close
Cover Story

ZangNoy Food Delivery ຊ້າງນ້ອຍບໍລິການ ສັ່ງອາຫານທຸກຮ້ານດັງ ແລະ ທຸກຮ້ານທີ່ທ່ານມັກ ເຖິງມືທ່ານ

FLK_6661

ປັດຈຸບັນ ພວກເຮົາທຸກຄົນມັກຄວາມສະດວກສະບາຍຫຼາຍຂຶ້ນ ພ້ອມກັບເວລາທີ່ມີຈໍາກັດ, ການຈະລາຈອນກໍນັບມື້ນັບຕິດຄັດເລື້ອຍໆ ການຈະທຽວໄປໃສມາໃສ ບໍ່ຄ່ອຍສະດວກປານໃດ. ດ້ວຍບັນຫາຕ່າງໆເຫຼົ່ານີ້ ຈຶ່ງເປີດໂອກາດໃຫ້ເກີດມີບໍລິການໃໝ່ໆ ເພື່ອຊ່ວຍເຮັດໃຫ້ການໃຊ້ຊີວິດຂອງພວກເຮົາທຸກຄົນສະດວກ ແລະ ວ່ອງໄວຫຼາຍຂຶ້ນ. ປັດຈຸບັນ ດ້ວຍເລື່ອງຂອງເວລາ ແລະ ການຈະລາຈອນທີ່ຕິດຄັດ, ຮ້ານອາຫານບໍ່ມີສະຖານທີ່ຈອດລົດ, ອາກາດຮ້ອນ ບໍ່ຢາກໄປໃສ ແຕ່ຢາກກິນອາຫານແຊບໆ ມື້ນີ້ ທີມງານພວກເຮົາມີຕົວຊ່ວຍດີໆ ມາແນະນໍາໃຫ້ທ່ານຜູ້ອ່ານທຸກຄົນ ເຊິ່ງເປັນໜຶ່ງຕົວເລືອກໃນການບໍລິການ ເສີບອາຫານແຊບໆ ຈາກຫຼາກຫຼາຍຮ້ານໃຫ້ທ່ານ ເຖິງໜ້າບ້ານ ກໍ່ວ່າໄດ້ ຂໍຮັບປະກັນໃນຄວາມສະດວກຢ່າງແນ່ນອນ ຈະເປັນແນວໃດນັ້ນມາຕິດຕາມພ້ອມກັນເລີຍ.
ທ່ານ ນາງ ສຸວັນນີ ສະກຸນຄໍາ ເຈົ້າຂອງ Zangnoy Food Delivery ໄດ້ໃຫ້ກຽດມາແນະນໍາກ່ຽວກັບບໍລິການຂອງເພີ່ນ ຈະເປັນແນວໃດ ມາເບິ່ງນໍາກັນເລີຍ.
ຊ້າງນ້ອຍ ບໍລິການຂອງພວກເຮົາເລີ່ມເປີດຕັ້ງແຕ່ 26 ເມສາ 2017 ທີ່ຜ່ານມານີ້ ເຊິ່ງຖືໄດ້ວ່າຜົນຕອບຮັບຕອນນີ້ແມ່ນດີຫຼາຍ ລູກຄ້າເພີ່ມຂຶ້ນເລື້ອຍໆ ພ້ອມກັບຈໍານວນຖານຂໍ້ມູນຂອງຮ້ານທີ່ເຂົ້າມາໃຫ້ພວກເຮົາຈັດສົ່ງ ກໍ່ເພີ່ມຂຶ້ນເຊັ່ນດຽວກັນ ເຊິ່ງເປັນບາດກ້າວ ການເລີ່ມຕົ້ນທີ່ດີຂອງພວກເຮົາ ທີ່ຄົນໃນສັງຄົມໃຫ້ການຕອບຮັບ ແລະ ນິຍົມພວກເຮົາ.

ແຮງບັນດານໃຈທີ່ເຮັດໃຫ້ລິເລີ່ມຕົ້ນທຸລະກິດນີ້?

