close
Cover Story

DJ Window ຜູ້ບໍ່ເຄີຍຢຸດຝັນ ເລື່ອງສຽງເພງ

ໃນສັງຄົມມີຫຼາຍຫຼາກອາຊີບ ທີ່ທຸກຄົນສາມາດເລືອກເຮັດ ຫຼື ເລືອກສ້າງໄດ້ຈາກຄວາມມັກ ປະດິດປັ້ນແຕ່ງຂຶ້ນມາ ຕາມຄວາມສໍານານຂອງແຕ່ລະຄົນ, ບາງຄົນບໍ່ໄດ້ມີພອນສະຫວັນໃນດ້ານນັ້ນໆມາຕັ້ງແຕ່ກໍາເນີດ ແຕ່ພອນສະແຫວງໃນການຊອກຮູ້, ຝຶກຝົນພັດທະນາ ກໍ່ສາມາດເຮັດໃຫ້ເກີດຄວາມຊໍານານ ແລະ ສ້າງເປັນອາຊີບໄດ້ເຊັ່ນດຽວກັນ. ມື້ນີ້ທີມງານພວກເຮົາຈະພາທຸກທ່ານມາຮູ້ຈັກກັບອີກໜຶ່ງອາຊີບ ກ່ຽວກັບສຽງເພງ, ຄວາມມ່ວນຊື່ນ, ການສ້າງສັນສິລະປະແນວຄວາມຄິດ ເພື່ອໃຫ້ຄົນອ້ອມຂ້າງ ມ່ວນຊື່ນໄປພ້ອມໆກັນ ນັ້ນຄື “DJ”.

ມື້ນີ້ພວກເຮົາຈະພາທຸກທ່ານມາຮູ້ຈັກກັບ ສອນພິທັກ ຫຼວງສຸວັນນະວົງ ທີ່ຄົນຮຸ້ຈັກກັນໃນຊື່ DJ Window ອາຍຸ 22 ປີ ເປັນ DJ/Producer ຫຼື ເວົ້າໄດ້ວ່າເປັນທັງດີເຈແລະນັກແຕ່ງເພງ ນອກຈາກນັ້ນ ແມ່ນບໍ່ລິຫານວິທະຍາໄລ ມາຕິດຕາມພ້ອມໆກັນວ່າ ຈຸດເລີ່ມຕົ້ນຂອງ DJ Window ກ່ອນເຂົ້າວົງການ ແລະ ພວກເຮົາຈະພາມາຮຸ້ຄວາມລັບຂອງອາຊິບນີ້ວ່າເຮັດຫຍັງໄດ້ແດ່ ? ແລະ ເພີ່ນແບ່ງເວລາແນວໃດໃນການເຮັດໃນສິ່ງທີ່ມັກ ພ້ອມໆກັບພາລະໜ້າທີ່ຕົນເອງ.

DJWindow– ປະຫວັດຂອງ DJ Window

ຂ້າພະເຈົ້າ ຮຽນຈົບໄອທີ ວິທະຍາໄລສອນພິທັກລາວ ແລະ ຮຽນຈົບການບັນຊີທີ່ວິທະຍາໄລເຕັກນິກປາກປ່າສັກ ເຊິ່ງໃນຕອນນີ້ກໍ່ທັງບໍລິຫານວິທະຍາໄລແລ້ວກໍແຕ່ງເພງແນວ EDM ໄປນຳ.

