົນທາງ ແລະ ສະຖານທີ່ຕ່າງໆລວມທັງສວນທາງຍາງ ກ່ອນເຂົ້າເຖິງປະຕູກໍ່ມີກວາງຢູ່ເຊັ່ນກັນ ຖ້າໃຜຢາກໃຫ້ອາຫານກໍ່ສາມາດໃຫ້ໄດ້ ເພາະຈະມີຈຸດຂາຍອາຫານສຳລັບກວາງໄວ້ບໍລິການ
ໃຫ້ນັກທ່ອງທ່ຽວ. ວັດ Todai-ji ກໍ່ນັບເປັນອີກສະຖານທີໜຶ່ງທີ່ສຳຄັນ ເປັນວັດທາງພຸດທະສາດສະໜາທີ່ສັບຊ້ອນຊຶ່ເຄີຍເປັນໜຶ່ງໃນມະຫາວິຫານຂະໜາດໃຫຍ່ເຈັດແຫ່ງທີ່ຕັ້ງຢູ່ໃນເມືອງນາລະປະເທດຍີ່ປຸ່ນ ຈະມີປະຕູທາງເຂົ້າທີ່ມີຂະໜາດໃຫຍ່ສ້າງດ້ວຍໄມ້ທັງໝົດ ອາຄານຫລັກຂອງວັດກໍ່ເປັນອາຄານໄມ້ທີ່ໃຫຍ່ທີ່ສຸດໃນໂລກ ພາຍໃນອາຄານຈະເຫັນພະພຸດທະຮູບອົງໃຫຍ່ມີຂະໜາດຄວາມສູງເຖິງ 15ແມັດ ນັບໄດ້ວ່າເປັນພະພຸດທະຮູບທີ່ໃຫຍ່ທີ່ສຸດໃນຍີ່ປຸ່ນ ຊຶ່ງເປັນທີ່ຮູ້ຈັກໃນພາສາຍີ່ປຸ່ນວ່າ Daibutsu ນອກນັ້ນພາຍໃນຍັງມີເສົາຕົ້ນໜຶ່ງທີ່ມີຊ່ອງຂະໜາດໃຫຍ່ ຕາມຄວາມເຊື່ອກັນວ່າຖ້າໃຜລອດຜ່ານຊ່ອງຂອງເສົາຕົ້ນນັ້ນໄດ້ຈະມີໂຊກລາບ, ສຸຂະພາບແຂງແຮງ.

4. Saidai-ji Temple
ຈະມີລະບຽບວິໃນຢ່າງເຄັ່ງຂັດ ແລະ ຫ້າມດື່ມສິ່ງມືນເມົາ. ດັ່ງນັ້ນ ເພິນຈຶ່ງຈັດຫ້ອງໂຖງສຳລັບລ້ຽງນ້ຳຊາ ທີ່ມີຖ້ວຍນ້ຳຊາຂະໜາດໃຫຍ່ (ເສັ້ນຜ່າສູນກາງ 40 cm) ເຮັດໃຫ້ຜູ້ທີ່ໄປຮ່ວມງານຕ້ອງຊ່ວຍກັນຍົກຖ້ວຍນ້ຳຊາເພື່ອດື່ມ ສ້າງໃຫ້ເຫັນເຖິງມິດຕະພາບ, ສຽງຫົວ ແລະ ຄວາມມ່ວນຊື່ນ ທີ່ເກີດຂຶ້ນດ້ວຍໃຈຢ່າງແທ້ຈິງ.

5. Kiyomizu-dera Temple
ວັດນີ້ເປັນສ່ວນໜຶ່ງຂອງອານຸສອນສະຖານໂບຮານ ແລະ ຖືໄດ້ວ່າເປັນມໍລະດົກໂລກຂອງເມືອງກຽວໂຕ ຖືກສ້າງໃນບໍລິເວນນ້ຳຕົກ Otowa ທາງພາກຕາເວັນອອກຂອງເມືອງກຽວໂຕ ທີ່ວັດນີ້ໄດ້ມີການສ້າງລະບຽງໄມ້ຍື່ນອອກທາງນອກອາຄານເຮັດໃຫ້ສາມາດຊົມວິວທິວທັດທີ່ສວຍງາມໄດ້ຢ່າງເຕັມຕາ. ນອກຈາກນັ້ນ ດ້ານຫລັງຂອງອາຄານຍັງມີທີ່ຕັ້ງຂອງສານເຈົ້າ Jishu ທີ່ອຸທິດຕົນເພື່ອເທບແຫ່ງຄວາມຮັກ ແລະ ການຈັບຄູ່ ໜ້າສານເຈົ້າມີດິນສອງກ້ອນທີ່ຕັ້ງຫ່າງກັນປະມານ 18 ແມັດ ເຊິ່ງມີຄວາມເຊື່ອວ່າຖ້າຢືນຢູ່ກ້ອນຫີນທີ່ເປັນຈຸດເລິ່ມຕົ້ນຫລັບຕາອາທິຖານກ່ຽວກັບເລື່ອງ
ຄວາມຮັກ ແລ້ວຍ່າງໄປຫາຫິນອີກກ້ອນທີ່ເປັນຈຸດສີ້ນສຸດໂດຍບໍ່ຫລົງໄປທາງອື່ນ ຄຳອະທິຖານຈະກາຍເປັນຈິງ ແຕ່ຖ້າຫາກມີຄົນຊ່ວຍຊີ້ທາງກໍ່ປຽບເໝືອນຄວາມຮັກຕ້ອງມີສື່ກາງປະສານຮັກໃຫ້ສົມຫວັງ ແລະ ໃນສານເຈົ້າຍັງມີຂອງທີ່ລະລຶກ ເຄື່ອງລາງ ສາມາດເລືອກຊື້ກັນຢ່າງຫຼວງຫຼາຍ.
ນອກນັ້ນວັດ Kiyomizu-dera ຂຶ້ນຊື່ວ່າເປັນແຫຼ່ງນ້ຳທີ່ບໍລິສຸດ ແລະ ມີບໍນ້ຳໃສທີ່ໄຫລອອກມາຈາກສາມຊ່ອງ ມີຄວາມເຊື່ອກັນວ່າຖ້າຂໍພອນແລ້ວດື່ມນ້ຳໃນຊ່ອງໃດໜຶ່ງພອນນັ້ນກໍ່ຈະກາຍເປັນຈິງ ຕາມທີ່ຂ້າພະເຈົ້າໄດ້ສອບຖາມມາຫຼາຍຄົນກໍ່ມີຄວາມເຊື່ອແຕກຕ່າງກັນ ຈະມີຊ່ວຍໃນເລື່ອງສຸຂະພາບ, ການຮຽນການສຶກສາ, ສົ່ງເສີມດ້ານການເງິນສັບສິນ, ອຳນາດເງິນຄຳ ແຕ່ແທ້ສຸດແລ້ວກໍ່ຖືວ່າແມ່ນບໍ່ນ້ຳອັນບໍລິສຸດ ແລະ ສັກສິດຄືກັນ.ຍີ່ປຸ່ນຈຶ່ງເປັນອີກປະເທດໜຶ່ງທີ່ຂໍແນະນຳໃຫ້ບັນດາທ່ານຫາໂອກາດໄປທ່ຽວໃຫ້ໄດ້ຄັ້ງໜຶ່ງໃນຊີວິດ.

ລາຍງານໂດຍ ນ.ດວງນາລີ
ທີມງານວາລະສານ 108

read more
1 2 3 10
Page 1 of 10