ຈຸດເລີ່ມຕົ້ນທໍາອິດແມ່ນ ເລີ່ມຈາກບັນຫາຂອງຕົນເອງ ການຂີ່ລົດເຂົ້າໃນເມືອງ ແມ່ນລົດຕິດ ຫຍຸ່ງຍາກ ຂຶ້ນເລື້ອຍໆ ເວລາຈະໄປໃສມາໃສກໍ່ບໍ່ສະດວກ, ຕິດຂັດ, ບໍ່ທັນໃຈ ການຈະໄປກິນເຂົ້າຢູ່ຮ້ານແຖວໃນເມືອງຍິ່ງເປັນການຍາກ ຈຶ່ງຄິດວ່າຫາກມີຄົນໄປຊື້ຂອງກິນມາໃຫ້ ນ່າຈະດີ, ບາງມື້ກໍ່ແດດຮ້ອນ ຝົນຕົກ ເຊິ່ງເປັນອຸປະສັກຫຼາຍ, ພ້ອມກັນນັ້ນພວກເຮົາ ເລີ່ມມາສັງເກດວ່າ ປັດຈຸບັນ ຫລາຍໆຄອບຄົວແມ່ນບໍ່ມີເວລາເຮັດອາຫານກິນເອງ ເຂົາເຈົ້າຈຶ່ງຄິດວ່າການສັ່ງມາກິນ ຈະຖືກກວ່າ, ປະຢັດກວ່າ ແລະ ລົດຊາດກໍຍັງຄົງແຊບຄືແຕ່ງເອງ ຈຶ່ງຄິດວ່າ ນ່າຈະມີບໍລິການສົ່ງອາຫານ ເພື່ອຕອບໂຈດຄວາມຕ້ອງການຂອງລູກຄ້າ ແລະ ສັງຄົມປັດຈຸບັນ.


ປັດຈຸບັນ ຊ້າງນ້ອຍ ຮັບສົ່ງເຂດໃດແດ່?

ພວກເຮົາບໍລິການສົ່ງໃນເຂດຕົວເມືອງໃຫຍ່ນະຄອນຫຼວງວຽງຈັນ ໂດຍຕອນນີ້ຮັບສົ່ງ 4 ເຂດຕົວເມືອງໃຫຍ່ເປັນຫຼັກ ທີ່ມີຄ່າບໍລິການເລີ່ມຕົ້ນ 5,000 ກີບເຊັ່ນ:

  • ທາງເໜືອ ສົ່ງຮອດ 3 ແຍກເກົ້າລ້ຽວ
  • ເສັ້ນທ່າເດື່ອ ແມ່ນສົ່ງຮອດ 3 ແຍກ ພັດຕະຄານແມ່ຂອງ
  • ເສັ້ນທາງພາກໃຕ້ ແມ່ນສົ່ງຮອດ 4 ແຍກຫຼັກ 5
  • ແລະ ທາງແຖວໄອເຕັກ ແມ່ນສົ່ງຮອດ 3 ແຍກໄຟແດງໂພນທັນ
  • ທາງເສັ້ນຫົວຂົວແມ່ນຮອດຕະຫຼາດຫົວຂົວ

ເຊິ່ງນອກຈາກນີ້, ແມ່ນບວກເພີ່ມຕາມໄລຍະທາງ ຈາກ 5,000 ກີບ ຕໍ່ບ້ານ ຫຼື ຕາມຄວາມເໝາະສົມ

  • ກ່ອນຈະສົ່ງ ແມ່ນໄດ້ແຈ້ງລາຄາ ທາງລູກຄ້າກ່ອນສະເໝີ ເພື່ອຄວາມພໍໃຈກ່ອນຈະສັ່ງທຸກຄັ້ງ
  • ລູກຄ້າສາມາດສັ່ງອາຫານກັບພວກເຮົາ ຕັ້ງແຕ່ 8:30 ໂມງເຊົ້າ – 9:30 ໂມງແລງ
  • ເລີມເປີດບໍລິການ ວັນຈັນ ເຖິງ ວັນອາທິດ (ບ່ໍມີມື້ພັກ)

ຈຸດໃດ ທີ່ຊ້າງນ້ອຍຄິດວ່າ ແຕກຕ່າງຈາກບ່ອນອື່ນ?