ຈຸດເລີ່ມຕົ້ນກ່ອນຈະມາເປັນ DJ Window ໃນມື້ນີ້

ການເລີ່ມຕົ້ນເປັນດີເຈ Window ແມ່ນທໍາອິດເລີຍ ເລິ່ມຟັງແນວ EDM (Electronic Dance Music) ໃນປີ 2011 ເພາະໄດ້ເຫັນ DJ Leng ແລະ DJ Taiy ໂພສແຊຣກ່ຽວກັບແນວເພງນີ້ຕະຫຼອດ ພ້ອມກັບເຫັນໄປຫຼີ້ນຢູ່ງານປີໃໝ່ລາວ. ຈາກຈຸດນັ້ນເອງທີ່ເຮັດໃຫ້ Windowເລີ່ມຕົ້ນຄ່ອຍໆເລີ່ມຮຽນຮູ້ ສຶກສາ, ແລ້ວກໍ່ໄປຫ້ອງຊ້ອມຂອງ DJ Olay ແລະ ເບິ່ງວິດີໂອຈາກດີເຈທົ່ວໂລກ, ປະສົມປະສານໃນການຕໍ່ເພງໜຶ່ງໄປອີກເພງໜຶ່ງ. ຈົນມາຮອດໄລຍະປີ 2013 ໄດ້ເຫັນວິດີໂອດີເຈລະດັບໂລກໄປຫຼີ້ນງານໃຫຍ່ເຊັ່ນ: Tomorrowland , Ultra Music Festival ກໍ່ເລີຍເຮັດໃຫ້ Window ກ້າວເຂົ້າມາສຶກສາໃນເລື່ອງການແຕ່ງເພງພ້ອມກັບຮຽນຮູ້ Piano Instruments ໄປນຳ.

ຫຼາຍໆຄົນອາດຈະສົງໄສວ່າ idol ຂອງ Window ແມ່ນໃຜ? Window ເອງມັກຫຼາຍຄົນ ແຕ່ Hardwell ແມ່ນເປັນຕົ້ນສະບັບໃຫ້ກັບ Window ເລີຍ.

DJWindow

ແນະນໍາກ່ຽວກັບອາຊີບ DJ

ປັດຈຸບັນ ຖືໄດ້ວ່າ ອາຊີບດີເຈຈັດເປັນໜຶ່ງອາຊີບທີ່ໄດ້ຮັບຄວາມສົນໃຈສູງໃນໝູ່ໄວລຸ່ນ ເພາະງານທີ່ມີລັກສະນະເປັນເອກະລັກສະເພາະຕົວ ຕ້ອງຢູ່ກັບດົນຕີ ແລະ ສຽງເພງຫຼາຍຫຼາຍແນວ. DJ ຫຍໍ້ມາຈາກ Disc Jockey ເຊິ່ງໄວລຸ່ນບໍ່ວ່າຈະຍຸກໃດສະໄໝໃດ ຍ່ອມໃຫ້ຄວາມສຳຄັນ ແລະ ມັກໃນສຽງເພງສະເໝີ ເອີ້ນໄດ້ວ່າໄວລຸ່ນກັບເພງເປັນຂອງຄູ່ກັນຈົນແຍກບໍ່ອອກ, DJ ບາງຄົນກໍ່ສ້າງເພງໃໝ່ຂຶ້ນມາເປັນຂອງຕົວເອງ ກາຍເປັນສິລະປິນ ຫຼື ເອີ້ນວ່າ DJ/Producer ທີ່ມີຄວາມສາມາດທາງການປະພັນດົນຕີເປັນ Music Composer ຢູ່ໃນຕົວ.

ຜົນງານເພງທຳອິດມີເພງ

– Window – Hacked

– Window & BabyMax – Stampuhh

– Youn – Dynamite (Window Edit)

– Window & Macc – Together We Rave

– Taiy PP – Time Up (Window Tropical Remix)

– Youn – Power X (Window Edit)

– Window & Youn – Volcano

– Clean Bandit Feat.Zara Larzon – Symphony (Window & Youn Remix)

ແລ້ວກໍ່ມີຜົນງານເພງຈາກຄ້າຍເພງຂອງ Window ຊື່ວ່າ Stampuhh Recordings

1.Youn – Dynamite (Window Edit)

2.Vone – Drop The Bass

3.Vone – Clap Your Hands

4.BabyMax – Go Away

5.Omarilzz – Trippy Way

6.BetaBeat – Time

ເລົ່າເຖິງຜົນງານດີເດັ່ນໃນປັດຈຸບັນທີ່ກໍາລັງເປັນທີ່ຈັບຕາ

ຜົນງານເພງທີ່ຕິດ Beatport Top 100 Bigroom Chart ແມ່ນເພງ Window & Youn – Volcano ທີ່ປ່ອຍລົງຄ້າຍເພງ Discovery Music ເປັນຄ້າຍເພງຂອງ Flash Finger DJ/Producer ຈາກປະເທດເກົາຫຼີ.