  • ຈຸດທີ່ພວກເຮົາແຕກຕ່າງຈາກຄົນອື່ນແມ່ນ ຄຸນນະພາບ ແລະ ການບໍລິການທີ່ດີເອົາໃສ່ໃຈລູກຄ້າ ແລະ ຮ້ານທີ່ເຂົ້າຮ່ວມກັບພວກເຮົາ.
  • ທີ່ສໍາຄັນແມ່ນຄວາມຊື່ສັດ ທີ່ພວກເຮົາພະຍາຍາມສອນພະນັກງານທຸກຄົນ ນັບຕັ້ງເງິນທີ່ເກີນແມ່ນຕ້ອງໄດ້ສົ່ງລູກຄ້າທຸກຄັ້ງ ເພື່ອສ້າງຄວາມເຊື່ອໝັ້ນໃຫ້ກັບລູກຄ້າ.
  • ການແຕ່ງໂຕສຸພາບຮຽບຮ້ອຍ ເພື່ອສະແດງເຖິງຄວາມເປັນມືອາຊີບໃນການພ້ອມໃຫ້ບໍລິການ ແລະ ສ້າງໃຫ້ລູກຄ້າໄວ້ວາງໃຈ.
  • ການສົ່ງອາຫານທີ່ວ່ອງໄວທັນໃຈ ແຈ້ງລາຍລະອຽດລູກຄ້າທຸກຄັ້ງກ່ອນສັ່ງອາຫານເພື່ອຄວາມເພິ່ງພໍໃຈຂອງລູກຄ້າ.

ສິ່ງທ້າທາຍໃນການເລີ່ມຕົ້ນທຸລະກິດ ສົ່ງອາຫານພົບກັບຫຍັງແດ່?

ຫຼັກໆແມ່ນ ການຂົນສົ່ງອາຫານ ບາງປະເພດແມ່ນຕ້ອງໄດ້ລະວັງເປັນພິເສດເຊັ່ນ: ປະເພດເຄັກ. ແຕ່ປັດຈຸບັນ ພວກເຮົາໄດ້ຝຶກຝົນພະນັກງານສົ່ງໃຫ້ມີຄຸນນະພາບ ເພື່ອຮອງຮັບການສົ່ງອາຫານເພື່ອຮັກສາຄຸນນະພາບທີ່ດີທີ່ສຸດ ເມື່ອເຖິງມືລູກຄ້າ.
ບາງຄັ້ງ ເວລາໃນການສົ່ງອາດຈະຊ້າ ເນື່ອງມາຈາກ ການສັ່ງໃນເວລາທີ່ການຈະລາຈອນຕິດຄັດ ເຊິ່ງຖືວ່າເປັນສິ່ງໜຶ່ງທີ່ທ້າທາຍຫຼາຍ ແຕ່ຍ້ອນ ພວກເຮົາມີທີມງານທີ່ຊ່ວຍກັນ ປະສານງານໄດ້ດີ ເພື່ອສາມາດແກ້ໄຂບັນຫາຕ່າງໆໄດ້ທັນເວລາ ຫຼື ຝົນຕົກໜັກ ກໍ່ຍັງເປັນອຸປະສັກເຊັ່ນດຽວກັນ ເຊິ່ງເປັນປັດໄຈພາຍນອກ ທີ່ພວກເຮົາຕ້ອງພະຍາຍາມແກ້ໄຂບັນຫາຕະຫຼອດ ເພື່ອປັບປຸງການບໍລິການຂອງພວກເຮົາເລື້ອຍໆ.

ເຄັດລັບໃນການບໍລິຫານພະນັກງານ

ພະນັກງານແມ່ນຫົວໃຈຫຼັກຂອງທຸລະກິດພວກເຮົາ ເປັນຜູ້ທີ່ຈະສົ່ງຕໍ່ ແລະ ມອບການບໍລິການທີ່ດີໃຫ້ກັບລູກຄ້າ, ພວກເຮົາຈຶ່ງຕ້ອງໄດ້ໃສ່ໃຈ ພະນັກງານທີ່ເຂົ້າມາເຮັດວຽກຮ່ວມກັນ ທຸກຄົນຄືຄົນໃນຄອບຄົວ ທຸລະກິດນີ້ຄືທຸລະກິດຂອງທີມງານທຸກຄົນ. ເພາະທຸກຄົນມາຈາກຫຼາຍຄອບຄົວທີ່ຕ່າງກັນ ແຕ່ເມື່ອມາຢູ່ຮ່ວມກັນ ທຸກຄົນຈະຕ້ອງປັບນິໄສຂອງຕົນ ເພື່ອຢູ່ຮ່ວມກັນ ແລະ ໃຫ້ຮູ້ສຶກວ່າພວກເຮົາແມ່ນອ້າຍນ້ອງກັນ.
ບາງຄັ້ງຫາກບໍ່ທັນຂ້າພະເຈົ້າກໍ່ໄປສົ່ງເຄື່ອງເອງ ເພື່ອໃຫ້ລູກນ້ອງເຫັນວ່າ ເຮົາເອງເປັນຫົວໜ້າກໍ່ເຮັດວຽກບໍລິການລູກຄ້າເຊັ່ນດຽວກັນ.ທາງທີມງານທຸກຝ່າຍແມ່ນເຮັດວຽກໜັກ ບໍ່ວ່າຈະຮັບມືກັບລູກຄ້າ, ສ່ວນພະນັກງານສົ່ງເຄື່ອງແມ່ນ ພົບກັບອາກາດທີ່ຮ້ອນ ເມື່ອທຸກຝ່າຍມາພົບກັນ ບາງຄັ້ງອາດຈະເຮັດໃຫ້ທຸກຄົນໃຈຮ້ອນ ສື່ສານບໍ່ເຂົ້າໃຈກັນ ເຊິ່ງພວກເຮົາຈະສອນໃຫ້ພວກເຂົາບໍ່ໃຫ້ໂທດກັນແຕ່ຈະບອກໃຫ້ແກ້ໄຂ ບັນຫາຊ່ວຍກັນ ເພື່ອໃຫ້ພະນັກງານປັບຄວາມເຂົ້າໃຈ ແລະ ຊ່ວຍໃຫ້ການເຮັດວຽກດີຂຶ້ນກວ່າເກົ່າ.
ທາງພວກເຮົາຈະມີການປະຊຸມ ເພື່ອສ່ອງແສງເຖິງບັນຫາຂອງແຕ່ລະຝ່າຍ ເພື່ອໃຫ້ຮູ້ວ່າແຕ່ລະເດືອນມີຫຍັງເກີດຂຶ້ນ ເພື່ອຊ່ວຍກັນແກ້ໄຂບັນຫາ ໃຫ້ມີການປັບປຸງການເຮັດວຽກທີ່ດີຂຶ້ນ ແລະ ໃຫ້ພະນັກງານແຕ່ລະຝ່າຍໄດ້ມີໂອກາດອະທິບາຍເຖິງບັນຫາທີ່ຕົນເອງພົບ ເຊິ່ງພວກເຮົາຄິດວ່າ ນີ້ແມ່ນວິທີທີ່ດີ ໃນການບໍລິຫານຄົນຂອງທີມງານພວກເຮົາ ແລະ ໃຫ້ໂອກາດທຸກຝ່າຍໄດ້ຮຽນຮູ້ການເຮັດວຽກຂອງຝ່າຍອື່ນພ້ອມ.

ມີວິທີການສ້າງຄວາມເຊື່ອໝັ້ນແນວໃດ?

ດ້ານຮ້ານອາຫານ
ຮ້ານອາຫານແມ່ນ ຈຸດເລີ່ມຕົ້ນທີ່ພວກເຮົາໃສ່ໃຈ ເພື່ອໃຫ້ສາມາດມາຮ່ວມງານກັບພວກເຮົາ ໃນການບໍລິການສົ່ງຕໍ່ຄວາມແຊບໃຫ້ກັບລູກຄ້າ
– ຮ້ານໃດທີ່ມີການເຊັນສັນຍາກັບພວກເຮົາ ທາງພວກເຮົາຈະໄປຊ່ວຍເລື່ອງການຕະຫຼາດ ເພີ່ມຍອດຂາຍໃຫ້ກັບທາງຮ້ານ ລວມເຖິງອອກຄໍາຄິດເຫັນ ເພື່ອໃຫ້ຮ້ານມີການປັບປຸງຕາມຄວາມນິຍົມຂອງລູກຄ້າ.
– ນອກຈາກນີ້ ຫາກຮ້ານໃດຍອດຂາຍຕົກຫຼາຍ ເກີນກວ່າເກນທີ່ພວກເຮົາກໍານົດ ແມ່ນພວກເຮົາຈະຈັດໂປຣໂມຊັນໃຫ້ ເພື່ອເພີ່ມຍອດຂາຍ ແລະ ດຶງລູກຄ້າເຂົ້າມາຮ້ານ ໂດຍທີ່ທາງຮ້ານບໍ່ໄດ້ເສຍຄ່າໃຊ້ຈ່າຍໃດໆ.
ທຸກໆເດືອນ ພວກເຮົາຈະມີການໂທສອບຖາມຮ້ານ ກ່ຽວກັບລູກຄ້າທີ່ເຂົ້າມາຮ້ານ ແລະ ຍອດຂາຍ ເຊິ່ງນີ້ແມ່ນສິ່ງທີ່ພວກເຮົາຄິດວ່າ ເປັນການສ້າງໃຫ້ຮ້ານເຫັນເຖິງຄວາມໃສ່ໃຈ ເມື່ອໄດ້ມາຮ່ວມມືກັບຊ້າງນ້ອຍພວກເຮົາ