ກ່ອນທີ່ຜົນງານທີ່ ຕິດ 1 ໃນ 100 ຂອງ Top 100 Bigroom Chart

Window ແລະ Youn ໄດ້ເຮັດເພງນີ້ສຳເລັດມາແຕ່ປີກາຍນີ້ ພໍດີເຫັນຮູບພູເຂົາໄຟກໍ່ໄດ້ຕັ້ງຊື່ເພງໃຫ້ເປັນ Volcano ອັນທີ່ຈິງແລ້ວບາງຄັ້ງ ການຄິດຊື່ເພງກໍ່ຕ້ອງໃຫ້ກົງກັບເພງທີ່ເຮັດອອກມາພ້ອມ ຈາກນັ້ນກໍ່ເລີຍໄດ້ລອງສົ່ງໄປຄ້າຍໃຫຍ່ໆກ່ອນ ເຊິ່ງບໍ່ມີການຕອບກັບມາໃດໆເລີຍ, ຕໍ່ມາທາງເລືອກສຸດທ້າຍກໍ່ໄດ້ສົ່ງເພງນີ້ໄປໃຫ້ Flash Finger ໂດຍກົງ ທາງຫົວໜ້າຄ້າຍເພງ Discovery Music ກໍ່ຕົກລົງຕອບຮັບເອົາເພງນີ້ລົງໃນຄ້າຍເພາະ Style ເພງແຕກຕ່າງຈາກຫຼາຍໆເພງທີ່ຢູ່ໃນຄ້າຍ. ຫຼັງຈາກທີ່ໄດ້ຮັບເຊັນສັນຍາແລ້ວກໍ່ລໍຖ້າມື້ປ່ອຍເພງອອກມາແມ່ນວັນທີ່ 26.6.2017 ເຊົ້າມາວັນທີ່ 27.6.2017 Window ກໍ່ໄດ້ກວດເບິ່ງ Chart ຢູ່ທຸກມື້ກໍບໍ່ຕິດໃນ Chart ຄືຄ້າຍອື່ນໆ, ຕ້ອງຍ້ອນກັບມາຄິດວ່າເຮົາຍັງບໍ່ດີພໍບໍ່ ຈົນມາຮອດວັນທີ່ 4.7.2017 ທາງ Flash Finger ສົ່ງມາບອກວ່າເພງ Volcanoຕິດໃນ Top 100 Bigroom Chart ອັນດັບທີ່ 86 ວັນທີ່ 5.7.2017 ແມ່ນ ອັນດັບ 76 ຕົນເອງກໍ່ຮູ້ສຶກດີໃຈຫຼາຍເພາະເປັນເພງທຳອິດທີ່ຕິດ Top 100 ນີ້ໄດ້

” ຢ່າທໍ້ໃນສິ່ງທີ່ເຮັດ ພະຍາຍາມພັດທະນາຕໍ່ໄປ ແລ້ວມື້ໜຶ່ງຈະປະສົບຜົນສໍາເລັດ”

DJWindow

ສິ່ງທີ່ທ້າທາຍຈຳເປັນຕ້ອງຮູ້ກ່ຽວກັບອາຊີບ DJ

ຫຼັກໆແມ່ນເປົ້າໝາຍຂອງອາຊີບນີ້ ທີ່ເຮົາຄວນຕັ້ງໄວ້, ເມື່ອມີເປົ້າໝາຍທີ່ຊັດເຈນ ເຮົາຕ້ອງເລີ່ມມາຫາວິທີວ່າຕ້ອງເລີ່ມຈາກຈຸດໃດ ເພື່ອກ້າວເຂົ້າໄປຫາຈຸດໝາຍ, ສໍາລັບ Window ເອງຄື “ດີເຈລະດັບໂລກ” ເຊິ່ງແມ່ນຄວາມຝັນທີ່ຕັ້ງໄວ້ ເຊິ່ງແນ່ນອນບໍ່ແມ່ນເລື່ອງງ່າຍ ຕ້ອງມີ Style ແນວເພງເປັນຂອງຕົນແລ້ວ, ກ້າທີ່ຈະສະເໜີຜົນງານໃຫ້ດີເຈລຸ້ນໃຫຍ່ໆ ເພື່ອຮ່ວມສ້າງຜົນງານເພງອອກຮ່ວມກັນ. ພ້ອມກຽມຮັບມືໜ້າງານເວທີໃຫຍ່ບໍ່ວ່າຈະເປັນເປີດເພງແລ້ວດັບ ສຽງບໍ່ອອກ, ເພງຄ້າງເປັນຕົ້ນ ເຊິ່ງເຮົາຕ້ອງຝຶກຕົນເອງເລື້ອຍໆ ເພື່ອກ້າວເຂົ້າໃກ້ເປົ້າໝາຍຕົນເອງ.