” ພວກເຮົາເບິ່ງແຍງຮ້ານອາຫານຂອງທຸກໆທ່ານ ຄືກັບຮ້ານອາຫານເຮົາເອງ”

ດ້ານລູກຄ້າ
– ການບໍລິການລູກຄ້າ ແມ່ນສິ່ງສໍາຄັນເຊັ່ນດຽວກັນ ພວກເຮົາປັບປຸງການບໍລິການ ແນະນໍາພະນັກງານທຸກຄົນໃຫ້ກຽມພ້ອມທີ່ຈະຕ້ອນຮັບລູກຄ້າສະເໝີ ເລີ່ມຕັ້ງແຕ່ເລື່ອງ ມາລະຍາດ, ການແຕ່ງໂຕ, ການເວົ້າຈາ ແລະ ພະນັກງານທຸກຄົນແມ່ນຕ້ອງມີຄວາມຊື່ສັດ ເຊິ່ງເປັນຫົວໃຈຫຼັກຂອງພວກເຮົາ ລວມເຖິງຟັງຄວາມຄິດເຫັນຂອງລູກຄ້າ ແລ້ວນໍາມາປັບປຸງການບໍລິການ ແລະ ແນະນໍາຮ້ານໃຫ້ດີຂຶ້ນ.
– ມີການຈັດໂປຣໂມຊັນ ເພື່ອຄືນກໍາໄລໃຫ້ກັບລູກຄ້າເລື້ອຍໆ ເປັນຕົ້ນແມ່ນຊື້ຄົບມີສ່ວນຫຼຸດ, ມີເກັບແຕ້ມແລກຂອງລາງວັນ.

ເປົ້າໝາຍໄລຍະຍາວຕໍ່ໄປມີແຜນແນວໃດ?
ໃນໄວໆນີ້ ພວກເຮົາກໍາລັງຈະສ້າງເວັບໄຊທ໌ ແລະ ແອັບທາງມືຖື ເພື່ອຕອບສະໜອງຄວາມຕ້ອງການຂອງລູກຄ້າກຸ່ມຕ່າງປະເທດ ແລະ ສ້າງຄວາມສະດວກສະບາຍໃຫ້ລູກຄ້າຂອງພວກເຮົາ ໃຫ້ສາມາດໃຊ້ບໍລິການຂອງພວກເຮົາໄດ້ງ່າຍຂຶ້ນ ແລະ ວ່ອງໄວກວ່າເກົ່າ. ນອກຈາກນີ້, ພວກເຮົາມີເປົ້າໝາຍ ຢາກຈະຊ່ວຍຮ້ານອາຫານໃນການສົ່ງຕໍ່ອາຫານແຊບໆ ເຖິງມືລູກຄ້າແບບງ່າຍ ດ້ວຍການຈັດສົ່ງເຖິງທີ່ ເພື່ອຕອບໂຈດຄວາມສະດວກສະບາຍຂອງທຸກຄົນໃນບ້ານເຮົາ ສໍາລັບ ລູກຄ້າທ່ານໃດທີ່ຍັງບໍ່ໄດ້ໃຊ້ບໍລິການ ພວກເຮົາກໍຂໍຝາກບໍລິການພວກເຮົາຖ້າຢາກຮຸ້ວ່າຄັກບໍ່ ລອງມາໃຊ້ບໍລິການຂອງຊ້າງນ້ອຍເບິ່ງເດີ້.

” ບໍ່ຕ້ອງອອກໄປໃສ ຊ້າງນ້ອຍໄປຊື້ ແລະ ສົ່ງຮອດເຮືອນຮອດຊານ ຮອດຫ້ອງການ ຖົງ 1 ກໍ່ສົ່ງເຖິງທີ່ “

 

ຊ່ອງທາງການຕິດຕໍ່ ສໍາລັບຜູ້ທີ່ສົນໃຈໃຊ້ບໍລິການ

Facebook Page: ZangNoy Food Delivery – ຊ້າງນ້ອຍ ບໍລິການສົ່ງອາຫານຈາກຫຼາຍຮ້ານດັງ ເຖິງມືທ່ານ

ບ້ານ ສະຫວ່າງ, ເມືອງ ຈັນທະບູລີ, ນະຄອນຫຼວງວຽງຈັນ

021 258 228, 02076664448

 

Nee

The author Nee