ສຳລັບວຽກງານອາຊິບດີເຈໃນບ້ານເຮົານັບມື້ນັບມີການພັດທະນາຝີມືຫຼາຍຂຶ້ນ ເຊິ່ງມັນໄດ້ກາຍເປັນ ອາຊີບຫຼັກ ແລະ ອາຊີບເສີມໃຫ້ແກ່ຫຼາຍໆຄົນເຊິ່ງກ່ອນທີ່ຈະກາຍມາເປັນອາຊິບດີເຈໄດ້ນັ້ນ ທຸກຄົນລ້ວນມີແຕ່ການຝຶກຊ້ອມໃນຮູບແບບຂອງຕົນເອງບໍ່ວ່າຈະເບິ່ງວິດີໂອດີເຈລະດັບໂລກ ຫຼື ໄອດໍທີ່ຕົນເອງມັກຈາກງານ Festival ໃຫຍ່ໆແລ້ວກໍ່ມາຝຶກຊ້ອມຕົວຈິງ.

ແນວໂນ້ມຄວາມສົນໃຈ ກ່ຽວກັບ DJ ຂອງໄວໜຸ່ມລາວເປັນແນວໃດ?

ສຳລັບໃນປັດຈຸບັນນີ້ Window ເອງກໍ່ໄດ້ເຫັນວ່າໄວໜຸ່ມລາວກໍໄດ້ມີຄວາມສົນໃຈໃນດ້ານນີ້ຫຼາຍຂຶ້ນ ເຊິ່ງກໍ່ມີຫຼາຍຄົນທີ່ມັກເຂົ້າມາຖາມທາງ Facebook Pages ແລະ Facebook ສ່ວນຕົວກ່ຽວກັບການເຮັດເພງເທັກນິກຕ່າງໆບໍ່ວ່າຈະເປັນການ Edit, Mashup, Bootleg ເພງ ຫຼື ການ Mixdown & Mastering ເພງໃຫ້ສຽງເພງອອກມາແຈ້ງ. Window ເອງກໍ່ດີໃຈຫຼາຍທີ່ມີໄວໜຸ່ມໃຫ້ຄວາມສົນໃຈໃນດ້ານນີ້ ແລະ ພ້ອມທີ່ຈະຜັກດັນດີເຈລຸ່ນໃໝ່ຂຶ້ນມາພ້ອມ.

DJWindow

– ງານທີ່ຜ່ານມາທີ່ເຄີຍຮ່ວມ

Window ເອງກໍ່ໄດ້ມີໂອກາດໄປຮ່ວມຫຼີ້ນງານ Vangvieng Music Festival ແລະງານ Hydro Zonic ທີ່ຜ່ານມາໃນບ້ານເຮົາ ໄດ້ເປີດເພງທີ່ຕົນເອງສ້າງຂຶ້ນມາໃຫ້ທຸກຄົນໃນງານໄດ້ມ່ວນໄປກັບເມໂລດີ້ເພງແລະໂດດເຕັ້ນກັບທ່ອນດ໋ອບຂອງແນວເພງ EDM. ໃນອະນາຄົດ Window ມີຄວາມຝັນຢາກໄປງານໃຫຍ່ໆເຊັ່ນ: Tomorrowland, Ultra Music Festival, EDC, Amsterdam Music Festival ແລະງານອື່ນໆທີ່ຈັດຢູ່ທົ່ວໂລກ.

ສິ່ງທີ່ຕ້ອງກຽມພ້ອມໃນສາຍອາຊີບນີ້

  • ອັນດັບທຳອິດແມ່ນສຶກສາ ແລະ ຟັງກ່ຽວກັບແນວເພງເຊັ່ນ: EDM, Big Room, Trap, Hiphop, Deep House, R&B ແລະອື່ນໆອີກຫຼາຍແນວເພງ.
  • ຕໍ່ມາກໍ່ສຶກສາ Software ທີ່ໃຊ້ໃນການຕໍ່ເພງ ແລະ ແຕ່ງເພງເຊິ່ງ Window ຢາກຈະແນະນຳໃຫ້ຄົນລຸ່ນໃໝ່ໃຫ້ໃຊ້ໂປຮແກຮມ Virtual DJ ກ່ອນທີ່ຈະສຶກສາການຕໍ່ເພງຈາກເພງໜຶ່ງໄປອີກເພງໜຶ່ງ.
  • ສຳລັບໃຜທີ່ຢາກກ້າວກະໂດດມາເປັນ DJ/Producer ກໍ່ຈະມີຫຼາກຫຼາຍໂປຮແກຣມໃຫ້ເລືອກໃຊ້ເຊັ່ນ: Logic Pro X, Ableton Live, FL Studio.ສຳລັບໂປຮແກຣມທີ່ກ່າວແມ່ນມີຄວາມຄ້າຍຄືກັນຂຶ້ນຢູ່ທີ່ວ່າເຮົາຈະເລືອກໃຊ້ຕົວທີ່ເໝາະສົມສຳລັບເຮົາທີ່ສຸດ. ເວລາເຮົາຄິດຢາກຈະເຮັດເພງ ການລົງມືເຮັດໃນສິ່ງທີ່ຄິດໃຫ້ມັນອອກມາສຳເລັດມັນຕ້ອງໃຊ້ຄວາມອົດທົນສູງ”,  ຖ້າເຈົ້າຢາກເຮັດເພງອອກມາໃຫ້ສຳເລັດ ຕ້ອງເວລາໃຫ້ມັນ, ມັກຮັກ ແລະ ຝຶກຝົນ ສິ່ງສຳຄັນຕ້ອງຮູ້ລອງຜິດລອງຖືກ ເພາະຖ້າເຮົາຄິດວ່າມັນຄືງານຫຼີ້ນໆ ມັນກໍ່ຈະໃຫ້ເຮົາຊຳ່ທີ່ເຮົາເຮັດ ກົງກັນຂ້າມ ຖ້າຄິດວ່າມັນຄື ອານາຄົດ ຢາກຈະໄປໃຫ້ໄກໄປໃຫ້ເຖິງຄວາມຝັນທີ່ເຮົາຕັ້ງໄວ້ ມັນກໍ່ຈະເປັນ ອານາຄົດ. Window ເອງກໍ່ເຄີຍທໍ້ກັບການເຮັດເພງມາກ່ອນ ລວມໄປເຖິງອາລົມທີ່ບໍ່ຢາກເຮັດເພງອອກມາເລີຍ ແນ່ນອນມັນເປັນເລື່ອງປົກກະຕິທີ່ເວລາເຮົາຄິດຫຍັງບໍ່ອອກ, ບໍ່ຮູ້ຈະເອົາຫຍັງມາໃສ່ໃນເພງເພີ່ມ ເມື່ອເປັນແນວນັ້ນ Window ມັກຈະຟັງ ເພງຊ້າໆຜ່ອນຄາຍ ຫຼື ໄປນັ່ງຮ້ານກາເຟເພື່ອໃຫ້ເກີດໄອເດຍຂຶ້ນມາໃໝ່ຫຼັງຈາກນັ້ນບັນທຶກໄວ້ແລ້ວກໍ່ກັບມາສານຕໍ່.

ສຸດທ້າຍນີ້ Window ກໍ່ເປັນກຳລັງໃຈໃຫ້ກັບທຸກໆຄົນທີ່ກຳລັງເດີ່ນທາງມາສາຍນີ້ຈົ່ງອົດທົນພະຍາຍາມ ໃຊ້ຄວາມເຂົ້າໃຈກັບມັນໃຫ້ເຖິງທີ່ສຸດແລ້ວຄວາມຝັນກໍ່ຈະກາຍເປັນຈິງ ແລະ ກໍ່ຝາກຜົນງານເພງລ່າສຸດ “Volcano”

ຍິນດີຕອນຮັບເຂົ້າສູ່ Producer Life

ສາມາດຕິດຕາມຜົນງານໄດ້ທີ່:

Facebook Page: Window

DJWindow

Anoulack

The author Anoulack